ଭୁବନେଶ୍ୱର,୧୮।୧୦(ବ୍ୟୁରୋ): ରାଜ୍ୟରେ ଦାଦାବଟି ବନ୍ଦ କରିବାକୁ ପୋଲିସ ଡିଜି ଅଭୟ ଶୁକ୍ରବାର ନିର୍ଦ୍ଦେଶ ଦେବାପରେ ଶନିବାର ପଦକ୍ଷେପ ଆରମ୍ଭ କରିଛି କମିଶନରେଟ ପୋଲିସ୍। ‘ଦାଦାବଟିକୁ ନା’ ସ୍ପେଶାଲ ଡ୍ରାଇଭ୍ର ପ୍ରଥମ ଦିନରେ ଗ୍ୟାଙ୍ଗ୍ଷ୍ଟର ରାଜା ଆଚାର୍ଯ୍ୟଙ୍କୁ ଗିରଫ କରିଛି କ୍ୟାପିଟାଲ ଥାନା ପୋଲିସ। ଏଥିସହ ତାଙ୍କର ଦୁଇ ସହଯୋଗୀ ବଡ଼ଗଡ଼ ଅଧେଇ ଖାଲ ବସ୍ତିର ବିନୟ ଦାଶ ଓ ଶିରିପୁର ଛକରେ ରହୁଥିବା ନୃସିଂହ ବେହେରାଙ୍କୁ ମଧ୍ୟ ଗିରଫ କରାଯାଇଛି। ଘଟଣାସ୍ଥଳଳୁ ପୋଲିସ ଶାବଳ, ବାଉଁଶ, ଜରିପାଲ ସହ ରାଜା ବ୍ୟବହାର କରୁଥିବା ବାଇକ ଜବତ ହୋଇଛି। ପୋଲିସ ଆଇପିସି ଦଫା ୩୮୬ରେ ମାମଲା (ନଂ.୪୧୩/୨୦) ରୁଜୁ କରି ୩ ଅଭିଯୁକ୍ତଙ୍କୁ କୋର୍ଟଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ସେମାନଙ୍କୁ ଝାରପଡା ଜେଲକୁ ପଠାଇ ଦିଆଯାଇଛି। ଏଥିସହ ରାଜାଙ୍କ ବିରୋଧରେ ପୋଲିସ ସିଆର୍ପିସି ୧୧୦ ଲଗାଇବାକୁ କମିଶନରେଟ ପୋଲିସର ବରିଷ୍ଠ ଅଧିକାରୀସ୍ତରରେ ବିଚାରବିମର୍ଶ ଚାଲିଥିବା ଜଣାପଡିଛି।
ପୋଲିସ ସୂଚନା ଅନୁସାରେ, ୟୁନିଟ୍-୨ ମାର୍କେଟ ବିଲ୍ଡିଂରେ ରାଜା ଆଚାର୍ଯ୍ୟ ବହୁଦିନ ହେବ ପତିଆରା ଜମାଇବା ସହ ବ୍ୟବସାୟୀଙ୍କୁ ଡରାଇ ନିୟମିତ ଦାଦାବଟି ଆଦାୟ କରୁଥିଲେ। ମାର୍କେଟ ସଂଲଗ୍ନ ସରକାରୀ କ୍ୱାର୍ଟର୍ସ ପାର୍ଶ୍ୱ ସରକାରୀ ଜାଗା ଓ ରାସ୍ତାକୁ ଜବରଦଖଲ କରି ଅନ୍ୟ ଭେଣ୍ଡରମାନଙ୍କୁ ବ୍ୟବସାୟ କରିବାକୁ ଦେଇ ମାସିକିଆ ବଟି ନେଉଥିଲେ। ନିକଟରେ ଏକ ସରକାରୀ କ୍ୱାର୍ଟର୍ସ ପାର୍ଶ୍ୱକୁ ଜବରଦଖଲ କରି ଘର କରୁଥିବାବେଳେ ସେଠାରେ ରହୁଥିବା ସରକାରୀ କର୍ମଚାରୀ ଜଣକ ବିରୋଧ କରିଥିଲେ। ଫଳରେ ଶୁକ୍ରବାର ରାତିରେ ରାଜା ଓ ତା’ର ସହଯୋଗୀ ତାଙ୍କ ଘର ଭିତରକୁ ପଶି ହତ୍ୟା ଧମକ ଦେଇଥିଲେ। ଶନିବାର ସକାଳୁ ରାଜାର ସହଯୋଗୀମାନେ ସେଠାରେ ଘର କରୁଥିବା ସମୟରେ କ୍ୟାପିଟାଲ ଥାନାର ପୋଲିସ ଟିମ୍ ଚଢ଼ାଉ କରି ସେମାନଙ୍କୁ ଥାନାକୁ ଉଠାଇନେଇଥିଲା। ଏଥିସହ ବିଏମ୍ସି କର୍ମଚାରୀ ସହାୟତାରେ ନିର୍ମାଣାଧୀନ ଘରକୁ ଭଙ୍ଗାଯାଇଥିଲା। ଗ୍ୟାଙ୍ଗଷ୍ଟର ରାଜାଙ୍କ ନିର୍ଦ୍ଦେଶରେ ସେମାନେ ଉକ୍ତ ସରକାରୀ ଜାଗା ଜବରଦଖଲ ସହ ଅସ୍ଥାୟୀ ଘର କରୁଥିବା ଜଣାପଡ଼ିବା ପରେ ପୋଲିସ ତାଙ୍କୁ ପଚରାଉଚରା ପାଇଁ ଥାନାକୁ ଡାକି ଗିରଫ କରିଥିଲା। ତେବେ ଥାନା ଭିତରେ ରାଜା ପୋଲିସ ସହିତ ଉଚ୍ଚସ୍ବରରେ କଥା ହେବା ସହ କୋର୍ଟଚାଲାଣବେଳେ ଗଣମାଧ୍ୟମ ପ୍ରତିନିଧିଙ୍କ ଉପରକୁ ଫାଇଲ୍ ଫିଙ୍ଗି ଗାଳିଗୁଲଜ କରିଥିଲେ। ଏନେଇ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ କହିଛନ୍ତି, ରାଜା ସରକାରୀ ଜମିରେ ଘର ତିଆରି କରିବା ସହ ପ୍ରତି ମାସରେ ୨୦ ହଜାର ଟଙ୍କା ଦାଦାବଟି ଆଦାୟ କରୁଥିଲେ। ତେବେ ଦାଦାବଟି ଅଭିଯୋଗ ଆସିଲେ କାହାକୁ ଛଡାଯିବନି ବୋଲି ଷଡ଼ଙ୍ଗୀ ଚେତାବନୀ ଦେଇଛନ୍ତି।