କେନ୍ଦୁଝର ପୌରପାଳିକା
କେନ୍ଦୁଝର,୧୮।୪(ସ୍ବ.ପ୍ର.)କେନ୍ଦୁଝର ଜିଲା ମୁଖ୍ୟାଳୟ ତଥା ପୌରପାଳିକାରେ ସାଇକେଲରେ ବୁହା ହେଉଛି ଅଳିଆ। ମଇଳା ଆବର୍ଜନା ସଫେଇ ପାଇଁ ଠିକ ସଂସ୍ଥା ଜରିଆରେ ଲକ୍ଷରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ କରାଯାଉଥିବା ବେଳେ ସଫେଇ କର୍ମଚାରୀମାନଙ୍କୁ ଟ୍ରଲି ଗାଡ଼ି ଦିଆଯାଉନାହିଁ। ଏଥିସହ ସୁରକ୍ଷା ଉପକରଣ ମଧ୍ୟ ମିଳୁନାହିଁ। ଫଳରେ ସହରରେ କିପରି ସଫେଇ କାମ ଚାଲିଛି ବେଶ ଅନୁମାନ କରିହେବ। ରବିବାର ୧୪ ନଂ. ଓ୍ବାର୍ଡରେ ଜଣେ କର୍ମଚାରୀ ସାଇକେଲରେ ମଇଳା ଆବର୍ଜନା ଉଠାଉଥିବା ନଜରକୁ ଆସିଥିଲା। କର୍ମଚାରୀମାନଙ୍କୁ ଠିକ୍ ମାନର ଗ୍ଲୋଭସ, ମାସ୍କ, ଜୋତା ଭଳି ନିୟମାନୁଯାୟୀ ସୁରକ୍ଷା ଉପକରଣ ମିଳୁନାହିଁ। ଫଳରେ ସେମାନଙ୍କ ସ୍ବାସ୍ଥ୍ୟ ପ୍ରତି ବିପଦ ରହୁଛି। ସେହିପରି କମ ମଜୁରି ପ୍ରଦାନ କରାଯାଉଥିବା ବେଳେ ଠିକ ପ୍ରତିଶତ ଇପିଏଫ, ଇଏସ୍ଆଇ ମଧ୍ୟ ଜମା ହେଉ ନ ଥିବା ଅଭିଯୋଗ କରିଛନ୍ତି। ସଫେଇ କାମ ବାହାର ଠିକା ସଂସ୍ଥା କରୁଥିବା ବେଳେ କେତେକ କାଉନ୍ସିଲର ସୁବିଧା ପାଇ ଏଥି ପ୍ରତି ମୁହଁ ଖୋଲୁ ନାହାନ୍ତି। ମୁହଁ ଖୋଲିଲେ କାମ ଚାଲିଯିବା ଭୟରେ କର୍ମଚାରୀମାନେ ଭାଗ୍ୟକୁ ଆଦରି ପଡ଼ିରହିଛନ୍ତି। ଏନେଇ ପାୈରପାଳିକା ନିର୍ବାହୀ ଅଧିକାରୀ ଦାୟିତ୍ୱରେ ଥିବା ଧିମନ ଚକମା କର୍ମଚାରୀଙ୍କ ସମସ୍ୟାକୁ ନେଇ ପଦକ୍ଷେପ ନେବେ ବୋଲି ଆଶ୍ୱାସନା ଦେଇଥିବାରୁ କର୍ମଚାରୀମାନେ ଆଶାବାଦୀ ରହିଛନ୍ତି ।
ବେଆଇନ ନିର୍ମାଣ ଉପରେ କାର୍ଯ୍ୟାନୁଷ୍ଠାନ
କେନ୍ଦୁଝର ପୌରାଞ୍ଚଳରେ ଚାଲିଥିବା ବ୍ୟାପକ ଅବ୍ୟବସ୍ଥା ଓ ଅନିୟମତତାକୁ ନେଇ ଜନ ଅସନ୍ତୋଷ ବଢୁଥିଲା। ଦୀର୍ଘ ବର୍ଷର ଅସନ୍ତୋଷ ଲାଗି ରହିଥିବା ବେଳେ ନିକଟରେ ନିର୍ବାହୀ ଅଧିକାରୀ ଭାବେ ଧୀମନ ଚକମା ଦାୟିତ୍ୱ ନେବା ପରେ ଚାଲିଥିବା ଧରପଗଡ଼କୁ ନେଇ ଲୋକେ ଆସ୍ବସ୍ଥ ହୋଇଛନ୍ତି। ପୌରପାଳିକାରେ ସଫେଇ କର୍ମଚାରୀଙ୍କ ସମସ୍ୟା ଶୁଣିବା ସହ ଅନୁମୋଦିତ ହୋଇଥିବା ବେଆଇନ ପ୍ଲାନ୍ ଅନୁଧ୍ୟାନ କରୁଛନ୍ତି। ବିନା ପ୍ଲାନ୍ରେ ଏବଂ ପାର୍କିଂ ବ୍ୟବସ୍ଥାରେ ନିର୍ମାଣ ହୋଇଥିବା ବ୍ୟବସାୟିକ କୋଠା, ଶିକ୍ଷାନୁଷ୍ଠାନକୁ ନୋଟିସ୍ କରିବା ସହ ବେଆଇନ ଜବରଦଖଲ ଓ ନିର୍ମାଣ ଉପରେ କଡ଼ା କାର୍ଯ୍ୟାନୁଷ୍ଠାନ ଆରମ୍ଭ କରିଛନ୍ତି। ଯାହାକୁ ନେଇ ସହରବାସୀ ସାଧୁବାଦ ଦେଇଛନ୍ତି ।