ଲକ୍ଷ୍ନୌ,୧୭।୪: ମାଫିଆ ଅତିକ୍ ଅହମ୍ମଦ ଏବଂ ଅଶ୍ରଫ୍ ମହମ୍ମଦଙ୍କ ୩ ହତ୍ୟାକାରୀଙ୍କୁ ସୋମବାର ନୌନୀ ଜେଲରୁ ପ୍ରତାପଗଡ ଜେଲକୁ ସ୍ଥାନାନ୍ତର କରାଯାଇଛି। ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଅତିକ୍ଙ୍କ ହତ୍ୟା କରିଥିବା ଏହି ତିନିଜଣଙ୍କୁ ପ୍ରୟାଗରାଜ ଜେଲରେ ଆକ୍ରମଣ କରାଯାଇପାରେ। ତେଣୁ ଅଭିଯୁକ୍ତଙ୍କ ସୁରକ୍ଷାକୁ ଦୃଷ୍ଟିରେ ରଖି ସମସ୍ତ ଅଭିଯୁକ୍ତଙ୍କୁ ପ୍ରତାପଗଡ ଜେଲକୁ ସ୍ଥାନାନ୍ତର କରାଯାଇଛି।
ସୂଚାନଯୋଗ୍ୟ, ଅତିକ୍ଙ୍କୁ ହତ୍ୟା କରିଥିବା ସନ୍ନି ସିଂ, ଅରୁଣ ମୌର୍ଯ୍ୟ ଏବଂ ଲବଲେଶ ତିୱାରୀଙ୍କୁ ରବିବାର ୧୪ ଦିନ ପାଇଁ ନ୍ୟାୟିକ ହେପାଜତକୁ କୋର୍ଟ ପଠାଇଛନ୍ତି। ଏଥିସହ ଏହି ହତ୍ୟା ଘଟଣାର ତଦନ୍ତ ପାଇଁ ଅତିରିକ୍ତ ସିପି କ୍ରାଇମ ସତୀଶ ଚନ୍ଦ୍ରଙ୍କ ନେତୃତ୍ୱରେ ପ୍ରୟାଗରାଜ କମିଶନର ଏକ ସ୍ବତନ୍ତ୍ର ଅନୁସନ୍ଧାନକାରୀ ଦଳ (ଏସ୍ଆଇଟି) ଗଠନ କରିଛନ୍ତି। ଏହି ଏସ୍ଆଇଟରେ ମୋଟ୍ ତିନିଜଣ ସଦସ୍ୟ ଅଛନ୍ତି।