ନୂଆଦିଲ୍ଲୀ, ୧୨।୯: ରାଜଧାନୀ ଦିଲ୍ଲୀର ପୂର୍ବ ଅଞ୍ଚଳରେ ଥିବା ଗାଜିପୁରର ଏସିଆର ବୃହତମ ଆବର୍ଜନା ପାହାଡ଼ ସମତଳ କରାଯିବ। ମାଟି ଉପରେ ଏହାକୁ ସ୍ତର ସ୍ତର କରି ବିଛାଇ ଦିଆଯିବ। ୭୦ ଏକର ପରିମିତ ଜମିରେ ଥିବା ଏହି ଆବର୍ଜନା ପାହାଡ଼ର ଉଚ୍ଚତା ଗତ ଏକ ବର୍ଷ ମଧ୍ୟରେ ପ୍ରଥମ ଥର ପାଇଁ ବଢ଼ିବା ବଦଳରେ କମିବାକୁ ଆରମ୍ଭ କରିଛିି। ଏହାକୁ ସମତଳ କରିବା କାର୍ଯ୍ୟ ଜାରି ରହିବା ଯୋଗୁ ଆବର୍ଜନା ପାହାଡ଼ର ଲମ୍ବ ଏବେ ବଢୁଥିବା କୁହାଯାଉଛି। ଗତ ଏକ ବର୍ଷ ମଧ୍ୟରେ ଆବର୍ଜନା ପାହାଡ଼ର ଉଚ୍ଚତା ୧୨.୫ ମିଟର କମିଛି। ଏବେ ଏହାର ଉଚ୍ଚତା ୫୩ ମିଟର ରହିଛି। ଏକ ବର୍ଷ ପୂର୍ବରୁ ଏହା ୬୫ ମିଟର ଉଚ୍ଚ ଥିଲା। ପ୍ରତିଦିନ ଏଠାରେ ୨୬୦୦ଟନ୍ର ବର୍ଜ୍ୟ ଗଦା ହୋଇଥାଏ। ଗତ ଏକବର୍ଷ ଧରି ଜାତୀୟ ସବୁଜ ପ୍ରାଧିକରଣ ନିର୍ଦ୍ଦେଶକୁ ପାଳନ କରାଯାଇ ପ୍ରତିଦିନ ଏଠାରେ ୧୨୦୦ ଟନ୍ ଆବର୍ଜନାର ସମତଳିକରଣ କାର୍ଯ୍ୟ କରାଯାଉଥିଲା। ସାଂସଦ ଗୌତମ ଗମ୍ଭୀର ଏବେ ଏଠାରେ ୬ଟି ମେସିନ୍ ଲୋକାର୍ପଣ ମଧ୍ୟ କରିଛନ୍ତି। ଫଳରେ ପ୍ରତିଦିନ ୨୪୦୦ ଟନ୍ ଆବର୍ଜନାକୁ ସମତଳ କରାଯାଇ ପାରିବ ବୋଲି ଆକଳନ କରାଯାଇଛି। ଏଭଳି ଭାବେ କାର୍ଯ୍ୟ ଜାରି ରହିଲେ ଆସନ୍ତା ୧୬ ବର୍ଷ ମଧ୍ୟରେ ଆବର୍ଜନା ପାହାଡ଼ ସମ୍ପୂର୍ଣ୍ଣ ଭାବେ ସମତଳ ହୋଇଯିବ ବୋଲି କୁହାଯାଉଛି।
