ସାଉଥାମ୍ପଟନ, ୧୪ା୭ (ପି.ଟି.)-ବର୍ତ୍ତମାନ ଫର୍ମରେ ନ ଥିବା ଉଇକେଟକିପର ବ୍ୟାଟ୍ସମ୍ୟାନ ଜୋସ୍ ବଟ୍ଲ ଓ୍ବେଷ୍ଟଇଣ୍ଡିଜ ବିପକ୍ଷ ଆସନ୍ତା ଦୁଇଟି ଟେଷ୍ଟ ମ୍ୟାଚରେ ଯଦି ଭଲ ପ୍ରଦର୍ଶନ ନ କରନ୍ତି ତେବେ ତାଙ୍କ କ୍ୟାରିୟର ପ୍ରତି ବିପଦ ରହିଛି। ଇଂଲଣ୍ଡର ପୂର୍ବତନ ସିମ୍ ବୋଲର ଡାରେନ ଗଫ୍ ଏକଥା ପ୍ରକାଶ କରିଛନ୍ତି। ବଟଲର ତାଙ୍କର ଗତ ୧୨ଟି ଟେଷ୍ଟ ଇନିଂସରେ ଗୋଟିଏ ହେଲେ ଅର୍ଦ୍ଧଶତକ ହାସଲ କରିପାରି ନାହାନ୍ତି। ଓ୍ବେଷ୍ଟଇଣ୍ଡିଜ ବିପକ୍ଷ ପ୍ରଥମ ଟେଷ୍ଟରେ ସେ ଜର୍ମେନ ବ୍ଲାକ୍ଉଡଙ୍କ କ୍ୟାଚ୍ ଡ୍ରପ୍ କରିଛନ୍ତି। ଫଳରେ ଏହି ଖେଳାଳି ମ୍ୟାଚ ବିଜୟୀ ୯୫ ରନ ସ୍କୋର କରିବାରେ ସମର୍ଥ ହୋଇଥିଲେ। ଇଂଲଣ୍ଡ ତରଫରୁ ୫୮ ଟେଷ୍ଟ ମ୍ୟାଚ ଖେଳି ୨୨୯ ଉଇକେଟ ଅକ୍ତିଆର କରିଥିବା ଗଫ୍ କହିଛନ୍ତି କ୍ୟାରିୟର ବଞ୍ଚାଇବା ଲାଗି ଗଫ୍ଙ୍କ ହାତରେ ଆଉ ଦୁଇଟି ଟେଷ୍ଟ ମ୍ୟାଚରେ ସୁଯୋଗ ରହିଛି। ବଟଲରଙ୍କ ନିକଟରେ ପ୍ରଚଣ୍ଡ ପ୍ରତିଭା ରହିଛି। ବହୁ ଯୁବ ଖେଳାଳି ତାଙ୍କୁ ଅନୁସରଣ କରିଥାନ୍ତି। ହେଲେ ଟେଷ୍ଟ କ୍ରିକେଟରେ ଅବଦାନ ନ ରହିଲେ ଦଳରେ ତିଷ୍ଠି ହେବ ନାହିଁ। ଗଫ୍ଙ୍କ ଦୃଷ୍ଟିରେ ସିରିଜର ଅବଶିଷ୍ଟ ମ୍ୟାଚରେ ଜୋଫ୍ରା ଆର୍ଚର ଓ ମାର୍କ ଉଡ୍ଙ୍କୁ ରୋଟେଶନ ଭିତ୍ତିରେ ଖେଳାଯିବା ଉଚିତ୍। ପୁନଶ୍ଚ ଓପନିଂ ଟେଷ୍ଟରେ ଉପେକ୍ଷିତ ଷ୍ଟୁଆର୍ଟ ବ୍ରଡ୍ ଓ କ୍ରିସ୍ ଓକ୍ସଙ୍କୁ ଦଳରେ ଖେଳାଇବା ଉଚିତ। ସେ କହିଛନ୍ତି ମୋ ବିଚାରରେ ବ୍ରଡ୍ ଯଦି ଦଳକୁ ଫେରନ୍ତି ତେବେ ଓଲ୍ଡ ଟ୍ରାଫୋର୍ଡରେ ଉଡ୍ ଏବଂ ଆଣ୍ଡରସନଙ୍କୁ ବିଶ୍ରାମ ଦିଆଯିବା ଉଚିତ।