ଭୁବନେଶ୍ୱର,୧୦।୪(ବ୍ୟୁରୋ): ଭୁବନେଶ୍ୱର ସହରାଞ୍ଚଳ ପୋଲିସ ଜିଲାରେ ଦିନକୁ ଦିନ ଅପରାଧ ବୃଦ୍ଧି ପାଇବାରେ ଲାଗିଛି। ପୋଲିସକୁ ଚ୍ୟାଲେଞ୍ଜ ଦେଇ ଚୋରିଠୁ ଆରମ୍ଭ କରି ଛିନ୍ତାଇ, ଅପହରଣ, ମାର୍ପିଟ ଭଳି ଘଟଣା ପ୍ରତ୍ୟହ ଘଟିବାରେ ଲାଗିଛି। ଏହିସବୁ ଘଟଣା ପଛରେ ଏକାଧିକ ଗ୍ୟାଙ୍ଗ୍ର ସମ୍ପୃକ୍ତି ରହୁଥିବା କୁହାଯାଉଥିବାବେଳେ ପୋଲିସ ତା’ର ଟେର୍ ପାଇପାରୁନାହିଁ। ଅପରାଧ ଘଟିବା ପରେ ଅଭିଯୋଗ ଆସିଲେ ପୋଲିସ ତତ୍ପରତା ଦେଖାଇବା ସହ ଚଢ଼ାଉ କରୁଛି। ଫଳରେ ଗ୍ୟାଙ୍ଗ୍ ଚଳାଉଥିବା ମୁଖ୍ୟ ଅଭିଯୁକ୍ତ ଓ ଅନ୍ୟ ଅପରାଧୀମାନେ ବିଭିନ୍ନ ଗଳାବାଟ ଦେଇ ଖସିଯିବାକୁ ସୁଯୋଗ ପାଉଛନ୍ତି। ଫଳରେ ସହରରେ ଅପରାଧ ବୃଦ୍ଧି ପାଇବା ସହ ସହରବାସୀଙ୍କ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ନିକଟରେ ନୟାପଲ୍ଲୀ ଥାନା ଅଞ୍ଚଳରେ ଏକ ବିବାଦୀୟ ଜମିକୁ ନିଜ ଅଧୀନକୁ ଆଣିବା ପାଇଁ ସୁପାରି ନେଇ ରାତିଅଧରେ ବସ୍ ଯୋଗେ ଏକ ଗ୍ୟାଙ୍ଗ୍ର ଶତାଧିକ ଲୋକ ଦଳବଦ୍ଧ ହୋଇ ଜେସିବି ଲଗାଇ ଦୋକାନ ଘର ଭାଙ୍ଗିବା ସହ ଲୁଟ୍ କରିବା ଏହାର ନଗ୍ନ ଉଦାହରଣ। ଘଟଣାରେ ୭ ବାଉନ୍ସରଙ୍କ ସମେତ ୧୪ ଜଣଙ୍କୁ ପୋଲିସ ଗିରଫ କରିଥିଲେ ମଧ୍ୟ ମାଷ୍ଟରମାଇଣ୍ଡ ରାଘବ ଜେନାଙ୍କ ସମେତ ଏକାଧିକ ବ୍ୟକ୍ତି ଏବେବି ଫେରାର ଅଛନ୍ତି। ଘଟଣାକୁ ୧୫ ଦିନ ବିତିଯାଇଥିଲେ ମଧ୍ୟ ପୋଲିସ ମାଷ୍ଟରମାଇଣ୍ଡକୁ ଧରିବା ତ ଦୂରର କଥା, ସେ ଏବେ କେଉଁଠି ତାହାର ପତ୍ତା ନ ପାଇବା ପୋଲିସର କାର୍ଯ୍ୟଦକ୍ଷତାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। ଏହି ଘଟଣା ସାମ୍ନାକୁ ଆସିବା ପରେ ସହରରେ ଆହୁରି ୩ରୁ ୪ ଗ୍ୟାଙ୍ଗ୍ ସକ୍ରିୟ ରହିଥିବା