ନୂଆଦିଲ୍ଲୀ,୨୬।୧୨: ଦୁଇ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ ଭାରତ ବାଂଲାଦେଶକୁ ୨-୦ରେ ପରାସ୍ତ କରିଛି। ଏହାସହ ଟିମ ଇଣ୍ଡିଆ ୨୦୨୨ ବର୍ଷର ଶେଷ ଟେଷ୍ଟ ସିରିଜ ଏବଂ ଶେଷ ମ୍ୟାଚ ଜିତିଥିଲା। ଯଦି ଟିମ ଇଣ୍ଡିଆର ଚଳିତବର୍ଷର ସମଗ୍ର ପ୍ରଦର୍ଶନକୁ ଦେଖାଯାଏ, ତେବେ ଦିନିକିଆ, ଟି-୨୦ ଏବଂ ଟେଷ୍ଟ ସିରିଜରେ ଦଳ ଭଲ ପ୍ରଦର୍ଶନ କରିଥିଲା।
ରୋହିତ ଶର୍ମା, ଶିଖର ଧାୱନ, କେ.ଏଲ ରାହୁଲ ଏବଂ ହାର୍ଦ୍ଦିକ ପାଣ୍ଡ୍ୟାଙ୍କ ଅଧିନାୟକତ୍ୱରେ ଭାରତ ଚଳିତ ବର୍ଷ ତିନୋଟି ଫର୍ମାଟ ଖେଳିଥିଲା। ଟିମ ଇଣ୍ଡିଆ ଚଳିତ ବର୍ଷ ମୋଟ ୭ ଟେଷ୍ଟ ମ୍ୟାଚ ଖେଳିଛି। ଏହି ସମୟରେ ଦଳ ୪ଟି ମ୍ୟାଚ ଜିତିଥିଲା। ୨୪ଟି ଦିନିକିଆ ମ୍ୟାଚ ମଧ୍ୟରୁ ୧୪ଟି ଭାରତ ଜିତିଛି। ସେହିପରି ୪୦ଟି ଟି-୨୦ ମ୍ୟାଚ ମଧ୍ୟରୁ ଭାରତ ୨୮ଟି ମ୍ୟାଚ ଜିତିଥିଲା।
ଚଳିତ ବର୍ଷ ଭାରତୀୟ କ୍ରିକେଟ୍ ଦଳର ସମାଗ୍ରିକ ପ୍ରଦର୍ଶନ ଭଲ ହୋଇଥାଇପାରେ। କିନ୍ତୁ ଅନେକ ଗୁରୁତ୍ୱପୂର୍ଣ୍ଣ ଘଟଣାରେ ଦଳ ପରାଜୟର ସମ୍ମୁଖୀନ ହୋଇଥିଲା। ଟି-୨୦ ବିଶ୍ୱକପ ୨୦୨୨ର ସେମିଫାଇନାଲରେ ଟିମ ଇଣ୍ଡିଆକୁ ପରାଜୟର ସମ୍ମୁଖୀନ ହେବାକୁ ପଡିଥିଲା। ଚଳିତ ବର୍ଷ ଦଳର ସବୁଠାରୁ ବଡ ସମସ୍ୟା ହେଉଛି ଆଘାତ। ଆହତ କାରଣରୁ ଟିମ ଇଣ୍ଡିଆର ଅନେକ ବଡ ଖେଳାଳି ବାହାରେ ରହିଥିଲେ। ଏଥିରେ ରୋହିତ ଶର୍ମା, ଜସପ୍ରୀତ ବୁମ୍ରା, ରବିନ୍ଦ୍ର ଜାଡେଜା ଏବଂ ମହମ୍ମଦ ଶାମି ସାମିଲ ଅଛନ୍ତି। ଆଘାତ ଯୋଗୁ ଏହି ଖେଳାଳିମାନେ ବଡ଼ ମ୍ୟାଚ୍ ଖେଳିପାରି ନ ଥିଲେ। ନିକଟରେ ବାଂଲାଦେଶ ବିପକ୍ଷ ଟେଷ୍ଟ ସିରିଜ ପୂର୍ବରୁ ଅଧିନାୟକ ରୋହିତ ଶର୍ମା ଆହତ ହୋଇଥିଲେ।
