ନୂଆଦିଲ୍ଲୀ,୧୪।୭: ଆମେରିକାରେ ଏକ ରାଲିରେ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପରେ ହୋଇଛି ମରାଣାତ୍ମକ ଆକ୍ରମଣ। ପେନସିଲଭାନିଆରେ ଏକ ନିର୍ବାଚନ ରାଲିରେ ତାଙ୍କୁ ଗୁଳି କରାଯାଇଛି। ଏହି ଗୁଳିମାଡ଼ରେ ଟ୍ରମ୍ପ ଆହତ ହୋଇଛନ୍ତି। ତାଙ୍କ ମୁହଁ ଏବଂ କାନରେ ରକ୍ତ ଦାଗ ଦେଖିବାକୁ ମିଳିଛି। ଟ୍ରମ୍ପଙ୍କ ଗୁଳିମାଡ ଘଟଣା ପରେ ପୁଣିଥରେ ବିଶ୍ୱ ନେତାଙ୍କ ସୁରକ୍ଷା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ତେବେ ଏହି ଆକ୍ରମଣରେ ତାଙ୍କର ଜଣେ ସମର୍ଥକଙ୍କ ମୃତ୍ୟୁ ଖବର ସାମ୍ନାକୁ ଆସୁଛି। ସୁରକ୍ଷା ଦୃଷ୍ଟିକୋଣରୁ ଏହା ଅତ୍ୟନ୍ତ ବିପଜ୍ଜନକ ବୋଲି କୁହାଯାଉଛି। କିନ୍ତୁ ଏହା ପ୍ରଥମ ଘଟଣା ନୁହେଁ ଯେ ଟ୍ରମ୍ପଙ୍କ ପରି ଏତେ ବଡ ବିଶ୍ୱ ନେତାଙ୍କ ଉପରେ ଏଭଳି ମାରାତ୍ମକ ଆକ୍ରମଣ ହୋଇଛି। ଏହାପୂର୍ବରୁ ବିଶ୍ୱର ବିଭିନ୍ନ ଦେଶର ବହୁ ଲୋକପ୍ରିୟ ନେତାଙ୍କ ଉପରେ ଏଭଳି ଆକ୍ରମଣ ହୋଇଛି। ଜାଣନ୍ତୁ ଏ ସମ୍ପର୍କରେ…
ପୂର୍ବତନ ଭାରତୀୟ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ହତ୍ୟା ସାରା ଭାରତକୁ ସ୍ତବ୍ଧ କରି ଦେଇଥିଲା। ଏହି ଆକ୍ରମଣ ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା ଯେତେବେଳେ ଇନ୍ଦିରାଙ୍କୁ ନିଜ ବଡିଗାର୍ଡମାନେ ଗୁଳି କରି ହତ୍ୟା କରିଥିଲେ। ଯେଉଁଥିରେ ଘଟଣାସ୍ଥଳରେ ସେ ମୃତ୍ୟୁ ବରଣ କରିଥିଲେ।
ଚଳିତ ବର୍ଷ ମେ ମାସରେ ସ୍ଲୋଭାକିଆର ପ୍ରଧାନମନ୍ତ୍ରୀ ରବର୍ଟ ଫିକୋଙ୍କ ଉପରକୁ ଗୁଳି ଚଳାଇବାରୁ ସେ ଗୁରୁତର ଆହତ ହୋଇଥିଲେ। ହ୍ୟାଣ୍ଡଲୋଭାର ଏକ ସାଂସ୍କୃତିକ କେନ୍ଦ୍ରରେ ଏକ ସଭା ପରେ ସେ ଲୋକଙ୍କୁ ଅଭିବାଦନ ଜଣାଇବା ବେଳେ ତାଙ୍କ ଉପରେ ଏହି ଆକ୍ରମଣ ହୋଇଥିଲା। ଏହି ଆକ୍ରମଣ ପରେ ତାଙ୍କୁ ଆହତ ଅବସ୍ଥାରେ ବାନସ୍କା ବାଇଷ୍ଟ୍ରିକାର ଟ୍ରମା ସେଣ୍ଟରକୁ ନିଆଯାଇଥିଲା ଯେଉଁଠାରେ ସେ ବହୁଦିନ ଧରି ଚିକିତ୍ସିତ ହେଉଥିଲେ। ବର୍ତ୍ତମାନ ତାଙ୍କ ଅବସ୍ଥା ଗୁରୁତର ରହିଛି।
