ନୂଆଦିଲ୍ଲୀ, ୭।୧୦(ପି.ଟି.)- ଚଳିତ ଇଣ୍ଡିଆନ ପ୍ରିମିୟର ଲିଗ୍ରେ କିଙ୍ଗ୍ସ ଇଲେଭେନ ପଞ୍ଜାବର ଅଭିଯାନ ଭଲ ରହିନାହିଁ। ଦଳ ଖେଳିଥିବା ୫ଟି ମ୍ୟାଚରୁ ୪ଟିରେ ପରାଜିତ ହୋଇ ପଏଣ୍ଟ ଟେବୁଲର ନିମ୍ନରେ ରହିଛି। ପ୍ଲେ-ଅଫ୍ରେ ପ୍ରବେଶ କରିବାକୁ ହେଲେ ଲିଗ୍ ପର୍ଯ୍ୟାୟର ଅଧିକାଂଶ ମ୍ୟାଚରେ ଦଳକୁ ଜିତିବାକୁ ପଡ଼ିବ। ଏପରି ସ୍ଥିତିରେ ଦଳରେ କିଛି ପରିବର୍ତ୍ତନ ପାଇଁ ଚିନ୍ତା କରୁଛି ଟିମ୍ ମ୍ୟାନେଜମେଣ୍ଟ। ତେଣୁ ଆଗାମୀ ମ୍ୟାଚ ଗୁଡ଼ିକରେ ମ୍ୟାଚ ବିଜେତା କ୍ରିସ୍ ଗେଲ୍ ଓ ସ୍ପିନର ମୁଜିବୁର ରହମନଙ୍କୁ ସୁଯୋଗ ମିଳିବା ସମ୍ଭାବନା ସମ୍ପର୍କରେ ସୂଚନା ଦେଇଛନ୍ତି ବ୍ୟାଟିଂ କୋଚ୍ ଓ୍ବାସିମ୍ ଜାଫର। ”ଆମର ଅଭିଯାନ ନୈରାଶ୍ୟଜନକ ରହିଛି। ପ୍ଲେ-ଅଫ୍ ପାଇଁ ସବୁ ମ୍ୟାଚ ଜିତିବା ପରିସ୍ଥିତି ଆସିବା ପୂର୍ବରୁ ଆମକୁ ସଜାଗ ରହିବାକୁ ହେବ। ଦଳରେ ଅନେକ ମ୍ୟାଚ ବିଜେତା ଅଛନ୍ତି। ତେଣୁ ଶୀଘ୍ର ଫଳାଫଳରେ ଭିନ୍ନତା ନେଇ ଆଶା ରହିଛି। ଗେଲ୍ ନେଟ୍ସରେ କଠିନ ପରିଶ୍ରମ କରୁଛନ୍ତି। ଏହି ୪୧ ବର୍ଷୀୟ ବ୍ୟାଟ୍ସମ୍ୟାନ ଏବେ ମଧ୍ୟ ରନ ସଂଗ୍ରହ ପାଇଁ ଭୋକିଲା ଅଛନ୍ତି“ ବୋଲି ଜାଫର କହିଛନ୍ତି। ପଏଣ୍ଟ ଟେବୁଲର ଶୀର୍ଷ ୪ ମଧ୍ୟରେ ରହିବାକୁ ହେଲେ କିଙ୍ଗ୍ସ ଇଲେଭେନକୁ ଅବଶିଷ୍ଟ ୯ ଗେମ୍ରୁ ୭ଟିରେ ଜିତିବାକୁ ହେବ। ଏହା କଷ୍ଟସାଧ୍ୟ ହେଲେ ମଧ୍ୟ ଅସମ୍ଭବ ନୁହେଁ ବୋଲି ଜାଫର କହିଛନ୍ତି। ବିଦେଶୀ ଖେଳାଳି କୋଟା ହିସାବରେ ଗେଲ, ମୁଜିବୁର, ଗ୍ଲେନ ମ୍ୟାକ୍ସଓ୍ବେଲ ଓ ନିକୋଲସ ପୁରନଙ୍କୁ ନେଇ କିପରି ପ୍ଲେଇଂ ଇଲେଭେନ ପ୍ରସ୍ତୁତ କରାଯାଇ ପାରିବ ସେ ସମ୍ପର୍କରେ ଅଧିନାୟକ ଲୋକେଶ ରାହୁଲ ଓ କୋଚ୍ ଅନୀଲ କୁମ୍ବଲେଙ୍କ ସହିତ ଆଲୋଚନା କରାଯିବ। ବିଦେଶୀ ଖେଳାଳିଭାବେ ଶେଲଡନ କଟ୍ରେଲ ଓ କ୍ରିସ୍ ଜୋର୍ଡାନ ଗତ ମ୍ୟାଚରେ ଖେଳିଥିଲେ। ଏଥିରେ ଦଳ ଚେନ୍ନାଇ ସୁପରକିଙ୍ଗ୍ସଠାରୁ ୧୦ ଉଇକେଟରେ ହାରିଥିଲା। ଡେଥ୍ ବୋଲିଂ ସହ ବ୍ୟାଟିଂରେ ମଧ୍ୟ ଉନ୍ନତି ଆବଶ୍ୟକ ବୋଲି ସେ କହିଛନ୍ତି।
