ଭୁବନେଶ୍ୱର,୩୦।୧୦(ବ୍ୟୁରୋ): ଶୀତ ଆଗମନ ସହ ଆରମ୍ଭ ହୋଇଛି ପର୍ଯ୍ୟଟନର ଋତୁ। ଏଭଳି ସମୟରେ କୋଭିଡ୍ କଟକଣା ମଧ୍ୟରେ ପର୍ଯ୍ୟଟନ ସ୍ଥଳୀଗୁଡିକରେ ପର୍ଯ୍ୟଟକଙ୍କ ଗହଳି ଚହଳି ମଧ୍ୟ ଦେଖିବାକୁ ମିଳୁଛି। ପୁରୀ, ଗୋପାଳପୁର, ଚାନ୍ଦବଲି, ଚନ୍ଦ୍ରଭାଗା ଆଦି ସମୁଦ୍ରକୂଳର ମଜାନେବା ସହ ଓଡ଼ିଶାର କଶ୍ମୀର କୁହାଯାଉଥିବା ଦାରିଙ୍ଗବାଡିର ପ୍ରାକୃତିକ ଶୋଭାକୁ ଉପଭୋଗ କରିବାକୁ ପର୍ଯ୍ୟଟକଙ୍କ ଆକର୍ଷଣ ବଢ଼ିଛି। ଏହାକୁ ଦୃଷ୍ଟିରେ ରଖି ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ଚଳିତବର୍ଷ କରୋନା ପାଇଁ ଲୋକେ ରାଜ୍ୟ ଓ ଦେଶ ବାହାରକୁ ଯିବାକୁ ଭୟ କରୁଥିବାରୁ ଓଡ଼ିଶାରେ ରହି କିଭଳି ଏଥର ଶୀତକୁ ଉପଭୋଗ କରିପାରିବେ ସେଥିପାଇଁ କେତେକ ପଦକ୍ଷେପ ହାତକୁ ନିଆଯାଇଛି। ପ୍ରାକୃତିକ ସୌନ୍ଦର୍ଯ୍ୟର ମଜାନେବା ଓ ସାଙ୍ଗସାଥୀଙ୍କ ମେଳରେ ମଉଜମସ୍ତି କରିବା ଲାଗି ଚଳିତବର୍ଷ ପ୍ରଥମଥର ପାଇଁ ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି) ପକ୍ଷରୁ ବଣଭୋଜି ପ୍ୟାକେଜ୍ର ବ୍ୟବସ୍ଥା କରାଯାଇଛି। ଘରୋଇ ପର୍ଯ୍ୟଟକଙ୍କ ପାଇଁ ଏଭଳି ବ୍ୟବସ୍ଥା କରିଛି ଓଟିଡିସି। ପ୍ରାରମ୍ଭିକ ପର୍ଯ୍ୟାୟରେ ଭୁବନେଶ୍ୱର ଉପକଣ୍ଠ ଚନ୍ଦକା, ଡେରାସ, ଗୋଡ଼ିବାରି ଏବଂ ଭିତରକନିକା ଜାତୀୟ ଉଦ୍ୟାନର ଡାଙ୍ଗମାଳ ଓ ସାତକୋଶିଆର ବଡ଼ମୂଳ ପାଇଁ ବଣଭୋଜି ପ୍ୟାକେଜର ସୁବିଧା ଉପଲବ୍ଧ ହୋଇଛି।
ଚନ୍ଦକା, ଡେରାସ ଓ ଗୋଡ଼ିବାରି ପ୍ୟାକେଜ୍ରେ ପର୍ଯ୍ୟଟକମାନେ କୋଭିଡ୍ ଗାଇଡ୍ଲାଇନକୁ ପାଳନ କରି ଚନ୍ଦକା ଜଙ୍ଗଲରେ ଓପନ୍ ଜିପ୍ ସଫାରୀ, ସାଇକେଲିଂ ଓ ଟ୍ରେକିଂ ଆଦିର ଅନୁଭୂତି ନେଇପାରିବେ। ଏହି ପ୍ୟାକେଜ୍ରେ ପର୍ଯ୍ୟଟକଙ୍କୁ ସକାଳ ଜଳଖିଆଠାରୁ ଆରମ୍ଭ କରି ମଧ୍ୟାହ୍ନଭୋଜନ, ଚା’ କଫି ଆଦି ମିଳିବ। ଗୋଟିଏ ଥରରେ ଅତିବେଶିରେ ୬ଜଣ ଏଥିରେ ବୁକିଂ କରିପାରିବେ। ସେହିଭଳି ଡାଙ୍ଗମାଳ ବଣଭୋଜି ପ୍ୟାକେଜରେ ପର୍ଯ୍ୟଟକ ଓଟିଡିସି ପକ୍ଷରୁ କରାଯାଇଥିବା ଅତିଥିନିବାସରେ ଖାଇବା ସହ ଜଙ୍ଗଲ ଟ୍ରେକିଂ ଓ ବୋଟିଂର ମଜା ପାଇପାରିବେ। ସାତକୋଶିଆ ବଡ଼ମୂଳଠାରେ ଜଣେ ପର୍ଯ୍ୟଟକଙ୍କୁ ଖାଦ୍ୟପେୟ ସହ ଯାତାୟାତ ସୁବିଧା, ସାଇକେଲିଂ, ଟ୍ରେକିଂ, ବୋଟିଂ, କେନୋପି ୱାକ୍ ଆଦିର ଅନୁଭୂତି ମିଳିପାରିବ।
ଅନ୍ୟପକ୍ଷରେ କୋଣାର୍କ ପରେ ଏବେ ରାଜ୍ୟର ଆଉ ୫ ସ୍ଥାନରେ ଇକୋ ରିଟ୍ରିଟ୍ କରିବାକୁ ସ୍ଥିର ହୋଇଛି। ଭିତରକନିକା, ରାମଚଣ୍ଡୀ, ସାତକୋଶିଆ, ଦାରିଙ୍ଗବାଡ଼ି, ହୀରାକୁଦରେ ଇକୋ ରିଟ୍ରିଟ୍ କରାଯିବା ନେଇ ପର୍ଯ୍ୟଟନ ସଚିବ ବିଶାଲ୍ ଦେବ ସୂଚନା ଦେଇଛନ୍ତି। ସାତକୋଶିଆର ବଡ଼ମୂଳ ଏବଂ ଭିତରକନିକାର ନଳିତାପାଟିଆଠାରେ ଇକୋ ରିଟ୍ରିଟ୍ କରାଯିବ। ଡିସେମ୍ବର ୧ରୁ ୨୦୨୧ ଫେବୃୟାରୀ ୨୮ ମଧ୍ୟରେ ଏହିସବୁ ସ୍ଥାନରେ ମେଗା ଇଭେଣ୍ଟ ଆୟୋଜିତ ହେବ। ପର୍ଯ୍ୟଟକଙ୍କ ରହଣି ପାଇଁ ଗ୍ଲାମ୍ପିଂ (ଅତ୍ୟାଧୁନିକ ତଥା ଆମୋଦଦାୟକ ରହଣି) ସହ ବିଭିନ୍ନ ଆକ୍ଟିଭିଟିର ଆୟୋଜନ କରାଯିବ। ଏହାସାଙ୍ଗକୁ ସାଂସ୍କୃତିକ କାର୍ଯ୍ୟକ୍ରମ ଓ ମ୍ୟୁଜିକାଲ୍ ନାଇଟ୍ ପ୍ରମୁଖ ଆକର୍ଷଣ ସାଜିବ। ଏହାଦ୍ୱାରା ଚଳିତ ପର୍ଯ୍ୟଟନ ଋତୁରେ ଅଧିକ ପର୍ଯ୍ୟଟକଙ୍କୁ ଆକୃଷ୍ଟ କରିହେବ ଏବଂ ନଇଁ ପଡ଼ିଥିବା ପର୍ଯ୍ୟଟନ ଶିଳ୍ପକୁ ଉପରକୁ ଉଠାଇ ହେବ ବୋଲି ବିଭାଗ ପକ୍ଷରୁ କୁହାଯାଇଛି।
ଏହାବାଦ୍ ‘ଓଡ଼ିଶା ବାଇ ରୋଡ୍’ କ୍ୟାମ୍ପେନ୍ ଅଧୀନରେ ଓଡ଼ିଶାର ଗ୍ରାମାଞ୍ଚଳ ପର୍ଯ୍ୟଟନର ପ୍ରଚାର ପ୍ରସାରକୁ ଲକ୍ଷ୍ୟ ରହିଛି। ପର୍ଯ୍ୟଟକମାନେ ସମୁଦ୍ରରେ ସ୍ନାନ କରିବା ସମୟରେ ସେମାନଙ୍କ ସୁରକ୍ଷା ଉପରେ ଗୁରୁତ୍ବ ଦେବାକୁ କୁହାଯାଇଛି। ଏହାସହ ରାଜ୍ୟର ସମସ୍ତ ୩୫୦ ପର୍ଯ୍ୟଟନସ୍ଥଳୀରେ ପର୍ଯ୍ୟଟକଙ୍କୁ ଆନୁଷଙ୍ଗିକ ସୁବିଧା ସୁଯୋଗ ଯୋଗାଇ ଦେବା ସହ ପର୍ଯ୍ୟଟକମାନେ କୌଣସି ପ୍ରକାର ଅସୁବିଧାର ସମ୍ମୁଖୀନ ହେଲେ ସ୍ଥାନୀୟ ପୋଲିସ ତୁରନ୍ତ ସହାୟତା କରିବାକୁ ମଧ୍ୟ ନିର୍ଦ୍ଦେଶ ରହିଛି।