ବ୍ରହ୍ମପୁର, ୨୯।୩ : ଗଞ୍ଜାମ ଓକିଲ ସଂଘର ନିର୍ବାଚନ ୨୦୨୫-୨୬ ପାଇଁ ଶନିବାର ଭୋଟ ଗ୍ରହଣ ହୋଇଛି। ସଭାପତି ଭାବେ ବରିଷ୍ଠ ଆଇନଜୀବୀ ମନୋଜ ପଟ୍ଟନାୟକ ବିଜୟୀ ହୋଇଛନ୍ତି। ସେହିପରି ସମ୍ପାଦକ ଭାବେ ଆଇନଜୀବୀ ଟି. ଭେଙ୍କଟ ରାଓ ବିଜୟୀ ହୋଇଥିବା ନିର୍ବାଚନ ଅଧିକାରୀ ମୋହନ ସିଙ୍ଗାରୀ ଘୋଷଣା କରିଛନ୍ତି। ଫଳାଫଳ ଘୋଷଣା ପରେ ବିଜୟୀ ପ୍ରାର୍ଥୀଙ୍କୁ ଆଇନଜୀବୀମାନେ ଅଭିନନ୍ଦନ ଜ୍ଞାପନ କରିଛନ୍ତି।
ସଭାପତି ପଦ ପାଇଁ ଆଇନଜୀବୀ ଶ୍ରୀ ପଟ୍ଟନାୟକ, କପିଳେଶ୍ବର ପଟ୍ଟନାୟକ ଓ ସୀତାଂଶୁ ଶେଖର ପଣ୍ଡାଙ୍କ ମଧ୍ୟରେ ପ୍ରତିଦ୍ବନ୍ଦ୍ବିତା ହୋଇଥିଲା। ସଭାପତି ଭାବେ ନିର୍ବାଚିତ ହୋଇଥିବା ଆଇନଜୀବୀ ଶ୍ରୀ ପଟ୍ଟନାୟକ ୫୬୯ ଭୋଟ ପାଇଥିବା ବେଳେ ତାଙ୍କର ନିକଟତମ ପ୍ରତିଦ୍ବନ୍ଦ୍ବୀ ଶ୍ରୀ ପଣ୍ଡା ୪୭୮ ଭୋଟ ପାଇଛନ୍ତି। ସେହିପରି ଉପସଭାପତି ପଦ ପାଇଁ ପ୍ରତିଦ୍ବନ୍ଦ୍ବିତା କରିଥିବା ଆଇନଜୀବୀ ତ୍ରିମୁଲ କୁମାର ରେଡ୍ଡି ୭୧୭ ଭୋଟ ପାଇ ବିଜୟୀ ହୋଇଛନ୍ତି। ଅନ୍ୟତମ ପ୍ରତିଦ୍ବନ୍ଦୀ ଅନୀଲ କୁମାର ପଣ୍ଡା ୫୧୩ ଭୋଟ ପାଇଥିବା ବେଳେ ସତ୍ୟନାରାୟଣ ବସନ୍ତିଆ ୨୦୦ ଭୋଟ ପାଇଛନ୍ତି। ସମ୍ପାଦକ ଭାବେ ଶ୍ରୀ ରାଓ ୭୫୩ ଭୋଟ ପାଇ ବିଜୟୀ ହୋଇଥିବା ବେଳେ ତାଙ୍କର ନିକଟତମ ପ୍ରତିଦ୍ବନ୍ଦ୍ବୀ ଜଗନ୍ନାଥ ମିଶ୍ର ୬୦୭ ଭୋଟ ପାଇଛନ୍ତି। ଅନ୍ୟ ଦୁଇଜଣ ପ୍ରତିଦ୍ବନ୍ଦ୍ବୀ ହେଲେ ଆଇନଜୀବୀ ଶ୍ୟାମ ସୁନ୍ଦର ସାହୁ ଓ ୱାଇ. ଶ୍ରୀରାମୁଲୁ ପାତ୍ର। ସେହିପରି ଯୁଗ୍ମସମ୍ପାଦକ ପଦ ପାଇଁ ଆଇନଜୀବୀ ଅସିତ ସାବତ ଓ ରଂଜନ କୁମାର ସାମନ୍ତରାୟଙ୍କ ମଧ୍ୟରେ ଲଢେଇ ହୋଇଥିଲା। ଯୁଗ୍ମସମ୍ପାଦକ ଭାବେ ଶ୍ରୀ ସାବତ ୮୦୨ ଭୋଟ ପାଇ ବିଜୟୀ ହୋଇଥିବା ବେଳେ ଶ୍ରୀ ସାମନ୍ତରାୟ ୬୩୩ ଭୋଟ ପାଇଛନ୍ତି। ଶନିବାର ସକାଳ ୯ଟା ବେଳେ ନିର୍ବାଚନ ଅଧିକାରୀ ଶ୍ରୀ ସିଙ୍ଗାରୀଙ୍କ ତତ୍ତ୍ବାବଧାନରେ ଭୋଟ ଗ୍ରହଣ ଆରମ୍ଭ ହୋଇଥିଲା। ଭୋଟ ଗ୍ରହଣ ସରିବା ପରେ ଅପରାହ୍ଣ ୪ଟାରେ ଗଣତି ଆରମ୍ଭ ହୋଇଥିଲା। ମୋଟ ୧୪୪୩ ଆଇନଜୀବୀ ଭୋଟ ଦେଇଥିଲେ।
