ଭବାନୀପାଟଣା,୭।୧୧(ସ୍ବ.ପ୍ର.): କଳାହାଣ୍ଡି ଜିଲା ଜୁନାଗଡ଼ ପୋଲିସ ଏକ ଲୁଟେରା ଗ୍ୟାଙ୍ଗର ପର୍ଦ୍ଦାଫାଶ କରିଛି। ଗ୍ୟାଙ୍ଗର ୨ଜଣଙ୍କୁ ସୋମବାର ପୋଲିସ ଗିରଫ କରି କୋର୍ଟ ଚାଲାଣ କରିଛି। ଅଭିଯୁକ୍ତମାନେ ହେଲେ ଜୁନାଗଡ଼ ବାବୁପଡ଼ାର ପ୍ରେମାନନ୍ଦ ବେହେରା ଓ ଅନ୍ୟଜଣେ ଚାରଭାଟି ଗ୍ରାମର ଯଶୋବନ୍ତ ନାଏକ।
ପୋଲିସ ତାଙ୍କଠାରୁ ୪ଟି ମୋବାଇଲ ଫୋନ ଓ ୪ଟି ବାଇକ୍ ଜବତ କରିଛି। ଗ୍ୟାଙ୍ଗର ଆଉ ୬ଜଣ ଅଭିଯୁକ୍ତ ଫେରାର ଥିବା ବେଳେ ସେମାନଙ୍କୁ ତୁରନ୍ତ ଗିରଫ କରାଯିବ ବୋଲି ଜୁନାଗଡ଼ ଆଇଆଇସି ଉତ୍ତମ କୁମାର ସାହୁ ଏକ ଖବରଦାତା ସମ୍ମିଳନୀରେ ଏହି ସୂଚନା ଦେଇଛନ୍ତି। ଗତ ୪ ତାରିଖ ରାତିରେ ସମ୍ପୃକ୍ତ ଅଭିଯୁକ୍ତମାନେ ବଣ୍ଡାକୁଟ୍ରା ସାପ୍ତାହିକ ବଜାର ନିକଟରେ ଏକ ବାଇକ୍ରେ ଆସୁଥିବା ଚିଚୈଗୁଡା ଗ୍ରାମର ୨ ଭାଇଙ୍କୁ ଆକ୍ରମଣ କରି ଟଙ୍କା, ମୋବାଇଲ ଓ ବାଇକ ଲୁଟି ଚମ୍ପଟ ମାରିଥିଲେ। ଅଭିଯୋଗ ପରେ ଜୁନାଗଡ଼ ଥାନା ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ପୂର୍ବୁରୁ ମଧ୍ୟ ଅଭିଯୁକ୍ତଙ୍କ ନାମରେ ବିଭିନ୍ନ ଥାନାରେ ମାମଲା ରହିଥିବା ଜଣାପଡିଛି।
