ମାୟାନଗରି ମୁମ୍ବାଇ। ଅନେକ ନବାଗତଙ୍କ ସ୍ବପ୍ନକୁ ପୂରଣ କରିଛି ଏହି ସହର। ହେଲେ ଅଭିନେତା ହିସାବରେ ସଫଳ ହେବା ପରେ ମଧ୍ୟ ମୁମ୍ବାଇ ଛାଡ଼ି ଚାଲିଯିବାକୁ ବାଧ୍ୟ ହୋଇଛନ୍ତି। ନିକଟରେ ଅଭିନେତା ସୁଶାନ୍ତ ସିଂ ରାଜପୁତ ମୃତ୍ୟୁ ମାମଲାର ଯାଞ୍ଚ ଚାଲିଥିବା ବେଳେ ସେ ବଲିଉଡ୍ ଛାଡ଼ିବାକୁ ଚାହୁଁଥିବା କଥା ସାମ୍ନାକୁ ଆସିଥିଲା। ଏପରିକି ସେ କେରଳରେ ନିଜର ବ୍ୟବସାୟ ସୁଦୃଢ଼ କରିବାକୁ ଚାହୁଁଥିବା ଚର୍ଚ୍ଚାର ବିଷୟ ପାଲଟିଥିଲା। ତେବେ କେବଳ ଯେ ସୁଶାନ୍ତ ତାହା ନୁହେଁ ଅନେକ ବଲିଉଡ୍ କଳାକାର ଫିଲ୍ମର ମୋହ ତ୍ୟାଗ କରି ବଲିଉଡ୍ରୁ ନିଜକୁ ଦୂରେଇ ନେବାର ନଜିର ରହିଛି।
୭୦ ଦଶକର ଖ୍ୟାତନାମା ଅଭିନେତା ବିନୋଦ ଖାନ୍ନା ନିଜ କ୍ୟାରିୟରର ଶ୍ରେଷ୍ଠ ସମୟରେ ଫିଲ୍ମରୁ ଦୂରେଇ ଯାଇଥିଲେ। ପରେ ସେ ଓଶୋଙ୍କ ଆଶ୍ରମକୁ ଚାଲିଯାଇଥିଲେ।
ରାଖୀଙ୍କୁ ବିବାହ କରିବା ପୂର୍ବରୁ ଫିଲ୍ମଜଗତ ଛାଡ଼ିବା ପାଇଁ ଗୁଲଜାର ସର୍ତ୍ତ ରଖିଥିଲେ। ରାଖୀ ସେଭଳି କରିଥିଲେ ମଧ୍ୟ। ବିବାହ ପରେ ସେ ଫିଲ୍ମରୁ ଦୂରେଇ ଯାଇଥିବା ବେଳେ ପରେ ସେ ମା’ ଭୂମିକାରେ ନଜର ଆସିଥିଲେ।
ଫିଲ୍ମ ଦଙ୍ଗଲ ଏବଂ ସିକ୍ରେଟ ସୁପରଷ୍ଟାର ଭଳି ଫିଲ୍ମରେ ଚମତ୍କାର ଅଭିନୟ କରିଥିଲେ ଜାୟରା ବସୀମ। ୨୦୧୯ରେ ସେ ଅଚାନକ ବଲିଉଡ୍ ଛାଡ଼ିବାକୁ ଘୋଷଣା କରିଥିଲେ। ବ୍ୟକ୍ତିଗତ କାରଣକୁ ନେଇ ସେ ଏପରି କରୁଥିବା କହିଥିଲେ।
ଭାଗମ୍ ଭାଗ ଏବଂ ଢ଼ୋଲ ଭଳି ଫିଲ୍ମରେ ନିଜର ଅଭିନୟ ଯୋଗୁ ପ୍ରଶଂସକଙ୍କ ହୃଦୟ ଜିତିପାରିଥିଲେ ତନୁଶ୍ରୀ ଦତ୍ତା। ହେଲେ ପରେ ସେ ବଲିଉଡ୍ରୁ ଦୂରେଇ ଯାଇଥିଲେ। ୨୦୧୦ରେ ଆସିଥିବା ଫିଲ୍ମ ଆପାର୍ଟମେଣ୍ଟରେ ତାଙ୍କୁ ଶେଷ ଥର ପାଇଁ ଅଭିନୟ କରିଥିବା ଦେଖାଯାଇଥିଲା।
ସଫଳ ସୋପାନରେ ଥିବା ବେଳେ ପୂର୍ବ ବିଶ୍ୱସୁନ୍ଦରୀ ସୁଷ୍ମିତା ସେନ୍ ହଠାତ୍ ବଲିଉଡ୍କୁ ବାଏ ବାଏ କରିଥିଲେ। ହେଲେ ଏବେ ଓଟିଟି ପ୍ଲାର୍ଟଫର୍ମକୁ ସେ ଫେରିଛନ୍ତି।
୨୦୦୧ରେ ବଲିଉଡ୍ ଫିଲ୍ମ ‘ଷ୍ଟାଇଲ୍’ ଜରିଆରେ ଡେବ୍ୟୁ କରିଥିବା ସାହିଲ ଖାନ୍ ଶରମନ ଜୋଶୀଙ୍କ ସହ ଲୋକପ୍ରିୟ ହୋଇଯାଇଥିଲେ। ତାଙ୍କର ପ୍ରଥମ ଚଳଚ୍ଚିତ୍ର ସୁପରହିଟ୍ ହୋଇଥିଲା। ହେଲେ ପରେ ବଲିଉଡ୍ରେ ତାଙ୍କ କ୍ୟାରିଅର ସେତେଟା ଭଲ ନ ଥିଲା। ଫଳରେ ସେ ଫିଲ୍ମଦୁନିଆକୁ ଛାଡ଼ି ଦେଇଥିଲେ।
