ବାରିପଦା,୨୫ା୧୨(ନୀଳାଦ୍ରି ବିହାରୀ ଦଣ୍ଡପାଟ): ପଶ୍ଚିମବଙ୍ଗର ପୁରୁଲିଆ ଜିଲା ରାଇକିଆ ପାହାଡ଼ ସଂଲଗ୍ନ କ୍ୱିଲାପାଳ ଜଙ୍ଗଲରେ ବୁଲୁଥିବା ମହାବଳ ବାଘୁଣୀ ଜିନ୍ନତକୁ ଧରିବା ପାଇଁ ବନ ବିଭାଗ ପ୍ରୟାସ ଜାରି ରଖିଛି। ଯନ୍ତାରେ ଛେଳି ଓ ବାର୍ହା ରଖି ଖାଦ୍ୟ ଦିଆଯାଉଥିଲେ ମଧ୍ୟ ବାଘୁଣୀ ଖାଇବାକୁ ଆସୁନାହିଁ। ଜଙ୍ଗଲରେ ଛେଳି, ବାର୍ହା, ମଇଁଷି ଭଳି ପ୍ରାଣୀଙ୍କୁ ବାନ୍ଧି ଉପରୁ ଜାଲ ବିଛାଯାଇଛି। ବନ ବିଭାଗର ଏହି ବାଘ- ଛେଳି ଖେଳ ପ୍ରସଙ୍ଗ ଏବେ ଆଲୋଚନାର ବିଷୟ ପାଲଟିଛି।
ମଙ୍ଗଳବାର ଭୋର ସମୟରେ ଜିନ୍ନତ ବୁଦୱାନ ଗାଁରେ ପଶି ୪ଟି ଛେଳିକୁ ମାରିଥିବା ବେଳେ ୨ଟିକୁ ଖାଇଛି। ଏନେଇ ସ୍ଥାନୀୟ ଅଞ୍ଚଳରେ ଆତଙ୍କ ଖେଳିଯାଇଛି। ବନ ବିଭାଗ ଦେଉଥିବା ଖାଦ୍ୟ ଖାଇବା ପୂର୍ବରୁ ଧରାପଡ଼ିବା ଭୟରେ ଜିନ୍ନତ ଚତୁରତାର ସହ ଖସିଯାଉଛି। ବିଭାଗୀୟ କର୍ମଚାରୀମାନେ ବାଘୁଣୀକୁ ଧରିବା ପାଇଁ ଅତ୍ୟାଧୁନିକ ଟ୍ରାକିଂ ସିଷ୍ଟମ ଜରିଆରେ ଟାଙ୍କୁଲାଇଜ୍ କରିବାକୁ ଯୋଜନା କରୁଛନ୍ତି। ଜିନ୍ନତ ରହୁଥିବା ଜଙ୍ଗଲରୁ ଲାଲଗଡ଼ ଅଞ୍ଚଳ ମାତ୍ର ୪୦ କି.ମି. ଦୂର ହୋଇଥିବାରୁ ସେ ଏହି ଅଞ୍ଚଳରେ ପ୍ରବେଶ କରିବାର ସମ୍ଭାବନା ଦେଖାଦେଇଛି। ତେବେ ଖୁବ୍ଶୀଘ୍ର ଜିନ୍ନତକୁ ଶିମିଳିପାଳ ଫେରାଇ ଅଣାଯିବ ବୋଲି ଆଞ୍ଚଳିକ ବନ୍ୟପ୍ରାଣୀ ସଂରକ୍ଷକ ତଥା ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଡ.ପ୍ରକାଶଚାନ୍ଦ ଗୋଗିନେନୀ ସୂଚନା ଦେଇଛନ୍ତି।
ଶିମିଳିପାଳ ଅଭୟାରଣ୍ୟ ସୀମାରୁ ୩୦୦ କି.ମି. ଦୂରରେ ବାଘୁଣୀ ଜିନ୍ନତ ଚଳପ୍ରଚଳ କରୁଛି। ପଶ୍ଚିମବଙ୍ଗର ରାଇକିଆ ପାହାଡ଼ ଓ ନିକଟସ୍ଥ କ୍ୱିଲାପାଳର ଘଞ୍ଚ ଜଙ୍ଗଲରେ ସେ ରହିିଛି। ବାଘୁଣୀକୁ ଧରିବା ପାଇଁ ବନ ବିଭାଗ ନେଉଥିବା ପ୍ରୟାସ ବିଫଳ ହେବାରେ ଲାଗିଛି। ଏପରିକି ବନ ବିଭାଗର ଯନ୍ତା, ଗାଡ଼ି ଓ କର୍ମଚାରୀଙ୍କ ଚଳପ୍ରଚଳ ସମ୍ପର୍କରେ ଜାଣିପାରି ସେ ନିଜକୁ ଦୂରେଇ ରଖିବାକୁ ଚେଷ୍ଟା କରୁଛି। ବନ ବିଭାଗ ପକ୍ଷରୁ ସାଟେଲାଇଟ ମନିଟରିଂ, ଥର୍ମାଲ ଇମେଜ୍ ସ୍କାନିଂ ସିଷ୍ଟମ ଓ ନାଇଟ୍ ଭିଜନ ଡ୍ରୋନ୍ ମନିଟରିଂ ମାଧ୍ୟମରେ ଜିନ୍ନତର ସ୍ଥିତି ନିରୀକ୍ଷଣ କରାଯାଉଛି। ସୁନ୍ଦରବନ ଅଞ୍ଚଳର ଏକ ଟିମ୍ ଜାଲ ମାଧ୍ୟମରେ ବାଘୁଣୀକୁ ଧରିବା ନିମନ୍ତେ ଅପରେଶନରେ ନିୟୋଜିତ ହୋଇଛନ୍ତି। ଯେଉଁ ଅଞ୍ଚଳରେ ଜିନ୍ନତ ପ୍ରବେଶ କରୁଛି ସେହି ଅଞ୍ଚଳର ଲୋକଙ୍କୁ ବନ ବିଭାଗର କର୍ମଚାରୀମାନେ ଡାକବାଜି ଯନ୍ତ୍ର ସାହାଯ୍ୟରେ ସତର୍କ କରାଉଛନ୍ତି। ଅଞ୍ଚଳର ସମସ୍ତ ଶିକ୍ଷାନୁଷ୍ଠାନ ବନ୍ଦ ରଖାଯାଇଥିବା ବେଳେ ଗାଁ ଲୋକେ ଏକୁଟିଆ ବାହାରକୁ ଯିବାଆସିବା କରିବାରେ ସୁରକ୍ଷିତ ମଣୁନାହାନ୍ତି। ଜଙ୍ଗଲ ଓ ପାହାଡ଼ ସଂଲଗ୍ନ ଅଞ୍ଚଳ ମଧ୍ୟରେ ଥିବା କେଶରା, କୈରା, ସାଗେଡି, ଲେଡାଶୋଲ, ଚିରୁଗାଡୁ, ବାରୁଡିର ଲୋକମାନଙ୍କୁ ସତର୍କ କରାଯାଇଛି। ଏପରିକି ଲୋକଙ୍କୁ ସୁରକ୍ଷା ଯୋଗାଇଦେବାରେ ସ୍ଥାନୀୟ ପୋଲିସ ପ୍ରଶାସନ ମଧ୍ୟ ସହଯୋଗ କରୁଛନ୍ତି। ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ, ପଶ୍ଚିମବଙ୍ଗ ପୁରୁଲିଆ ବନଖଣ୍ଡ ଓ ସୁନ୍ଦରବନର ଏକ ସ୍ବତନ୍ତ୍ର ଟିମ୍ ବାଘୁଣୀକୁ ଧରିବା ପାଇଁ ଦିନରାତି ପ୍ରୟାସ ଜାରି ରଖିଛନ୍ତି। ତେବେ ଜିନ୍ନତ ପାଇଁ ପଶ୍ଚିମବଙ୍ଗ ସରକାରଙ୍କ ପକ୍ଷରୁ ସହଯୋଗ ମିଳୁଥିବାରୁ ଖୁବ୍ଶୀଘ୍ର ଟ୍ରାଙ୍କୁଲାଇଜ୍ କରାଯାଇ ଶିମିଳିପାଳକୁ ଫେରାଇ ଅଣାଯିବ ବୋଲି ଅଧିକାରୀମାନେ ଆଶାବ୍ୟକ୍ତ କରିଛନ୍ତି। ବାଘୁଣୀ ବୁଲୁଥିବା ଅଞ୍ଚଳରେ ଗୁଜବ ସୃଷ୍ଟି ନ କରିବାକୁ ପୁରୁଲିଆ ବନଖଣ୍ଡ ଅଧିକାରୀ ଅଞ୍ଜନ ଗୁହା ନିବେଦନ କରିଛନ୍ତି। ଦିନେ କିମ୍ବା ୨ଦିନ ମଧ୍ୟରେ ବାଘୁଣୀକୁ ଧରି ନ ପାରିଲେ ସେ ଲାଲଗଡ଼ ଜଙ୍ଗଲକୁ ପଳାଇଯାଇପାରେ ବୋଲି ପ୍ରାଣୀପ୍ରେମୀମାନେ ମତପ୍ରକାଶ କରିଛନ୍ତି।