ଜାପାନର ପୂର୍ବତନ ପ୍ରଧାନମନ୍ତ୍ରୀ ସିଞ୍ଜୋ ଆବେଙ୍କୁ ଗୁଳି କରି ହତ୍ୟା କରାଯିବା ଘଟଣାରେ ସାରା ବିଶ୍ୱ ଥରହର ହୋଇଯାଇଥିଲା। ଯେତେବେଳେ ସେ ନାରା ସହରରେ ଏକ ରାଲି କରୁଥିଲେ ସେତେବେଳେ ତାଙ୍କ ଉପରେ ଏହି ଆକ୍ରମଣ ହୋଇଥିଲା। ଆକ୍ରମଣକାରୀମାନେ ତାଙ୍କ ଉପରକୁ ଦୁଇ ରାଉଣ୍ଡ ଗୁଳି ଚଳାଇଥିଲେ, ଯେଉଁଥିରେ ଗୋଟିଏ ଗୁଳି ତାଙ୍କ ଛାତି ଦେଇ ଆରପାର ଯାଇଥିଲା। ଏବଂ ଅନ୍ୟ ଗୁଳିଟି ତାଙ୍କ ବେକରେ ବାଜିଥିଲା।
ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ଏକ ରାଲିରେ ସାଂଘାତିକ ଆକ୍ରମଣ ହୋଇଥିଲା। ଏହି ସମୟରେ ଆକ୍ରମଣକାରୀମାନେ ତାଙ୍କ ଉପରକୁ ଗୁଳି ଚଳାଇଥିଲେ, ଯାହା ତାଙ୍କ ଗୋଡରେ ବାଜିଥିଲା। ଏହା ପରେ ତାଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଏହି ଆକ୍ରମଣରେ ତାଙ୍କସହ ୧୪ଜଣ ଆହତ ହୋଇଥିଲେ।
୨୦୦୭ରେ ପାକିସ୍ତାନର ପ୍ରଥମ ମହିଳା ପ୍ରଧାନମନ୍ତ୍ରୀ ବେନଜୋର ଭୁଟ୍ଟୋଙ୍କୁ ହତ୍ୟା କରାଯାଇଥିଲା। ଏହି ସମୟରେ ସେ ପାକିସ୍ତାନର ରାୱଲପିଣ୍ଡିରେ ଏକ ନିର୍ବାଚନ ରାଲିରେ ଭାଷଣ ଦେଇ ଫେରୁଥିଲେ। ଅତି ନିକଟରୁ ଆକ୍ରମଣକାରୀ ତାଙ୍କ ଉପରକୁ ଗୁଳି ଚଳାଇଥିଲେ।
ହାଇତିର ରାଷ୍ଟ୍ରପତି ଜୋଭେନେଲ ମୋଇସେଙ୍କ ହତ୍ୟାର କାହାଣୀ ଅତି ଭୟଙ୍କର। ମଧ୍ୟରାତ୍ରିରେ ପୋର୍ଟ-ଅ-ପ୍ରିନ୍ସରେ ଥିବା ତାଙ୍କ ବ୍ୟକ୍ତିଗତ ବାସଭବନରେ ସେ ଥିବାବେଳେ ତାଙ୍କୁ ହତ୍ୟା କରାଯାଇଥିଲା। ଏହି ସମୟରେ, ୨୮ଜଣ ବ୍ୟବସାୟୀ ତାଙ୍କ ଉପରକୁ ଗୁଳି ଚଳାଇଥିଲେ, ଯେଉଁଥିପାଇଁ ତାଙ୍କର ମୃତ୍ୟୁ ହୋଇଥିଲା। ତାଙ୍କ ସ୍ତ୍ରୀ ମାର୍ଟିନ ମୋଇସ ତାଙ୍କୁ ଷଡଯନ୍ତ୍ର କରି ହତ୍ୟା କରିଥିଲେ ବୋଲି ତଦନ୍ତରେ ଜଣାପଡିଥିଲା। ପୂର୍ବତନ ପ୍ରଧାନମନ୍ତ୍ରୀ କ୍ଲୋଡ ଜୋସେଫଙ୍କ ସହଯୋଗରେ ସେ ଏହି ହତ୍ୟାକାଣ୍ଡର ଯୋଜନା କରିଥିଲେ। ତେବେ ଏହି ଆକ୍ରମଣରେ ମାର୍ଟିନ ମୋଇସ ମଧ୍ୟ ଆହତ ହୋଇଥିଲେ।