ଆଳି,୨୩।୩(ଡି.ଏନ.ଏ.): ରାଜ୍ୟ ସରକାର ଗରିବଙ୍କ ପାଇଁ ବିଜୁ ସ୍ବାସ୍ଥ୍ୟ କଲ୍ୟାଣ କାର୍ଡ ଯୋଗାଇ ଦେଇଛନ୍ତି। ସ୍ବାସ୍ଥ୍ୟ କାର୍ଡ ନ ଥିବାରୁ ଜଣେ ଦୁଇ ମାସର ଶିଶୁପୁତ୍ରଙ୍କ ଚିକିତ୍ସା ନିମନ୍ତେ ପରିବାର ଲୋକେ ଅସୁବିଧା ଭୋଗୁଛନ୍ତି। ଏଭଳି ଦୃଶ୍ୟ ଆଳି ବ୍ଲକ ସଦର ପଞ୍ଚାୟତ ଦେମାଳରେ ଦେଖିବାକୁ ମିଳିଛି । ବଳରାମ ନାୟକଙ୍କ ଶିଶୁପୁତ୍ର ଗୌରବଙ୍କ ଚିକିତ୍ସାରେ ଏବେ ଅର୍ଥ ବାଧକ ସାଜିଛି। ତାଙ୍କ ପରିବାର କହିଲେ, ସ୍ତ୍ରୀ ବିନି, ମା’ ଭାରତୀ, ୬ ବର୍ଷର ପୁଅ କୌଶଭ ଓ ପୁଅ ଗୌରବ। ଜେଜେ ମା’ ଭାରତୀ କୁହନ୍ତି, ବୋହୂର ଗର୍ଭରେ ଶିଶୁ ଥିବାବେଳେ ନାଡ଼ ଗୁଡେଇ ହୋଇ ରହିଥିଲା। ଡାକ୍ତର ଅପରେଶନ କରି ତାକୁ ଜନ୍ମ ଦେଇଥିଲେ। ଗୌରବ ଜନ୍ମ ହେବା ପରେ ଠିକ୍ ଭାବେ ନିଃଶ୍ୱାସ ନେବାରେ କଷ୍ଟ ଅନୁଭବ କରିବା ସହ ପେଟ ଫମ୍ପେଇ ରହୁଛି। ବାପା ବଳରାମ ପୁଅକୁ ଆଳି ସ୍ବାସ୍ଥ୍ୟକେନ୍ଦ୍ରଠାରୁ ଆରମ୍ଭ କରି କେନ୍ଦ୍ରାପଡ଼ା ଜିଲା ମୁଖ୍ୟ ଚିକିତ୍ସାଳୟରେ ଡାକ୍ତରଙ୍କୁ ଦେଖାଇଥିଲେ ମଧ୍ୟ ଗୌରବଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିନାହିଁ। ବଳରାମ ଦିନ ମଜୁରିଆ ହୋଇଥିବା ବେଳେ ପୁଅଙ୍କ ଚିକିତ୍ସା ନିମନ୍ତେ କେଉଁଠୁ ଅର୍ଥ ଆଣିବେ ସେ ନେଇ ସେ ଚିନ୍ତାରେ ପଡିଛନ୍ତି। ସରକାରଙ୍କ ପକ୍ଷରୁ ତାଙ୍କ ପରିବାରକୁ ରାଶନ କାର୍ଡ ମିଳିଛି କିନ୍ତୁ ସ୍ବାସ୍ଥ୍ୟ କାର୍ଡ ମିଳିଥିଲେ ଶିଶୁ ପୁତ୍ରଙ୍କ ଚିକିତ୍ସା ସୁବିଧାରେ ହୋଇଥାନ୍ତା ବୋଲି ବଳରାମ କହିଛନ୍ତି। ବିଡିଓ ଦ୍ୱିବେନ୍ଦୁ ଦାସ କହିଛନ୍ତି, ଶିଶୁଟିର ଚିକିତ୍ସା ନିମନ୍ତେ ଜିଲା ସାମାଜିକ ସୁରକ୍ଷା ବିଭାଗ ସମେତ ରେଡ଼କ୍ରସ, ମୁଖ୍ୟମନ୍ତ୍ରୀ ରିଲିଫ ଫଣ୍ଡରୁ ଆର୍ଥତ୍କ ସହାୟତା ଯୋଗାଇ ଦେବାକୁ ସେ ବ୍ୟବସ୍ଥା କରିବେ ବୋଲି ପ୍ରତିଶ୍ରୁତି ଦେଇଛନ୍ତି।