ମୋଗା,୨୩।୪ : ଖାଲିସ୍ତାନର ସମର୍ଥକ ତଥା ‘ୱାରିସ ପଞ୍ଜାବ ଡେ’ର ମୁଖ୍ୟ ଅମୃତପାଲ ସିଂଙ୍କୁ ଶେଷରେ ପୋଲିସ ଗିରଫ କରିଛି। ପଞ୍ଜାବ ପୋଲିସ ପଳାତକ ଅମୃତପାଲ ସିଂଙ୍କୁ ମୋଗାର ଗୁରୁଦ୍ୱାରାରୁ ଗିରଫ କରିଛି। ଅମୃତପାଲ ମାର୍ଚ୍ଚ ୧୮ ଠାରୁ ଫେରାରଥିଲେ। ପୋଲିସ ତାଙ୍କ ଚାଚା ଏବଂ ଅନେକ ସହଯୋଗୀଙ୍କୁ ଗିରଫ କରିଛି।
ଅମୃତପାଲଙ୍କ ଗିରଫଦାରୀକୁ ପଞ୍ଜାବ ପୋଲିସ ପକ୍ଷରୁ ନିଶ୍ଚିତ କରାଯାଇଛି। ଏନେଇ ଶାନ୍ତି ବଜାୟ ରଖିବାକୁ ପୋଲିସ ଲୋକଙ୍କୁ ନିବେଦନ କରିଛି। ଏହା ସହିତ ଲୋକଙ୍କୁ ସୋସିଆଲ ମିୀଡ଼ିଆରେ ମିଥ୍ୟା ଖବର ଶେୟାର ନକରିବାକୁ ମଧ୍ୟ କୁହାଯାଇଛି।
କୁହାଯାଉଛି, ଅମୃତପାଲଙ୍କୁ ଆସାମର ଡିବ୍ରୁଗଡକୁ ନିଆଯିବ। ତାଙ୍କୁ ଦିବ୍ରୁଗଡରେ ପଚରାଉଚରା କରାଯିବ। ଅମୃତପାଲଙ୍କୁ ଗିରଫ କରାଯାଉଥିବା ଫଟୋ ମଧ୍ୟ ସାମ୍ନାକୁ ଆସିଛି। କେତେକ ନ୍ୟୁଜ ଏଜେନ୍ସି ପକ୍ଷରୁ ଅମୃତପାଲଙ୍କ ନୂଆ ଫଟୋ ଶେୟାର କରାଯାଇ ଟୁଇଟ ହୋଇଛି।
ଗିରଫ ପୂର୍ବରୁ ଅମୃତପାଲ ସିଂଙ୍କୁ ରୋଡେୱାଲା ଗୁରୁଦ୍ୱାରରେ ଦେଖିବାକୁ ମିଳିଥିଲା। ଏହା ପରେ ମୁକ୍ତସର ପୋଲିସ ତାଙ୍କୁ ନିଜ ହେପାଜତକୁ ନେଇଥିଲେ। ଏହି ଭିଡିଓ ରବିବାର ଭୋର ୪ ଟା ସମୟର ବୋଲି କୁହାଯାଉଛି। ମାର୍ଚ୍ଚ ୧୮ ଠାରୁ ସେ ଫେରାର ଥିଲେ। ତାଙ୍କ ସନ୍ଧାନରେ ଅନେକ ସ୍ଥାନରେ ଚଢ଼ାଉ ମଧ୍ୟ କରାଯାଇଥିଲା। ଉଲ୍ଲେଖନୀୟ କଥା ହେଉଛି, ଫେବୃଆରୀ ୨୩ ରେ ଅମୃତପାଲ ଏବଂ ତାଙ୍କ ସମର୍ଥକମାନେ ସହକର୍ମୀ ଲଭପ୍ରୀତ ତୁଫାନଙ୍କୁ ମୁକ୍ତ କରିବାକୁ ଦାବି କରି ଅଜନାଲା ପୋଲିସ ଷ୍ଟେଶନରେ ଅସ୍ତ୍ରଶସ୍ତ୍ର ସହିତ ଆକ୍ରମଣ କରିଥିଲେ। ଏହି ଘଟଣାରେ ବହୁ ପୋଲିସ କର୍ମଚାରୀ ଆହତ ହୋଇଥିଲେ।
ଅମୃତପାଲ ଗିରଫ ହେବା ପୂର୍ବରୁ ତାଙ୍କ ସ୍ତ୍ରୀ କିରଣଦୀପ କୌରଙ୍କୁ ପୋଲିସ ଅମୃତସର ବିମାନ ବନ୍ଦରରୁ ଗିରଫ କରିଥିଲା। କିରଣଦୀପ ଏୟାର ଇଣ୍ଡିଆ ବିମାନରେ ବର୍ମିଂହାମ ଅଭିମୁଖେ ଯାତ୍ରା କରିବାକୁ ଯାଉଥିଲେ। ଇମିଗ୍ରେଶନ ଅଧିକାରୀମାନେ ତାଙ୍କୁ ଯାତ୍ରା କରିବାକୁ ଅନୁମତି ଦେଇ ନ ଥିଲେ ଏବଂ ତାଙ୍କୁ ଗିରଫ କରିଥିଲେ।