ନୂଆଦିଲ୍ଲୀ,୧୫।୬: ଆଇପିଏଲ୍ ୨୦୨୨ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ଏକ ଫିନିଶର ଭାବେ ଉଲ୍ଲେଖନୀୟ ପ୍ରଦର୍ଶନ କରିଥିଲେ ଦୀନେଶ କାର୍ତ୍ତିକ। ଏହାକୁ ନେଇ ତାଙ୍କୁ ଟି-୨୦ ବିଶ୍ୱକପ୍ରେ ଫିନିଶର ଭାବେ ଚୟନ କରାଯିବା ଉଚିତ ବୋଲି ପ୍ରଶଂସକମାନେ ଦାବି କରି ଆସୁଛନ୍ତି। ତେବେ ବିଶ୍ୱକପ୍କୁ ଆଉ କିଛି ମାସର ସମୟ ଥିବା ବେଳେ ପୂର୍ବତନ ଭାରତୀୟ କ୍ରିକେଟର ଗୌତମ ଗମ୍ଭୀର କାର୍ତ୍ତିକଙ୍କୁ ନେଇ ବଡ଼ ବୟାନ ଦେଇଛନ୍ତି।
ଷ୍ଟାର ସ୍ପୋଟ୍ସର ଶୋ’ ମ୍ୟାଚ୍ ପଏଣ୍ଟ ସହ ଆଲୋଚନାରେ ଗମ୍ଭୀରଙ୍କୁ କାର୍ତ୍ତିକଙ୍କୁ ୨୧ ବଲ୍ରେ ୩୦ ରନ୍ର ଇନିଂସକୁ ନେଇ କ’ଣ କହିବେ ବୋଲି ପ୍ରଶ୍ନ କରାଯାଇଥିଲା। ଏହାର ଜବାବରେ ଗମ୍ଭୀର କହିଥିଲେ, ଏହା ଅତ୍ୟନ୍ତ ମୂଲ୍ୟବାନ ଇନିଂସ ଥିଲା। ସେ ଦୁଇ ତିନି ମାସ ଧରି ଆର୍ସିବି ପାଇଁ ଏଭଳି ଖେଳି ଆସୁଛନ୍ତି। ହେଲେ କାର୍ତ୍ତିକଙ୍କ ପୂର୍ବରୁ ଅକ୍ଷର ପଟେଲଙ୍କୁ ପଠାଯିବା ବେଳେ ସେ ଚକିତ ହୋଇ ଯାଇଥିଲେ। ସେ ଯଦି ପ୍ରଥମେ ବ୍ୟାଟିଂ କରିବାକୁ ଆସିଥାନ୍ତେ ଅଧିକ ଖୁସି ହୋଇଥାନ୍ତି ବୋଲି ଗମ୍ଭୀର କହିଛନ୍ତି।
ସେହିଭଳି ଟି୨୦ ବିଶ୍ୱକପ୍ ଟିମ୍ରେ କାର୍ତ୍ତିକଙ୍କ ଚୟନକୁ ନେଇ ସେ କହିଛନ୍ତି, କେ.ଏଲ୍. ରାହୁଲ, ବିରାଟ କୋହଲି, ରୋହିତ ଶର୍ମା, ସୂର୍ଯ୍ୟକୁମାର ଯାଦବ, ରବିନ୍ଦ୍ର ଜାଡେଜା ପ୍ରମୁଖ ଦଳକୁ ଫେରିବା ପରେ କାର୍ତ୍ତିକଙ୍କ ପାଇଁ ସ୍ଥାନ ପାଇବା କଷ୍ଟକର ହେବ। ବିଶ୍ୱକପ୍କୁ ଏବେ ବି ବହୁତ ସମୟ ଅଛି। କାର୍ତ୍ତିକଙ୍କୁ ନିୟମିତ ଭାବେ ଭଲ ଖେଳିବାକୁ ହେବ। କାରଣ ତାଙ୍କୁ ଯଦି ଶେଷ ତିନି ଓଭରରେ ବ୍ୟାଟିଂ କରିବାକୁ ସୁଯୋଗ ମିଳେ ତେବେ ତାଙ୍କ ପାଇଁ କଷ୍ଟକର ହେବ। ଏଣୁ ଚୂଡ଼ାନ୍ତ ଏକାଦଶରେ ସ୍ଥାନ ନ ମିଳିଲେ ତାଙ୍କୁ ଦଳରେ ରଖିବାର କୌଣସି ଅର୍ଥ ନାହିଁ ବୋଲି ଗମ୍ଭୀର କହିଛନ୍ତି। ଏହାଛଡ଼ା ସେ କାର୍ତ୍ତିକଙ୍କୁ ବିଶ୍ୱକପ୍ ଦଳରେ ରଖିବେ ନାହିଁ। ଦଳରେ ଋଷଭ ପନ୍ତ ଏବଂ ଦୀପକ ହୁଡ଼ାଙ୍କ ଭଳି ଖେଳାଳିଙ୍କୁ ସେ ସାମିଲ କରିବେ। ଯଦି ଚୟନକର୍ତ୍ତା ଟପ୍-୪ ମଧ୍ୟରୁ ଗୋଟିଏ ଖେଳାଳିଙ୍କୁ ଛାଡ଼ିବାକୁ ନିଷ୍ପତ୍ତି ନିଅନ୍ତି ତେବେ କାର୍ତ୍ତିକଙ୍କୁ ଦଳରେ ସୁଯୋଗ ମିଳିପାରେ ବୋଲି ସେ କହିଛନ୍ତି।
