ପୁରୁଷୋତ୍ତମପୁର,୧୧ା୧୧(ଡି.ଏନ.ଏ.): ପୁରୁଷୋତ୍ତମପୁର ପୋଲିସ ହିଞ୍ଜିଳି ନୂଆଁଗଡ ଶିବ ମନ୍ଦିର ନିକଟରୁ ଏକ ଆନ୍ତଃ ଜିଲା ଗାଡିଚୋର ର଼୍ୟାକେଟକୁ ଠାବ କରିଛି। ଏହି ଘଟଣାରେ ହିଞ୍ଜିଳି ଥାନା ସାହିର ତ୍ରିନାଥ ସାହୁ (୨୨), ଉମାକାନ୍ତ ସାହୁ (୩୪) ଓ ପୁରୁଷୋତ୍ତମପୁର ଥାନା ଅନ୍ତର୍ଗତ ଭୂତସରସିଙ୍ଗିର ବୁଲୁ ଓରଫ କାମରାଜୁ ମୁନୀ(୩୮)ଙ୍କୁ କୋର୍ଟ ଚାଲାଣ କରାଯାଇଛି। ଘଟଣାକୁ ନେଇ ପୁରୁଷୋତ୍ତମପୁର ଏସଡିପିଓ ରଜନୀକାନ୍ତ ସାମଲ ଏବଂ ଆଇଆଇସି ପୀୟୂଷ ରଞ୍ଜନ ଛୋଟରାୟ ଖବରଦାତା ସମ୍ମିଳନୀରେ କହିଛନ୍ତି ଯେ, କବିସୂର୍ଯ୍ୟନଗର ଥାନା ଅନ୍ତର୍ଗତ ମୋରାବାଇ ଗ୍ରାମର ନିର୍ମଳ ଚନ୍ଦ୍ର ସାହୁଙ୍କ ରାସ୍ତା ନିର୍ମାଣରେ ବ୍ୟବହୃତ ଏକ ରୋଲର ଗାଡି ପୁରୁଷୋତ୍ତମପୁର ଥାନା ଅନ୍ତର୍ଗତ ପାଣ୍ଡିଆ ଗ୍ରାମରେ ରଖିଥିବା ବେଳେ ତାହାକୁ ସୋମବାର ମଧ୍ୟ ରାତିରେ ଦୁର୍ବୃତ୍ତତମାନେ ଚୋରିକରି ନେଇଯାଇଥିଲେ। ଏଥିନେଇ ଚୋରି ଘଟଣା ସମ୍ପର୍କରେ ସେ ସିସି ଟିଭି ମାଧ୍ୟମରେ ଦେଖିପାଇ ମଙ୍ଗଳବାର ଥାନାରେ ଅଭିଯୋଗ କରିଥିଲେ। ନଂ ୬୬୯/୨୨ରେ ରୁଜୁ କରି ପୋଲିସ ତଦନ୍ତ ଆରମ୍ଭ କରିଥିଲେ। ଏହି ତଦନ୍ତରେ ସିସିଟିଭିରେ ଗାଡି ଚୋରି ସମୟରେ କଏଦ ହୋଇଥିବା ଟ୍ରକ, ଦୁଇ ଗୋଟି ହାଇଡ୍ରା କ୍ରେଇନ ଓ ବାଇକ୍ ନମ୍ବରକୁ ଯାଞ୍ଚ କରି ଖୋଳତାଡ ଆରମ୍ଭ କରିଥିଲା। ଯାହାକି ହିଞ୍ଜଳି ସହର ମଧ୍ୟସ୍ଥ ନୂଆଁଗଡରେ ଥିବା ଏକ କବାଡିଆ ଦୋକାନରେ ଏହି ରୋଲରକୁ ବିକ୍ରି କରାଯାଇଥିବାର ପୋଲିସ ସୂଚନା ପାଇଥିଲେ ଓ ସେହି କବାଡି ଦୋକାନୀରେ ଚଢାଉ ବେଳେ ରୋଲରଟିକୁ କାଟି ଖଣ୍ଡ ଖଣ୍ଡ କରି ପକାଇଥିବା ଅବସ୍ଥାରେ ଦେଖିବାକୁ ପାଇ ପୋଲିସ ତାହାକୁ ଜବତ କରିଥିଲା। ଯାହାକି ଗଞ୍ଜାମ ଜିଲାର ପୁରୁଷୋତ୍ତମ ପୁର ସମେତ କବିସୂର୍ଯ୍ୟନଗର, କୋଦଳା, ଚମାଖଣ୍ଡି, ଆସିକା, ରମ୍ଭା, ଗଞ୍ଜାମ ଓ ହିଞ୍ଜିଳି ଥାନା ଅଞ୍ଚଳରୁ ୧୩ ବିଭିନ୍ନ ପ୍ରକାର ଗାଡି ଚୋରି ନେଇ କେସ ହୋଇଛି। ଏହି ଗାଡଗୁଡ଼ିକୁ ଚୋରାଇ ଆଣି ତାହାକୁ ଏଠାରେ କାଟି ଖଣ୍ଡ ଖଣ୍ଡ କରି ବିକ୍ରି କରିବାରେ ଲାଗିଛନ୍ତି। ଏପରିକି ଜିଲା ବାହାରୁ ମଧ୍ୟ କିଛି ଗାଡି ଚୋରାଇ ଆଣିଥିବାର ମଧ୍ୟ ସୂଚନା ମିଳିଛି। ଏହାକୁ ନେଇ ଆହୁରି ଅଧିକ ତଦନ୍ତ ଚାଲିଛି। ଏହି ଚୋରିରେ ବ୍ୟବହୃତ ଦୁଇ ଗୋଟି ହାଇଡ୍ରା କ୍ରେନ (ନଂ ଓଡି ୦୭ ଏଜେ ୭୭୫୫, ଓଡି ୦୭ ଏଏନ ୦୫୩୫), ମୋଟରସାଇକେଲ (ନଂ ଓଡି ୩୨ଏ୭୮୨୪)କୁ ଜବତ କରିବା ସହ ୩ ଡାଲା ଅଟୋକୁ ଜବତ କରାଯାଇଛି। ବିଭିନ୍ନ ଥାନା ଅଞ୍ଚଳରୁ ଚୋରି ହୋଇଥିବା ବିଭିନ୍ନ ଗାଡିର ବହୁ ଯନ୍ତ୍ରାଂଶ ସହ ଗାଡିଗୁଡିକୁ କାଟିବା ଲାଗି ବ୍ୟବହୃତ କରାଯାଉଥିବା ଗ୍ୟାସକଟର, ଗ୍ୟାସ ସିଲିଣ୍ଡର, ଯନ୍ତ୍ରପାତିକୁ ମଧ୍ୟ ଜବତ କରାଯାଇଛି। ଏହି ଘଟଣାମାନର ମୁଖ୍ୟ ଅଭିଯୁକ୍ତ ଫେରାର ହୋଇଯାଇଛନ୍ତି। ସେମାନଙ୍କୁ ଗିରଫ କରିବା ଲାଗି ପୋଲିସ ପକ୍ଷରୁ ବିଭିନ୍ନ ସ୍ଥାନରେ ଚଢାଉ ଚାଲିଛି।