ପୁରୁଷୋତ୍ତମପୁର,୨୩।୩(ଡି.ଏନ.ଏ): ଗଞ୍ଜାମ ଜିଲାର ପ୍ରସିଦ୍ଧ ଇଷ୍ଟଦେବୀ ମା’ ତାରାତାରିଣୀ ପୀଠରେ ବାସନ୍ତୀକ ନବରାତ୍ର ପର୍ବ ଲାଗି ବୁଧବାର ରାତ୍ରରୁ ଚଳଚଞ୍ଚଳ ହୋଇ ଉଠିଛି। ପଣ୍ଡିତଙ୍କ ବେଦ ଧ୍ବନିରେ ରତ୍ନଗିରି ପାହାଡ ପ୍ରକମ୍ପିତ ହେବାରେ ଲାଗିଛି। ଏହି ପର୍ବ ଚୈତ୍ର ପ୍ରତିପଦା ଠାରୁ ଶ୍ରୀରାମ ନବମୀ ପର୍ଯ୍ୟନ୍ତ ଚାଲିବ। ଏହି ନବଦିନ ବ୍ୟାପି ସେବାୟତଙ୍କ ଦ୍ୱାରା ଦୈନନ୍ଦିନ ନିତିକାନ୍ତି ସହ ମା’ଙ୍କ ମୁଖ୍ୟ ପୁରୋହିତ ପଣ୍ଡିତ ସୀମାଞ୍ଚଳ ଦାଶ ଶର୍ମାଙ୍କ ଦ୍ୱାରା ପରମ୍ପରା ପ୍ରକାରେ ସ୍ବତନ୍ତ୍ର ଷୋଡଶ ଉପଚାର, ଚଣ୍ଡି ପାଠ, ମଣ୍ଡଳ ଦେବତା ପୂଜା ଓ ହୋମଯଜ୍ଞ ଆଦି କାର୍ଯ୍ୟ ପରମ୍ପରା ପ୍ରକାରେ ପର୍ଯ୍ୟାୟ କ୍ରମେ ହେବାରେ ଲାଗିଛି। ମା’ ତାରାତାରିଣୀ ଦୁଇ ଭଉଣୀଙ୍କ ପ୍ରତିମାକୁ ରତ୍ନ ସିଂହାସନରୁ ଓହ୍ଲାଇ ୨୧ ପାହାଛ ପହଣ୍ଡି ବିଜେ କରାଇ ମହାବେଦୀ ଯଜ୍ଞସ୍ଥଳକୁ ଅଣାଯାଇ ପୂଜାର୍ଚ୍ଚନା କରାଯାଏ। ପୁଣି ପହଣ୍ଡି ବିଜେ କରାଇ ରତ୍ନ ସିଂହାସନକୁ ଫେରାଇ ନିଆଯାଏ। ଅଶୋକା ଅଷ୍ଟମୀରେ ସ୍ବତନ୍ତ୍ର ପୂଜା ସହ ମା’ଙ୍କ ମହାଦୀପ ଉଠିବ। ମୁଖ୍ୟ ପୁରୋହିତଙ୍କ ସହ ବହୁ ପଣ୍ଡିତ ଉପସ୍ଥିତ ରହି ପୂଜାର୍ଚ୍ଚନା କରୁଥିବାବେଳେ କର୍ତ୍ତା ଭାବେ ସେବାୟତ ସଂଘ ସଭାପତି ତପନ କୁମାର ରଣା ରହିଛନ୍ତି। ଏହା ସହ ସେବାୟତ ବାପୁଜୀ ରଣା, ଧୃବ ରଣାଙ୍କ ସମେତ ସମସ୍ତ ସେବାୟତ ଓ ତାଙ୍କ ପରିବାର ସହଯୋଗ କରିବାରେ ଲାଗିଛନ୍ତି। ଏହାକୁ ମନ୍ଦିର ନିର୍ବାହୀ ଅଧିକାରୀ ଟିକେ ରେଡି, ଉନ୍ନୟନ ପରିଷଦ ସମ୍ପାଦକ ପ୍ରମୋଦ କୁମାର ପଣ୍ଡା ପରିଚାଳନା କରୁଥିବାବେଳେ ଦେବୋତ୍ତର ବିଭାଗୀୟ ଇନ୍ସପେକ୍ଟର ପୁଷ୍ପିତା ବେହେରା ଆସି ତଦାରଖ କରିଛନ୍ତି।