ନୂଆଦିଲ୍ଲୀ: କରୋନା ମହାମାରୀ ଲକଡାଉନ ଯୋଗୁ ଘରୋଇ ବଜାରରେ ବିଭିନ୍ନ ଷ୍ଟୋର ବନ୍ଦ କରାଯାଇଥିଲା। ଲକଡାଉନର ପ୍ରାୟ ୪ ମାସରେ କଟକଣା ଯୋଗୁ ଫ୍ୟୁଚର ଗ୍ରୁପ ପ୍ରାୟ ୭ ହଜାର କୋଟି ଟଙ୍କା କ୍ଷତି ସହିଥିବା ଜଣାପଡିଛି। କୋଭିଡ ଫାସରେ ଫସିବା ଯୋଗୁ ବାଧ୍ୟ ହୋଇ ଫ୍ୟୁଚର ଗ୍ରୁପର ହୋଲ୍ସେଲ ଏବଂ ଲଜିଷ୍ଟିକ ବିଜନେସକୁ ରିଲାଏନ୍ସ ଇଣ୍ଡଷ୍ଟ୍ରିଜକୁ ବିକ୍ରି କରିବାକୁ ପଡିଲା ବୋଲି ଫ୍ୟୁଚର ଗ୍ରୁପର କିଶୋର ବିୟାନି ବୁଧବାର ଏକ କାର୍ଯ୍ୟକ୍ରମରେ କହିଛନ୍ତି। ସୂଚନା ଯୋଗ୍ୟ, ରିଲାଏନ୍ସ ଇଣ୍ଡଷ୍ଟ୍ରିଜ ୨୪,୭୧୩ କୋଟି ଟଙ୍କାରେ ଏହି ଡିଲ୍ କରିଥିବା ଜଣାପଡିଛି। କରୋନା ଯୋଗୁ କମ୍ପାନୀ ବୃହତ୍ତ ପରିମାଣର ରାଜସ୍ବ ହରାଇଥିବା ବେଳେ ଭଡା, ପରିଚାଳନା ଜନିତ ଖର୍ଚ୍ଚ ଏବଂ ଋଣ ଉପରେ ସୁଧ ବାବଦକୁ ବୃହତ୍ତ ପରିମାଣର ଅର୍ଥ ଖର୍ଚ୍ଚ କରିବାକୁ ପଡିଥିଲା। ଗତ ୭ ବର୍ଷରେ କମ୍ପାନୀ ଅନେକଗୁଡିଏ ଅଧିଗ୍ରହଣ କରିଥିଲା। ଏଥିରେ ମଧ୍ୟ ଅନେକ ନିବେଶ ହୋଇଥିଲା। କୋଭିଡ ପରେ କାରବାର ଚାପକୁ ଆସିବା ଫଳରେ ଅନ୍ୟ ଉପାୟ ନ ପାଇ ବାଧ୍ୟ ହୋଇ ରିଟେଲ ବିଜନେସକୁ ବିକିବାକୁ ପଡିଲା ବୋଲି ବିୟାନୀ ମତ ରଖିଛନ୍ତି।