କେନ୍ଦ୍ରପଡ଼ା,୨।୪(ଜଗନ୍ନାଥ ଧଳ):ପୂର୍ବତନ ମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ଗଣେଶ୍ୱର ବେହେରା ମଙ୍ଗଳବାର ଦଳର ପ୍ରାଥମିକ ସଦସ୍ୟ ପଦରୁ ଇସ୍ତଫା ଦେଇଛନ୍ତି। ଏ ସମ୍ପର୍କରେ ଏକ ଚିଠି ପ୍ରଦେଶ କଂଗ୍ରେସ କମିଟି ସଭାପତି ଶରତ ପଟ୍ଟନାୟକଙ୍କୁ ଚିଠି ମାଧ୍ୟମରେ ଜଣାଇଛନ୍ତି। ତାଙ୍କର ଏହି ଇସ୍ତଫା ଜିଲା କଂଗ୍ରେସ ପ୍ରତି ପରୋକ୍ଷରେ ଏକ ଝଟ୍କା ଲାଗିଛି। ଦୀର୍ଘ ଦିନ ଧରି କଂଗ୍ରେସରେ ରହି ବିଧାୟକ ଓ ମନ୍ତ୍ରୀ ହୋଇଥିଲେ। ଚଳିତ ସାଧାରଣ ନିର୍ବାଚନ ପୂର୍ବରୁ ଦଳୀୟ ସଂଗଠନକୁ ମଜଭୁତ କରୁଥିବା ବେଳେ ଇସ୍ତଫା ରାଜନୈତିକ ହଟଚମଟ ସୃଷ୍ଟି କରିଛି। ସେ ବିଜେଡିରେ ଯୋଗଦେବେ ବୋଲି ଆଲୋଚନା ହେଉଛି। ତେବେ କେଉଁ ରାଜନୈତିକ ଦଳକୁ ଯାଉଥିବା ପ୍ରଶ୍ନରେ ଚୁପ ରହୁଛନ୍ତି।
ଏନେଇ ଗଣେଶ୍ୱର କହିଛନ୍ତି, ଦଳ ପକ୍ଷରୁ ଅଣଦେଖା କରାଯାଇଛି। ପୂର୍ବରୁ ବହୁ କାର୍ଯ୍ୟ କଂଗ୍ରେସ ଦଳର ଭଲ ପାଇଁ କରିଛନ୍ତି। ମାତ୍ର ବିଭିନ୍ନ ସମୟରେ ଦଳ ତାଙ୍କୁ ଉପଯୁକ୍ତ ସମ୍ମାନ ଦେଇନାହିଁ। ଗତ କିଛି ଦିନ ପୂର୍ବରୁ ନିର୍ବାଚନ କମିଟିରେ ମଧ୍ୟ ଏପରି ଘଟଣା ହେବାରୁ ମନ ବ୍ୟଥିତ ହୋଇଛି। ମାତ୍ର ଦଳର ଭଲ ପାଇଁ ନୀରବ ରହିବା ଉଚିତ ମଣିଥିଲେ। କେନ୍ଦ୍ରାପଡା ନିର୍ବାଚନ ମଣ୍ଡଳୀରେ ଥିବା ସମସ୍ୟାର ସମାଧାନ ପାଇଁ ଆଗାମୀ ଦିନରେ ପଦକ୍ଷେପ ନେବାକୁ ଯାଉଥିବା ଗଣେଶ୍ୱର ସୂଚନା ଦେଇଛନ୍ତି।
