ଅନୁଗୋଳ ଅଫିସ, ୧୩ା୪: ଅନୁଗୋଳ ପୌରପାଳିକାର ଏକ ବୈଠକ ବୁଧବାର ନଗରପାଳ ଅକ୍ଷୟ କୁମାର ସାମନ୍ତଙ୍କ ଅଧ୍ୟକ୍ଷତାରେ ତାଙ୍କ କାର୍ଯ୍ୟାଳୟରେ ଅନୁଷ୍ଠିତ ହୋଇଥିଲା। ତେବେ ବୈଠକ ଆରମ୍ଭରୁ ହୋହଲ୍ଲା ଦେଖିବାକୁ ମିଳିଥିଲା। ବିଶେଷକରି ବିଶିଷ୍ଟ ଗାନ୍ଧିବାଦୀ ତଥା ପୂର୍ବତନ ମୁଖ୍ୟମନ୍ତ୍ରୀ ନବକୃଷ୍ଣ ଚୌଧୁରୀଙ୍କ ତ୍ରୁଟିପୂର୍ଣ୍ଣ ପ୍ରତିମୂର୍ତ୍ତି ଘଟଣା ଓ ନଡ଼ିଆ ପିଟା ରାଜନୀତିକୁ ନେଇ ଭାଜପା କାଉନସିଲରମାନେ ନଗରପାଳଙ୍କୁ ବିରୋଧ କରିଥିଲେ। ଫଳରେ ପ୍ରତିମୂର୍ତ୍ତିରେ ହୋଇଥିବା ତ୍ରୁଟି ପାଇଁ ନଗରପାଳ କ୍ଷମା ମାଗିଥିଲେ।
ବୈଠକ ଚାଲିଥିବାବେଳେ ଶାସକ ଦଳର କାଉନସିଲରମାନେ ୫ନଂ. ଓ୍ବାର୍ଡ କାଉନସିଲରଙ୍କୁ ଘେରିଥିଲେ। ରାଜା ଛକର ଉନ୍ନତୀକରଣ ସମ୍ପର୍କରେ ସେ ନିଜସ୍ବ ମତ ରଖିବା ବଦଳରେ ବିଜେଡି କାଉନସିଲରଙ୍କ ପକ୍ଷରୁ ଗଣମାଧ୍ୟମକୁ କହିଥିବା ଘଟଣାକୁ ଶାସକ ଦଳର କାଉନସିଲରମାନେ ବିରୋଧ କରିଥିଲେ। ତେବେ ସମ୍ପୃକ୍ତ କାଉନସିଲର ଜଣକ ଏଭଳି କୌଣସି କଥା କହି ନ ଥିବା ସଫେଇ ଦେଇଥିଲେ ହେଁ ତାହାକୁ ବିଜେଡିର ଅନ୍ୟ କାଉନସିଲରମାନେ ଗ୍ରହଣ କରି ନ ଥିଲେ। ଏପରି କି ରାଜା ଛକର ଉନ୍ନୟନ କାର୍ଯ୍ୟ ପାଇଁ କାଉନସିଲ ବୈଠକରେ ଆଲୋଚନା କରାଯିବା ପରେ ରିଜୋଲେଶନ୍ ହୋଇଥିବା କାଗଜପତ୍ର ଦେଖାଇଥିଲେ। ଏହାପରେ ୫ନଂ. ଓ୍ବାର୍ଡର କାଉନସିଲର ସଫେଇ ଦେବା ବନ୍ଦ କରିବା ସହ ଚୁପ୍ ହୋଇଯାଇଥିଲେ। ସେହିପରି ସହରରେ ବର୍ଷେ ମଧ୍ୟରେ କାହିଁକି ଉନ୍ନୟନ କାର୍ଯ୍ୟ କରାଯାଇ ନାହିଁ ଓ ସ୍ବଚ୍ଛତାକୁ ନେଇ ମଧ୍ୟ କାଉନସିଲରମାନେ ପ୍ରଶ୍ନ ଉଠାଇଥିଲେ। ସହରରେ ଥିବା ସ୍ବଚ୍ଛସାଥୀମାନେ ସଚ୍ଛତା ଉପରେ ଧ୍ୟାନ ଦେଉ ନ ଥିବା କହିଥିଲେ। ତେବେ ସ୍ବଚ୍ଛ ସାଥୀଙ୍କୁ ନେଇ ଖୁବ୍ଶୀଘ୍ର ବୈଠକ କରାଯିବ ବୋଲି କୁହାଯାଇଥିଲା। ଅନ୍ୟପକ୍ଷରେ ସହରରେ ସାଧାରଣ ଲୋକଙ୍କ ପାଇଁ ଶୌଚାଳୟ ନ ହେବା ନେଇ କାଉନସିଲରମାନେ ଦୁଃଖ ପ୍ରକାଶ କରିଥିଲେ। ସହରରେ ଥିବା ସରକାରୀ ଜାଗା ଚିହ୍ନଟ କରାଯାଇ ଶୌଚାଳୟ ନିର୍ମାଣ କରିବାକୁ ସେମାନେ ପ୍ରସ୍ତାବ ଦେଇଥିଲେ। ଏ ନେଇ ନଗରପାଳ କହିଥିଲେ, ସେଣ୍ଟ୍ରାଲ ଲଜ୍ ସମ୍ମୁଖରେ ଥିବା ସରକାରୀ ଜାଗା ଚିହ୍ନଟ କରାଯାଇଥିଲା। ହେଲେ ପାଚେରି ଭାଙ୍ଗି ଜଣେ ବ୍ୟକ୍ତି ସେଠାରେ ଦୋକାନ ଦେଇଛନ୍ତି। ଏହା ଜାଣିବା ପରେ କାଉନସିଲରମାନେ ଉକ୍ତ ଦୋକାନ ଭାଙ୍ଗି ଶୌଚାଳୟ କରିବାକୁ ଦାବି କରିଥିଲେ। ଏହାପରେ ବିରୋଧୀ କାଉନସିଲରମାନେ ନଗରପାଳଙ୍କ ମନମୁଖି ଗାଡ଼ି ଉଦ୍ଘାଟନ ପ୍ରସଙ୍ଗ ଉଠାଇଥିଲେ। କାଉନସିଲରମାନଙ୍କୁ ନ ଡାକି କାହିଁକି ଉଦ୍ଘାଟନ ପର୍ବ କରାଗଲା ବୋଲି ପ୍ରଶ୍ନ କରିଥିଲେ। ଉଦ୍ଘାଟନ ନୁହେଁ କେବଳ ପୂଜା କରାଯାଇଛି ବୋଲି ନଗରପାଳ କହିବା ପରେ ବିରୋଧୀ କାଉନସିଲରମାନେ ଜୋରଦାର ବିରୋଧ କରିଥିଲେ। ଏହାପରେ ସହରରେ ଥିବା ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା ହୋଇଥିଲା। ଏହି ବୈଠକରେ ଅନୁଗୋଳ ପୌର ଉପାଧ୍ୟକ୍ଷା ଅନୁପମା ସାହୁ, ନିର୍ବାହୀ ଯନ୍ତ୍ରୀ ରବିନ ଦାସ, ଅଟଳ ଦେବତାଙ୍କ ସହ ସମସ୍ତ କାଉନସିଲର ଉପସ୍ଥିତ ଥିଲେ।