ନୂଆଦିଲ୍ଲୀ,୨୩ା୩: ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ନେତୃତ୍ୱାଧୀନ ଶିବସେନା ସଞ୍ଜୟ ରାଉତଙ୍କୁ ସଂସଦୀୟ ଦଳ ନେତା ପଦରୁ ହଟାଇ ତାଙ୍କ ସ୍ଥାନରେ ଦଳର ଲୋକ ସଭା ସଦସ୍ୟ ଗଜାନନ କୀର୍ତ୍ତିକାରଙ୍କୁ ଏହାର ଦାୟିତ୍ୱ ଦେଇଛି। ଶିବସେନା ମୁଖ୍ୟ ଏକନାଥ ଏନେଇ ଲୋକ ସଭା ବାଚସ୍ପତି ଓମ୍ ବିର୍ଲା ଏବଂ ରାଜ୍ୟ ସଭା ଅଧ୍ୟକ୍ଷ ଜଗଦୀପ୍ ଧନ୍କରଙ୍କୁ ଚିଠି ଲେଖି ଜଣାଇଛନ୍ତି। ପାର୍ଲାମେଣ୍ଟ ବିଲ୍ଡିଂର ତୃତୀୟ ମହଲାରେ ଥିବା ପାର୍ଲାମେଣ୍ଟାରି ପାର୍ଟି ଅଫିସରେ କୀର୍ତ୍ତିକାରଙ୍କୁ ଶିବସେନା ନେତାମାନେ ଗୁରୁବାର ସମ୍ବର୍ଦ୍ଧିତ କରିଥିଲେ। ସୂଚନାଯୋଗ୍ୟ, ଲୋକ ସଭାରେ ଶିବସେନାର ୧୮ ସଦସ୍ୟଙ୍କ ମଧ୍ୟରୁ ୪ଜଣଙ୍କର ଉଦ୍ଧବ ଠାକ୍ରେଙ୍କ ପ୍ରତି ଆନୁଗତ୍ୟ ରହିଛି। ସେହିପରି ରାଜ୍ୟ ସଭାରେ ଶିବସେନାର ୩ ସଦସ୍ୟ ସଞ୍ଜୟ ରାଉତ, ଅନିଲ ଦେଶାଇ ଏବଂ ପ୍ରିୟଙ୍କା ଚତୁର୍ବେଦୀ ଠାକ୍ରେଙ୍କ ଗୋଷ୍ଠୀରେ ରହିଛନ୍ତି।