ଜି.ଉଦୟଗିରି,୨୯।୩(ଶିଶିର ପଟ୍ଟନାୟକ/ଚିନ୍ମୟ କୁମାର ସେଠୀ): କନ୍ଧମାଳ ଜିଲା ଜି.ଉଦୟଗିରି ବାର୍ ଆସୋସିଏଶନର ୨୦୨୫-୨୬ ବର୍ଷ ନିମନ୍ତେ ସୁଚାରୁ ରୂପେ ନିର୍ବାଚନ ଅନୁଷ୍ଠିତ ହୋଇଯାଇଛି। ମହିଳା ଆଇନଜୀବୀ ପୁଷ୍ପାଶ୍ରୀ ରାଉତରାୟ ନିର୍ବାଚନ ଅଧିକାରୀ ଭାବେ ନିର୍ବାଚନ ପରିଚାଳନା କରିଥିଲେ। ସଭାପତି ଓ ଉପସଭାପତି ପଦବୀ ନିମନ୍ତେ ଦୁଇଦୁଇ ଜଣ ପ୍ରାର୍ଥୀ ନିଜ ପ୍ରାର୍ଥୀପତ୍ର ଦାଖଲ କରିବା ଫଳରେ ଭୋଟିଂ ହୋଇଥିଲା।
ସମୁଦାୟ ୬୩ଜଣ ଆଇନଜୀବୀଙ୍କ ମଧ୍ୟରୁ ୫୩ ଜଣ ମତଦାନ କରିଥିଲେ। ସଭାପତି ପଦବୀ ପାଇଁ ପ୍ରତିଦ୍ୱନ୍ଦ୍ୱିତା କରୁଥିବା ଆଇନଜୀବୀ ପ୍ରତାପ କୁମାର ନାୟକ ୨୨ ଖଣ୍ଡ ଭୋଟ ପାଇଥିବା ବେଳେ ଆଇନଜୀବୀ ଦୀପକ କୁମାର ଭରଦ୍ବାଜ ୩୧ ଖଣ୍ଡ ଭୋଟ ପାଇ ବିଜୟୀ ହୋଇଛନ୍ତି।
ଉପସଭାପତି ଆସନ ନିମନ୍ତେ ଶୁଭ୍ରାଂଶ ନାୟକ ୨୬ଟି ଭୋଟ ପାଇଥିବା ବେଳେ ସୁଶୀଲ କୁମାର ପାଣିଗ୍ରାହୀ ୨୭ ଖଣ୍ଡ ଭୋଟ ପାଇ ବିଜୟୀ ହୋଇଛନ୍ତି। ସମ୍ପାଦକ, ସହ ସମ୍ପାଦକ, କୋଷାଧ୍ୟକ୍ଷ, କାର୍ଯ୍ୟକାରୀଣୀ ସଦସ୍ୟ ଭାବେ ଅନ୍ୟକେହି ପ୍ରାର୍ଥୀପତ୍ର ଦାଖଲ କରି ନ ଥିଲେ ଫଳରେ ଜି.ଉଦୟଗିରି ଓକିଲ ସଂଘ ସମ୍ପାଦକ ଭାବେ ଅଜିତ କୁମାର ଦିଗାଲ, ସହ ସମ୍ପାଦକ ବୁଲୁ ସାହେବ ସେଠୀ, କୋଷାଧ୍ୟକ୍ଷ ବ୍ରଜମୋହନ ପାତ୍ର, କାର୍ଯ୍ୟକାରୀଣୀ ସଦସ୍ୟ ଭାବେ ଧୀରଜ କୁମାର ପ୍ରଧାନ, ଅଶ୍ୱିନ କୁମାର ଦିଗାଳ ସର୍ବସମ୍ମତିକ୍ରମେ ନିର୍ବାଚିତ ହୋଇଥିବା ନିର୍ବାଚନ ଅଧିକାରୀ ପୁଷ୍ପାଶ୍ରୀ ରାଉତରାୟ ପ୍ରକାଶ କରିଛନ୍ତି। ନୂତନ ସଭାପତି ଦୀପକ କୁମାର ଭରଦ୍ବାଜ ନିଜ ପ୍ରତିକ୍ରିୟାରେ କହିଛନ୍ତି, ଜି.ଉଦୟଗିରିଠାରେ ଏଡିଜେ କୋର୍ଟ ଓ ଉପଜିଲାପାଳ କାର୍ଯ୍ୟାଳୟ ଖୋଲିବା ପାଇଁ ସରକାରଙ୍କ ନିକଟରେ ଦାବି କରିଛନ୍ତି।
