ଅନୁଗୋଳ ଅଫିସ, ୮ା୧୨: ଅନୁଗୋଳ ଜିଲା ବନ୍ତଳା ଥାନା ଅଧୀନ ପୁରୁଣା କଟକ-ସମ୍ବଲପୁର ରୋଡ୍ରେ ଡକାୟତ ଗ୍ୟାଙ୍ଗ୍ ମାତିଛନ୍ତି। ବେଡ଼ା ବସଲା ଛକରେ ସେମାନେ ଗାଡ଼ି ଚାଳକଙ୍କୁ ଅଟକାଇ ମାଡ଼ ମାରୁଛନ୍ତି। ଭୁଜାଲି ଦେଖାଇ ଭୟଭୀତ କରାଇବା ସହ ଟଙ୍କା ଓ ମୋବାଇଲ୍ ଝାମ୍ପି ନେଉଛନ୍ତି। ଗତ ରବିବାର ଏବଂ ମଙ୍ଗଳବାର ଦୁଇଜଣ ଗାଡ଼ି ଚାଳକ ଡକାୟତଙ୍କ ଶିକାର ହେବା ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି। ଏ ନେଇ ଲିଖିତ ଅଭିଯୋଗ ପରେ ପୋଲିସ ସଜାଗ ହୋଇ ଉଠିଥିଲା। ବିଭିନ୍ନ ସ୍ଥାନରେ ଚଢ଼ାଉ କରି ଡକାୟତି ଗ୍ୟାଙ୍ଗ୍ର ୩ ଜଣଙ୍କୁ ପୋଲିସ ଗିରଫ କରିଥିବାବେଳେ ଅନ୍ୟ ୨ ଜଣ ଫେରାର ହୋଇଯାଇଛନ୍ତି। ଧରାପଡ଼ିଥିବା ଅଭିଯୁକ୍ତ ହେଲେ ଅନୁଗୋଳ ଜିଲା ଖମାର ଥାନା ଅଞ୍ଚଳର ସୁନର୍ଶନ ନାହାକ (୨୧), କାଙ୍ଗୁଲା ଅଞ୍ଚଳର ମୁଚୁକୁନ୍ଦ ମୁଦୁଲି (୨୩) ଓ ଅମର ସେଠୀ (୧୯)।
ଗତ ରବିବାର ରାତିରେ ଦେବଗଡ଼ ସୁନାମୁଣ୍ଡା ଗ୍ରାମର ସୁଜିତ କୁମାର ସାହୁ ଉଦ୍ୟାନ ବିଭାଗର ମେଡିସିନ୍ ନେଇ ଏକ ପିକ୍ଅପ୍ରେ କଟକରୁ ବେଡ଼ାବସଲା ରାସ୍ତାରେ ଫେରୁଥିଲେ। ଏହି ସମୟରେ ଗୋଟିଏ ବାଇକ୍ରେ ୩ ଯୁବକ ଆସି ତାଙ୍କୁ ଅଟକାଇବା ସହ ବେକରେ ଛୁରି ଲଗାଇ ୩, ୦୦୦ ଟଙ୍କା ଓ ମୋବାଇଲ ଛଡ଼ାଇ ନେଇ ମହୀଧରପୁର ରୋଡ୍ ଅଭିମୁଖେ ଚମ୍ପଟ ମାରିଥିଲେ। ଏନେଇ ନଂ. ୫୧୫/୨୨ରେ ମାମଲା ରୁଜୁ କରାଯାଇଥିଲା। ଗତ ମଙ୍ଗଳବାର ଅପରାହ୍ନ ସାଢ଼େ ୨ଟାରେ ଏକ ବାଇକ୍ରେ ୩ ଜଣ ଢେଙ୍କନାଳ ଜିଲାରୁ ଅନୁଗୋଳ ଟାଇଁସିକୁ ଯାଉଥିବା ଏକ ପିକ୍ ଅପ୍ ଗାଡ଼ିକୁ ଟାର୍ଗେଟ କରିଥିଲେ। ଢେଙ୍କାନାଳ ଜିଲା ଶଙ୍କରପୁର ଅଞ୍ଚଳର ମନୋରଞ୍ଜନ ପ୍ରଧାନଙ୍କ ବେକରେ ଭୁଜାଲି ଲଗାଇ ୧୦ ହଜାର ଟଙ୍କା ନେଇ ଯାଇଥିଲେ। ଏ ନେଇ ସେ ଥାନାରେ ଅଭିଯୋଗ କରିଥିଲେ।
ଢିଲା ପୋଲିସ ପାଟ୍ରୋଲିଂର ଫାଇଦା ନେଇ ଡକାୟତି ଦଳ ଗୋଟିଏ ପରେ ଗୋଟିଏ ଅପରାଧ ଘଟାଉଛନ୍ତି। ଏହି ଡକାୟତ ଗ୍ୟାଙ୍ଗ୍ର ବହୁ ସଦସ୍ୟ ବାହାରେ ଥିବାବେଳେ ସେମାନଙ୍କୁ ଗିରଫ କରିବାକୁ ଦାବି ହୋଇଛି। ଏ ସମ୍ପର୍କରେ ଥାନା ଅଧିକାରୀ ସୁମିତ୍ରା ପାତ୍ର କୁହନ୍ତି, ଧରାପଡ଼ିଥିବା ଅଭିଯୁକ୍ତମାନେ ବିଭିନ୍ନ ଡକାୟତି ଘଟଣାରେ ସାମିଲ ଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି।