ଭଦ୍ରକ ଅଫିସ,୨୦ା୮- ଆସନ୍ତା ଶନିବାର ଗଣେଶ ପୂଜା। ଜିଲାରେ ମାତ୍ର ୬ଟି ସ୍ଥାୟୀ ମନ୍ଦିରରେ ପୂଜା ପାଇବେ ଗଜାନନ। କୋଭିଡ୍ କଟକଣା ମଧ୍ୟରେ ଏହି ପୂଜା ଆୟୋଜନ କରାଯିବ ବୋଲି ଜିଲା ପ୍ରଶାସନ ପକ୍ଷରୁ ନିର୍ଦ୍ଦେଶାନାମା ଜାରି କରାଯାଇଛି। ପୂର୍ବରୁ ରାଜ୍ୟର ପୁରପଲ୍ଲୀରେ ବିଦ୍ୟାଦାତା ଗଣେଶଙ୍କୁ ଆବାହନ କରାଯାଉଥିଲା। କିନ୍ତୁ ଚଳିତ ଥର ଏଥିରେ ବ୍ୟତିକ୍ରମ ଦେଖାଦେବ। ଶାସ୍ତ୍ର ମତେ ଗଣେଶଙ୍କର ବହୁନାମ ରହିଛି। ତେବେ ଶାସ୍ତ୍ରବାହାରେ ଅଲଗା ନାଁରେ ଭଦ୍ରକରେ ଗଣେଶଙ୍କୁ ପୂଜା କରାଯାଉଛି। ଏଠାରେ ବୁଢ଼ା ଗଣେଶ, ଟୋକା ଗଣେଶ, ପିଲା ଗଣେଶ, ପେଟୁଆ ଗଣେଶ, ଛୁଆ ଗଣେଶ, କାଞ୍ଚନ ଗଣେଶ, ବାଲ ଗଣେଶ, କୁନି ଗଣେଶ ଏଭଳି ବିଭିନ୍ନ ନାମରେ ପୂଜା ପାଆନ୍ତି। କିନ୍ତୁ ଚଳିତ ଥର ଏଥିରେ ବ୍ୟତିକ୍ରମ ଅଣାଯାଇଛି। ସ୍ଥାୟୀ ମନ୍ଦିର କୁହାଯାଉଥିବା ପୁରୁଣାବଜାରର ବୁଢ଼ା ଗଣେଶ, ଟୋକା ଗଣେଶ, କୁଆଁସର ପିଲା ଗଣେଶ, ଛୁଆ ଗଣେଶ ଓ କାଞ୍ଚନ ଗଣେଶ ଏହା ବ୍ୟତୀତ କୁଆଁସ ମୁଖ୍ୟରାସ୍ତାରେ ଥିବା ସିଦ୍ଧି ବିନାୟକ ମନ୍ଦିରରେ ଚଳିିତ ବର୍ଷ ପୂଜା ପାଇବେ ଅଗ୍ରପୂଜ୍ୟ ଗଣେଶ। କୋଭିଡ୍ କଟକଣା ମୁତାବକ ବାଉଁଶ ବନ୍ଧା ଯାଇ ସର୍ବସାଧାରଣଙ୍କୁ ଉକ୍ତ ସ୍ଥଳକୁ ଦର୍ଶନ ପାଇଁ ଛଡ଼ାଯିବ ନାହିଁ। ପୋଲିସ କଡ଼ା ପହରା ମଧ୍ୟରେ ପୂଜା ପାଇବେ ଗଣେଶ। ଭସାଣି ସମୟରେ ପାରମ୍ପରିକ ବାଦ୍ୟରେ ବିସର୍ଜନ କରାଯିବ। ଏଣୁ ଆୟୋଜକଙ୍କ ମନରେ ହରସ ନାହିଁ। ଏବେ ମୂର୍ତ୍ତି ଚୂଡ଼ାନ୍ତ ରୂପ ଦିଆସରିଲାଣି। କେଉଁ ମୂର୍ତ୍ତିରେ ରଙ୍ଗ ଦିଆସରିଲାଣି ତ ଅନ୍ୟ କେଉଁଠି ଦିନରାତି ଏକ କରି କାରିଗର ମାନେ ମୂର୍ତ୍ତି ତିଆରିରେ ଲାଗିଛନ୍ତି। ପୁରୁଣାବଜାର ଗଣେଶ ପୂଜାରେ ହିନ୍ଦୁ ମୁସଲମାନ ଉଭୟ ସମ୍ପ୍ରଦାୟର ଶ୍ରଦ୍ଧାଳୁ ସାମିଲ ହୋଇଥାନ୍ତି।
