ନୂଆଦିଲ୍ଲୀ,୬।୭: ଇଂଲଣ୍ଡ କ୍ରିକେଟ ଟିମ୍ର ପୂର୍ବତନ ଅଧିନାୟକ ନାସିର ହୁସେନ ଭାରତୀୟ ଟିମ୍ର ପୂର୍ବ ଅଧିନାୟକ ସୌରଭ ଗାଙ୍ଗୁଲିଙ୍କୁ ଘୃଣା କରୁଥିଲେ। ଏହା ପଛରେ ଭିନ୍ନ କାରଣ ଥିଲା। ଷ୍ଟାର ସ୍ପୋଟ୍ସର ଏକ ଶୋ’ରେ ହୁସେନ ସେ ନେଇ ଖୁଲାସା କରିଥିଲେ।
ସେ କହିଥିଲେ, ଭାରତ-ଇଂଲଣ୍ଡ ଟିମ୍ ଖେଳିବା ସମୟର ଅନେକ ସ୍ମରଣୀୟ ମୂହୁର୍ତ୍ତ ରହିଛି। ସେ ଖେଳିବା ସମୟରେ ଗାଙ୍ଗୁଲି ସ୍ବଭାବରେ ନମ୍ର ଥିଲେ। ଭାରତୀୟ ଟିମ୍କୁ ସେ ଶକ୍ତିଶାଳୀ ଦଳରେ ପରିଣତ କରିଥିଲେ। ଏଣୁ ତାଙ୍କ ଦଳ ସହ ଖେଳିବା, କୌଣସି ଯୁଦ୍ଧ ଲଢ଼ିବାଠାରୁ କମ୍ ନ ଥିଲା। ହେଲେ ଗାଙ୍ଗୁଲି ସବୁବେଳେ ତାଙ୍କୁ ଟସ୍ ପାଇଁ ଅପେକ୍ଷା କରାଉଥିଲେ। ଏହାକୁ ନେଇ ସେ ତାଙ୍କୁ ଘୃଣା କରୁଥିଲେ। ଏବେ ସେ ଦଶ ବର୍ଷରୁ ଅଧିକ ସମୟ ଧରି ଗାଙ୍ଗୁଲିଙ୍କ ସହ କମେଣ୍ଟ୍ରି କରୁଛନ୍ତି। ବାସ୍ତବରେ ଗାଙ୍ଗୁଲି ଜଣେ ସୁନ୍ଦର ମଣିଷ। ସର୍ବଦା ସେ ଶାନ୍ତ ରୁହନ୍ତି। ହେଲେ ଏବେ ବି କମେଣ୍ଟ୍ରି କରିବାକୁ ବିଳମ୍ବ କରୁଛନ୍ତି ବୋଲି ସେ କହିଛନ୍ତି।
ଗାଙ୍ଗୁଲି ଭାରତୀୟ ପ୍ରଶଂସକଙ୍କ ମନୋସ୍ଥିତିକୁ ବୁଝିଥିଲେ। ସେ କ୍ରିକେଟକୁ କେବଳ ଏକ ଖେଳ ବୋଲି ଭାବୁ ନ ଥିଲେ। ସେ ନିଜେ ମଜଭୂତ ରହିବା ସହ ସେଭଳି ସଦସ୍ୟଙ୍କୁ ଦଳ ଲାଗି ଚୟନ କରୁଥିଲେ। ଖେଳ ସମୟରେ ତାଙ୍କୁ ଯୁଦ୍ଧ ଲଢ଼ିବା ଭଳି ଲାଗୁଥିଲା। ହେଲେ ମ୍ୟାଚ୍ ଶେଷ ହେବା ପରେ ସେ ବେଶ୍ ଭଲରେ ମିଶୁଥିଲେ ବୋଲି ହୁସେନ୍ କହିଛନ୍ତି।