ମଣିଷ ହୁଅନ୍ତୁ କିମ୍ବା ପଶୁପକ୍ଷୀ। ଭାବିଲେ କାହାର ମୁଣ୍ଡ କଟିଗଲେ ସେ ଦୀର୍ଘଦିନ ଧରି ବଞ୍ଚି ରହିପାରେ କି? ମାତ୍ର ଏକ ଗଞ୍ଜା ସହିତ ଏପରି ଘଟିଛି। ଜାଣିଲେ ଆଶ୍ଚର୍ଯ୍ୟ ହେବେ। ମାଂସ ବିକ୍ରି କରିବା ପାଇଁ ମାଲିକ ଗଞ୍ଜାକୁ ହତ୍ୟା କରିଥିଲେ, କିନ୍ତୁ ଏହା ବିନା ମୁଣ୍ଡରେ ଜୀବନ୍ତ ରହିଲା। ଏହା ଶୁଣିବା ଏକ ଚମତ୍କାରଠାରୁ କମ୍ ନୁହେଁ।
ଯେଉଁମାନେ ମାଂସ ଖାଇବାକୁ ଭଲ ପାଆନ୍ତି, ଆଜି ଆମେ ସେମାନଙ୍କୁ ଏକ ଗଞ୍ଜାର କାହାଣୀ କହିବୁ; ଯାହାକୁ ମାଂସ ପାଇଁ ହତ୍ୟା କରାଯାଇଥିଲା। କିନ୍ତୁ ଏହା ସହିତ ଯାହା ଘଟିଲା, ତାହା ଏକ ଚମତ୍କାର ହୋଇଗଲା। ଗଞ୍ଜାର ମୁଣ୍ଡ କଟାଯାଇଥିଲେ ମଧ୍ୟ ଏହା ମରି ନ ଥିଲା। ଏପରିକି ଏହାର ମାଲିକ ମଧ୍ୟ ଏହି ଦୃଶ୍ୟ ଦେଖି ଆଶ୍ଚର୍ଯ୍ୟ ହୋଇଗଲେ। ଏହା କାହାଣୀ ନୁହେଁ, ସତ ଘଟଣା।
ରିପୋର୍ଟ ଅନୁଯାୟୀ, ଏହି ମାମଲା ଆମେରିକାର କଲରାଡୋରୁ ଆସିଛି। ଯେଉଁଠାରେ ଲୟଡ଼ ଓଲସେନ ଏବଂ କ୍ଲାରା ନାମକ ଦମ୍ପତି ରହୁଥିଲେ। ଥରେ ସେ ମାଂସ ପାଇଁ ସମୁଦାୟ ୫୦ଟି କୁକୁଡ଼ା ମାରିଦେଲେ କିନ୍ତୁ ସେମାନଙ୍କ ମଧ୍ୟରୁ ଗୋଟିଏ ଗଞ୍ଜା ଜୀବିତ ଏବଂ ସକ୍ରିୟ ଥିବା ଦେଖି ଦମ୍ପତି ଆଶ୍ଚର୍ଯ୍ୟ ହୋଇଗଲେ। ସେ ଏହି ମୁଣ୍ଡବିହୀନ କୁକୁଡ଼ାକୁ ରାତିସାରା ଏକ ଆପଲ ବାକ୍ସରେ ରଖିଥିଲେ। ସେମାନେ ଭାବିଲେ ଯେ, କମ୍ ସମୟ ମଧ୍ୟରେ ସେ ନିଶ୍ଚିତ ଭାବରେ ମରିଯିବ। ତା’ ପରଦିନ ଯେତେବେଳେ ସେମାନେ ବାକ୍ସ ଖୋଲିଲେ ଗଞ୍ଜାଟି ଜୀବିତ ଥିଲା।
ସବୁଠାରୁ କୌତୂହଳର ବିଷୟ ହେଉଛି, ସେ କେବଳ ୨-୪ ସପ୍ତାହ ନୁହେଁ ବରଂ ମୋଟ୍ ୧୮ ମାସ ପର୍ଯ୍ୟନ୍ତ ମୁଣ୍ଡ ବିନା ବଞ୍ଚିଥିଲା। ଜଣେ ବ୍ୟକ୍ତି ଏହାକୁ ଦେଖିବା ପାଇଁ ୩୦୦ ମାଇଲରୁ ଆସିଥିଲେ ଏବଂ ସେ ଏହ ଗଞ୍ଜା ଉପରେ ଏକ ସ୍ଲାଇଡ୍ ଶୋ’ ତିଆରି କରି ମଧ୍ୟ ଟଙ୍କା ରୋଜଗାର କରିଥିଲେ।