ଖୋଦ୍ ଡିସିପି ଖବରଦାତା ସମ୍ମିଳନୀରେ କହିବା ସହ ସେମାନଙ୍କୁ ଖୁବ୍ଶୀଘ୍ର ଧରାଯିବ ବୋଲି କହିଥିଲେ। କିନ୍ତୁ ଏଯାବତ୍ ସେହି ଗ୍ୟାଙ୍ଗ୍ ସମ୍ପର୍କରେ କୌଣସି ସୁରାକ୍ ମିଳିପାରିନାହିଁ। ଅପରାଧୀଙ୍କୁ ଟ୍ରାକିଂ କରିବାରେ ପୋଲିସ ବିଫଳ ହୋଇଛି। ସେହିଭଳି ଗତବର୍ଷ ଚନ୍ଦ୍ରଶେଖରପୁର ଅଞ୍ଚଳରେ ଏକ ବାର୍ରେ ପ୍ରବେଶ ପାଇଁ ଅନୁମତି ନ ଦେବାରୁ ସୁରକ୍ଷାକର୍ମୀ ଓ କର୍ମଚାରୀଙ୍କୁ ସଂଘବଦ୍ଧ ଆକ୍ରମଣ ହୋଇଥିଲା। ଏଥିରେ ୩୦ରୁ ଅଧିକ ଯୁବକ ଗ୍ୟାଙ୍ଗ୍ ହୋଇ ବସ୍ରେ ଆସି ଆକ୍ରମଣ କରିଥିଲେ। ଘଟଣାରେ ପୋଲିସ କେତେଜଣ ଯୁବକଙ୍କୁ ଗିରଫ କରିଥିବାବେଳେ ମୁଖ୍ୟ ଅଭିଯୁକ୍ତ ସଞ୍ଜୀବଙ୍କୁ ଏଯାବତ୍ ଧରିପାରିନାହିଁ। ତେବେ ସଞ୍ଜୀବ ଏକ ନିର୍ଦ୍ଦିଷ୍ଟ ଦଳର ଛାତ୍ରନେତା ଥିବାରୁ ପୋଲିସ ଗିରଫ କରୁ ନ ଥିବା କୁହାଯାଉଛି। କେବଳ ଏହି ଦୁଇଟି ଘଟଣା ନୁହେଁ, ପୂର୍ବରୁ ମଧ୍ୟ କେବିଏନ୍ ଗ୍ୟାଙ୍ଗ୍ ସମ୍ପର୍କରେ ଗଣମାଧ୍ୟମରେ ଖବର ପ୍ରସାରିତ ହେବା ପରେ ପୋଲିସ ଧରପଗଡ଼ କରିଥିଲା। ଅନ୍ୟପକ୍ଷେ ଓଡ଼ିଶାକୁ ବାହାର ରାଜ୍ୟର ଗ୍ୟାଙ୍ଗ୍ ଆସି ଅନେକ ସମୟରେ ଚୋରି, ଡକାୟତି, ଛିନ୍ତାଇ ଭଳି ଅପରାଧ ଘଟାଉଥିବା ନଜିର ରହିଛି। ହେଲେ ଗ୍ୟାଙ୍ଗ୍ ସଦସ୍ୟମାନେ ହୋଟେଲରେ ରହି ଖୁଲମ୍ଖୁଲା ସହରରେ ବୁଲି ବୁଲି ଅପରାଧ କରୁଥିଲେ ମଧ୍ୟ ପୋଲିସ ସେମାନଙ୍କ ଟେର୍ ନ ପାଇବା ଚିନ୍ତାର କାରଣ ପାଲଟିଛି।
ଏନେଇ ଡିସିପି ପ୍ରତୀକ ସିଂ କହିଲେ, ପୋଲିସ ପକ୍ଷରୁ ସହରରେ ଅପରାଧ ଘଟାଉଥିବା ଗ୍ୟାଙ୍ଗ୍ଙ୍କୁ ଧରିବାକୁ ଚେଷ୍ଟା କରାଯାଉଛି। ଲୋକମାନେ କୌଣସି ଅପରାଧର ଶିକାର ହେଲେ ଭୟ ନ କରି ଆଗକୁ ଆସି ଅଭିଯୋଗ କଲେ ପୋଲିସ ପଦକ୍ଷେପ ନେବ ବୋଲିି ଡିସିପି କହିଛନ୍ତି।