ସାଧାରଣତଃ ପ୍ରତ୍ୟେକ ଝିଅ ବାର୍ବି ଡଲ୍କୁ ବହୁତ ପସନ୍ଦ କରନ୍ତି। ଏପରିକି ସେମାନେ ବାର୍ବି ଡଲ୍ ପରି ହେବାକୁ ସ୍ବପ୍ନ ବି ଦେଖିଥାନ୍ତି। କିନ୍ତୁ ବୟୟ ବଢ଼ିବା ସହିତ ସେମାନଙ୍କର ଖାଦ୍ୟ, ପୋଷାକ ଏବଂ ରୁଚି ବଦଳି ଯାଇଥାଏ। କିନ୍ତୁ ଆଜି ଏମିତି ଜଣେ ଯୁବତୀଙ୍କ ବିଷୟରେ କହିବୁ ଯିଏ କି ବାର୍ବି ଡଲ୍ ଆଉ ଗୋଲାପୀ ରଙ୍ଗକୁ ଆଜି ପର୍ଯ୍ୟନ୍ତ ଛାଡ଼ି ପାରିନାହାନ୍ତି।
ବ୍ରିଟେନରେ ରହୁଥିବା ହୋଲି ଓ୍ବେମାଉଥ ନାମକ ଜଣେ ୨୮ ବର୍ଷୀୟା ଯୁବତୀ ଗୋଲାପୀ ରଙ୍ଗକୁ ଏତେ ଭଲ ପାଆନ୍ତି ଯେ ସେ ନିଜ ପୋଷାକ, ଜୋତାଠାରୁ ଆରମ୍ଭ କରି ଖାଦ୍ୟ ଏବଂ ପାନୀୟ ପର୍ଯ୍ୟନ୍ତ ଗୋଲାପୀ ରଙ୍ଗର ହିଁ କରିଥାନ୍ତି। ତାଙ୍କର ଏହି ଉତ୍ସାହ ପାଇଁ ସେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରିବାକୁ କୁଣ୍ଠାବୋଧ କରନ୍ତି ନାହିଁ। ଗୋଲାପୀ ରଙ୍ଗ ତାଙ୍କ ଜୀବନରେ ଜାଗ୍ରତ ହେବା ଠାରୁ ଆରମ୍ଭ କରି ରାତିରେ ଶୋଇବା ପର୍ଯ୍ୟନ୍ତ ସବୁ ସ୍ଥାନରେ ଦେଖିବାକୁ ମିଳିଥାଏ।
ସେ ଏକ ସାକ୍ଷାତକାରରେ କହିଛନ୍ତି, ଝିଅମାନଙ୍କ ପରି ପିଲାଦିନରୁ ବାର୍ବି ଡଲ୍କୁ ଭଲ ପାଉଥିଲେ, କିନ୍ତୁ ଯେତେବେଳେ ସେ ୨୦ ବର୍ଷର ହୋଇଥିଲେ ସେତେବେଳେ ଏହି ଅଭ୍ୟାସ ତାଙ୍କର ଉତ୍ସାହରେ ପରିଣତ ହୋଇଥିଲା। ସେ ତାଙ୍କ ଜୀବନର ପ୍ରତ୍ୟେକ ଦିଗକୁ ନିଜ ପ୍ରିୟ ରଙ୍ଗରେ ରଙ୍ଗାଇଥିଲେ। ସେ କହିଛନ୍ତି, ଏହା ତାଙ୍କୁ ତାଙ୍କ ପିଲାଦିନ ସହିତ ସଂଯୋଗର ଭାବନା ଦେଇଥାଏ। ୧୫ ବର୍ଷ ବୟସରେ ସେ ଅପସ୍ମାର ରୋଗରେ ଆକ୍ରାନ୍ତ ହୋଇଥିଲେ। ଯେଉଁଥିପାଇଁ ସେ ଡାକ୍ତରଖାନାରେ ବହୁତ ସମୟ ବିତାଇଥିଲେ। ଏପରି ପରିସ୍ଥିତିରେ ତାଙ୍କର ପିଲାଦିନ ବହୁତ କଷ୍ଟରେ ବିତିଥିଲା। ବର୍ତ୍ତମାନ ସେ ସୁସ୍ଥ ହୋଇ ପୁଣି ନିଜ ପିଲାଦିନକୁ ନିଜ ପ୍ରିୟ ରଙ୍ଗ ସହିତ ବଞ୍ଚିବାକୁ ଚାହୁଁଛନ୍ତି।
ହୋଲି ନିଜ ଗୋଲାପୀ ରଙ୍ଗର ଇଚ୍ଛା ପୂରଣ କରିବା ପାଇଁ ବାର୍ବି ଡଲ୍ ଥିମ ଆଲମାରୀ ମଧ୍ୟ ତିଆରି କରିଛନ୍ତି। ଯେଉଁଥିରେ ୪ ଲକ୍ଷରୁ ଅଧିକ ଖର୍ଚ୍ଚ କରି ଗୋଲାପୀ ରଙ୍ଗର ଡ୍ରେସ୍ ଆଙ୍କିଛନ୍ତି। ସେ ଗୋଲାପୀ ରଙ୍ଗର ଡ୍ରେସ୍ ଛଡ଼ା ଆଉ କିଛି ପିନ୍ଧନ୍ତି ନାହିଁ ଏବଂ ସେ ଲୋକଙ୍କ ଦୃଷ୍ଟି ଆକର୍ଷଣ କରନ୍ତି। ହୋଲି ସ୍ବୀକାର କରିଛନ୍ତି, ତାଙ୍କର ଏପରି ଅଭ୍ୟାସକୁ ପରିବାର ଏବଂ ସାଙ୍ଗସାଥୀମାନେ ଅଜବ ଭାବନ୍ତି କିନ୍ତୁ ସେ ଏହାକୁ ଖୁବ୍ ଭଲ ପାଆନ୍ତି। ସେ କହିଛନ୍ତି, ତାଙ୍କ ପ୍ରେମିକଙ୍କର ଏଥିରେ କୌଣସି ଅସୁବିଧା ନାହିଁ ଏବଂ ସେ ମଧ୍ୟ ତାଙ୍କୁ ସମର୍ଥନ କରନ୍ତି। ସବୁଠାରୁ କୌତୂହଳର ବିଷୟ ହେଉଛି ହୋଲିଙ୍କ ପୋଷାକ ବ୍ୟତୀତ ଖାଦ୍ୟ ସାମଗ୍ରୀ ମଧ୍ୟ ଗୋଲାପୀ ଏବଂ ସେ ପ୍ରାୟତଃ ଗୋଲାପୀ ଟି’ ପାର୍ଟି କରନ୍ତି।