ଓ୍ବାଶିଂଟନ,୯।୩ : ଏରିକ ଗାର୍ସେଟି ଭାରତରେ ଆମେରିକାର ରାଷ୍ଟ୍ରଦୂତ ହେବା ନିଶ୍ଚିତ ହୋଇଛି। ସିନେଟ କମିଟି ତାଙ୍କ ନାମାଙ୍କନକୁ ଅନୁମୋଦନ କରିଛି। ସିନେଟର ବୈଦେଶିକ ସମ୍ପର୍କ କମିଟି, ଆମେରିକା କଂଗ୍ରେସ (ସଂସଦ)ର ଉଚ୍ଚ ସଦନରେ ଭାରତରେ ରାଷ୍ଟ୍ରଦୂତଙ୍କ ପାଇଁ ଲସ ଏଞ୍ଜେଲ୍ସର ପୂର୍ବତନ ମେୟର ଏରିକ ଗାର୍ସେଟିଙ୍କ ନାମକୁ ମଞ୍ଜୁର କରିଛି। ଆମେରିକାର ଗଣମାଧ୍ୟମ ଅନୁଯାୟୀ, ସିନେଟ କମିଟି ଗାର୍ସେଟିଙ୍କ ସପକ୍ଷରେ ମତ ଦେଇଥିଲେ। ଏଥିସହ ତାଙ୍କ ନାମ ସିନେଟକୁ ପଠାଯାଇଛି।
ରିପୋର୍ଟ ଅନୁଯାୟୀ, କମିଟି ବୁଧବାର ଦିନ ୧୩-୮ ବ୍ୟବଧାନରେ ଗାସେର୍ଟିଙ୍କ ନାମାଙ୍କନକୁ ଅନୁମୋଦନ କରିଛି। ରିପବ୍ଲିକାନ ସିନେଟର ଟଡ ୟଙ୍ଗ ଏବଂ ବିଲ ହେଗର୍ଟି ମଧ୍ୟ ଗାର୍ସେଟିଙ୍କ ସପକ୍ଷରେ ମତ ଦେଇଛନ୍ତି। ଆମେରିକାର ବୈଦେଶିକ ବିଭାଗ ମୁଖପାତ୍ର ନେଡ ପ୍ରାଇସ କହିଛନ୍ତି ଯେ ଆଜି ଆମେ ସିନେଟରୁ କାର୍ଯ୍ୟାନୁଷ୍ଠାନ ଦେଖିଛୁ। ଆମେ ହୃଦୟରୁ ଏହାକୁ ପ୍ରଶଂସା କରୁଛୁ। ଆମେରିକା ଭାରତରେ ଏକ ସ୍ଥାୟୀ ରାଷ୍ଟ୍ରଦୂତ ଆବଶ୍ୟକ କରେ।
ସ୍ଥାୟୀ ରାଷ୍ଟ୍ରଦୂତ ରହିବା ଉଭୟ ଦେଶର ହିତରେ ରହିବ ବୋଲି ପ୍ରାଇସ କହିଛନ୍ତି। ଆମେ ଆଶା କରୁଛୁ ଭବିଷ୍ୟତର ରାଷ୍ଟ୍ରଦୂତ ଏରିକ ଗାର୍ସେଟି ଶୀଘ୍ର ଏହି ପଦବୀ ଗ୍ରହଣ କରିବାକୁ ସକ୍ଷମ ହେବେ। ସେ କହିଛନ୍ତି ଯେ ବିଶ୍ୱରେ କୌଣସି ଦେଶ ନାହିଁ ଯାହା ଭାରତ ଭଳି ରଣନୈତିକ ଗୁରୁତ୍ୱପୂର୍ଣ୍ଣ ତଥା ମୂଲ୍ୟବାନ ଦେଶରେ ଦୁଇ ବର୍ଷରୁ ଅଧିକ ସମୟ ପର୍ଯ୍ୟନ୍ତ ରାଷ୍ଟ୍ରଦୂତ ପଦ ଖାଲି ରଖିବ।
ଆମେରିକାର ରାଷ୍ଟ୍ରପତି ଜୋ ବାଇଡେନ ଜୁଲାଇ ୨୦୨୧ ରେ ଗାସେର୍ଟିଙ୍କୁ ଭାରତରେ ରାଷ୍ଟ୍ରଦୂତ ଭାବରେ ମନୋନୀତ କରିଥିଲେ। ବୈଦେଶିକ ସମ୍ପର୍କ କମିଟି ଜାନୁଆରୀ ୨୦୨୨ ରେ ତାଙ୍କ ନାମକୁ ଅନୁମୋଦନ କରିଥିଲା। କିନ୍ତୁ ତାଙ୍କ ନାମାଙ୍କନ ଏକ ବର୍ଷ ପାଇଁ ଲଟକି ରହିଥିଲା। ଅଭିଯୋଗ ଆସିଥିଲା ଯେ ଗାର୍ସେଟି ତାଙ୍କର ଜଣେ ପୂର୍ବତନ ଉପଦେଷ୍ଟାଙ୍କ ଯୌନ ଶୋଷଣ ବିଷୟରେ ଜାଣିଥିଲେ, କିନ୍ତୁ ଏହାକୁ ରୋକିବା ପାଇଁ କୌଣସି ପଦକ୍ଷେପ ନେଇ ନ ଥିଲେ।