![](https://www.dharitri.com/wp-content/uploads/2024/04/elephant.png)
ଚେନ୍ନାଇ: ତାମିଲନାଡୁ ସରକାରଙ୍କ ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗର ଅତିରିକ୍ତ ମୁଖ୍ୟ ସଚିବ ସୁପ୍ରିୟା ସାହୁ ନିଜ ଏକ୍ସ’ ଆକାଉଣ୍ଟରେ ୨ ହାତୀଙ୍କ ହୃଦୟସ୍ପର୍ଶୀ କାହାଣୀକୁ ଶେୟାର କରିଛନ୍ତି। ସୁପ୍ରିୟାଙ୍କ ପୋଷ୍ଟରେ ଏହି କାହାଣୀକୁ ଶୁଣିବା ପରେ ଅନେକ ଏକ୍ସ’ ୟୁଜର୍ସଙ୍କ ସହ ବନ୍ୟଜନ୍ତୁ ପ୍ରେମୀମାନେ ଖୁସିରେ ଭାବ ବିହ୍ବଳ ହୋଇପଡ଼ିଛନ୍ତି। ଏହି ପୋଷ୍ଟରେ ସୁପ୍ରିୟା ୨ ହାତୀ ଭାମା ଏବଂ କାମାଚିଙ୍କ ଭିଡିଓ ଶେୟାର କରି, ସେମାନେ ଗତ ୫୫ ବର୍ଷ ଧରି ଭଲ ବନ୍ଧୁ ଥିବା ଦର୍ଶାଇଛନ୍ତି।
ମଣିଷ ପରି ଏହି ୨ ହାତୀ ମଧ୍ୟ ବନ୍ଧୁତ୍ୱର ମଧୁର ବନ୍ଧନକୁ ପାଳନ କରୁଥିବା ଭିଡିଓରେ ଆଇଏଏସ୍ ଅଧିକାରୀ ସୁପ୍ରିୟା ସାହୁ କହିଛନ୍ତି। ତାମିଲନାଡୁର ମୁଦୁମଲାଇ, ଥେପାକାଡୁର ଏକ ହାତୀ ଶିବିରରେ ରହୁଥିବା ୨ ହାତୀ ଭାମା (୭୫) ଏବଂ କାମାଚି (୬୫) ଗତ ୫୫ ବର୍ଷ ଧରି ବନ୍ଧୁତ୍ୱର ନିବିଡ଼ ସମ୍ପର୍କକୁ ପାଳନ କରି ଆସୁଥିବା ସେ କହିଛନ୍ତି। ଉଭୟ ଭାମା ଏବଂ କାମଚି ପ୍ରକୃତରେ ସାହସୀ, ବିଶ୍ୱସ୍ତ ଏବଂ ସ୍ନେହୀ ହୋଇଥିବା ସୁପ୍ରିୟା ନିଜ ପୋଷ୍ଟରେ କହିଛନ୍ତି।
ଏକଦା ଉଭୟ ହାତୀଙ୍କୁ ଦେଖାଶୁଣା କରୁଥିବା ମାହୁନ୍ତ ଥିରୁ ଗୋପନ୍ ଭାମାକୁ ଜଙ୍ଗଲ ଚରାଇବା ପାଇଁ ନେଇଥିବା ବେଳେ ଚିତାବାଘ ଥିରୁଙ୍କୁ ଆକ୍ରମଣ କରିଥିଲା। ସେତେବେଳେ ଭାମା ଏକାକୀ ଚିତାବାଘକୁ ତଡ଼ି ଦେଇ ଥିରୁଙ୍କ ଜୀବନ ରକ୍ଷା କରିପାରିଥିବା ସୁପ୍ରିୟା କହିଛନ୍ତି। ସେହିପରି କାମାଚିକୁ ମଧ୍ୟ ଏକଦା ଏକ ଶିକାରୀ ଆକ୍ରମଣ କରିଥିଲା। ଏହି ଆକ୍ରମଣରେ କାମାଚିର କ୍ଷତ ଭଲ ହେବା ପାଇଁ ଅନେକ ବର୍ଷ ସମୟ ଲାଗି ଯାଇଥିଲା। ତେବେ ପାଖରେ ବନ୍ଧୁ ଭାମା ଥିବାରୁ ସେ ସବୁକିଛି ସହିଯାଇଥିବା ସୁପ୍ରିୟା କହିଛନ୍ତି। ସେହିପରି ଶିବିରରେ ଭୋଜନ ସମୟରେ ମଧ୍ୟ ଉଭୟ ଭାମା ଏବଂ କାମାଚି ପରସ୍ପର ପାଖରେ ଛିଡା ହୋଇ ଖାଇଥାନ୍ତି। ଉଭୟ ହାତୀଙ୍କୁ ଆଖୁ ଖାଇବାକୁ ବେଶ୍ ପସନ୍ଦ। ତେବେ ୨ ହାତୀ ସବୁବେଳେ ଏକାଠି ରହୁଥିବାରୁ ଉଭୟଙ୍କୁ ଗୋଟିଏ ଆଖୁ ଦେବାକୁ ଶିବିରର କେହି ମଧ୍ୟ ସାହସ କରିପାରନ୍ତି ନାହିଁ। ଉଭୟ ଭାମା ଓ କାମାଚିଙ୍କୁ ଅଲଗା ଅଲଗା ଆଖୁ ଦେବାକୁ ପଡିବ ବୋଲି ସମସ୍ତେ ଜାଣିଥିବା ସୁପ୍ରିୟା କହିଛନ୍ତି।
ମୁଦୁ ମଲାଇରେ ଥିବା ଏହି ହାତୀ ଶିବିର ଏସିଆର ସର୍ବ ପୁରାତନ ହାତୀ ଶିବିର ମଧ୍ୟରୁ ଅନ୍ୟତମ ହୋଇଥିବା ସୁପ୍ରିୟା କହିଛନ୍ତି। ଏହି ଶିବିରରେ ଭାମା ଓ କାମାଚିଙ୍କ ସମେତ ସମୁଦାୟ ୨୭ଟି ହାତୀଙ୍କର ଠିକ୍ ଭାବେ ଯତ୍ନ ନିଆଯାଉଥିବାରୁ କ୍ୟାମ୍ପ ପରିଚାଳନା କର୍ତ୍ତୃପକ୍ଷଙ୍କୁ ସେ ପ୍ରଶଂସା କରିଛନ୍ତି। ସୋସିଆଲ ମିଡିଆ ୟୁଜର୍ସମାନେ ଭାମା ଏବଂ କାମାଚିଙ୍କ ବନ୍ଧୁତ୍ୱ ବିଷୟରେ ଜାଣି ବେଶ୍ ଖୁସିବ୍ୟକ୍ତ କରିଛନ୍ତି।