ନବରଙ୍ଗପୁର,୫।୫(ବି.ପ୍ର.): ହାଇସ୍କୁଲଗୁଡ଼ିକୁ ୫-ଟି ଅଧୀନରେ ରୂପାନ୍ତରଣ କରାଯାଉଛି। କିନ୍ତୁ ଅଧା କାମ କରି ପୂରା ବିଲ୍ ହୋଇଯାଇଥିବା ଭଳି ଅଭିଯୋଗ ନବରଙ୍ଗପୁର ଜିଲାରୁ ଆସିଛି। ନବରଙ୍ଗପୁରର ଚେରଚେଟା ସରକାରୀ ଉଚ୍ଚ ବିଦ୍ୟାଳୟରେ ଚାଲିଥିବା ରୂପାନ୍ତରଣ କାମ ଶେଷ ହୋଇ ନ ଥିବା ବେଳେ ବିଲ୍ କରାଯାଇଥିବା ନେଇ ଅଭିଯୋଗ ହୋଇଛି।
ଉକ୍ତ ବିଦ୍ୟାଳୟକୁ ପଞ୍ଚାୟତ ଅନୁଦାନ ୧୫ଲକ୍ଷ, ମୋ ସ୍କୁଲ ଅଭିଯାନରୁ ୨୦ଲକ୍ଷ ଓ ଏମ୍ଜିଏନ୍ଆର୍ଇଜିଏସ୍ ଯୋଜନାରୁ ୧୦ଲକ୍ଷ ଟଙ୍କା ଖର୍ଚ୍ଚରେ ରୂପାନ୍ତରିତ କରାଯାଇଛି। ମୁଖ୍ୟମନ୍ତ୍ରୀ ଉକ୍ତ ବିଦ୍ୟାଳୟକୁ ଦ୍ୱିତୀୟ ପର୍ଯ୍ୟାୟରେ ଉଦ୍ଘାଟନ କରିଥିଲେ। କିନ୍ତୁ ସ୍କୁଲ ବଗିଚା, ଶୌଚାଳୟ, ପରିସ୍ରାଗାର ଆଦି କାର୍ଯ୍ୟ ଏବେ ସୁଦ୍ଧା ସରିନାହିଁ। ପାହାଚ କାମ ମଧ୍ୟ ଅଧାପନ୍ତରିଆ ପଡ଼ି ରହିଛି। ପାଣି ଟ୍ୟାପ୍ଗୁଡ଼ିକ କାମ କରୁନାହିଁ। ଏଥିସହ ଯାହାବି କାମ ହୋଇଛି ତାହା ମଧ୍ୟ ନିମ୍ନମାନର ବୋଲି ଅଭିଯୋଗ ଆସିଛି। ସ୍କୁଲ କାମରେ ବ୍ୟବହୃତ ହୋଇଥିବା ରଙ୍ଗର ମାନ ଖରାପ ଥିବାରୁ ସେଗୁଡ଼ିକ ଛାଡ଼ିଗଲାଣି। ବିଦ୍ୟାଳୟ କୋଠାକୁ ପ୍ରବେଶ କରୁଥିବା ଦ୍ୱାର ପାହାଚରେ ଏବେ ସୁଦ୍ଧା ପ୍ଲେଟ୍ ପଡ଼ିଲା ନାହିଁ। ଲଗାଯାଇଥିବା ସିସି କ୍ୟାମେରା ବେଳେବେଳେ କାମ କରୁନାହିଁ। ଛାତ୍ରୀଙ୍କ ପାଇଁ ଉଦ୍ଦିଷ୍ଟ ପରିସ୍ରାଗାରର କବାଟ କ୍ଳାମ୍ପ ଉପୁଡ଼ିପଡ଼ିଛି। ଏ ନେଇ ପ୍ରଧାନ ଶିକ୍ଷୟିତ୍ରୀ ଡିଇଓ, ପାପଡ଼ାହାଣ୍ଡି ବିଡିଓଙ୍କ ଦୃଷ୍ଟି ଆକର୍ଷଣ କରିବା ପରେ ମଧ୍ୟ ଏ ଦିଗରେ କେହି ଦୃଷ୍ଟି ଦେଲେନାହିଁ। ଲକ୍ଷାଧିକ ଟଙ୍କା ବ୍ୟୟର ଉନ୍ନୟନ କାର୍ଯ୍ୟ ବିନା ଟେଣ୍ଡରରେ ହୋଇଥିବା ଓ ଅଧାକାମରେ ସମ୍ପୂର୍ଣ୍ଣ ବିଲ୍ ହୋଇଯିବା ନେଇ ବୁଦ୍ଧିଜୀବୀ ପ୍ରଶ୍ନ ଉଠଇଛନ୍ତି। ସରକାରୀ ଅର୍ଥର ସଦୁପଯୋଗ ନ ହୋଇ କେତେକ କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ଦର୍ଶାଇ ବିଲ୍ ହୋଇଯିବା ବିଡ଼ମ୍ବନର ବିଷୟ ବୋଲି ବୁଦ୍ଧିଜୀବୀ କହିଛନ୍ତି। ଜିଲାପାଳ ଏ ଦିଗରେ ଦୃଷ୍ଟି ଦେଇ କାର୍ଯ୍ୟାନୁଷ୍ଠାନ ନିଅନ୍ତୁ ବୋଲି ଦାବି ହୋଇଛି। ଉକ୍ତ ବିଦ୍ୟାଳୟ କାର୍ଯ୍ୟ ପାଇଁ ନିୟୋଜିତ ଥିବା କନିଷ୍ଠ ଯନ୍ତ୍ରୀ ଗୁଣନିଧି କୁମୁଡାଙ୍କୁ ପଚାରିବାରୁ ସେ ଏହି ଘଟଣାକୁ ସ୍ବୀକାର କରିଛନ୍ତି। ବଳକା କାମ ଜଲ୍ଦି କରାଯିବ ବୋଲି ସେ କହିଛନ୍ତି।