ବଜାରରେ ମିଳୁଥିବା ମାଉଥ୍ ଓ୍ବାଶ୍ ଦ୍ୱାରା ଗର୍ଗଲିଂ କଲେ ମୁହଁ ଓ ଗଳାରେ ଥିବା କରୋନା ଭାଇରସ୍ ସଂକ୍ରମଣ କିଛି ମାତ୍ରାରେ ଦୂର ହୋଇଯିବ ବୋଲି ବୈଜ୍ଞାନିକମାନେ ଏକ ଗବେଷଣା ପରେ ଦାବି କରିଛନ୍ତି। ପିଟିଆଇ ରିପୋର୍ଟ ଅନୁଯାୟୀ, ଜର୍ମାନର Ruhr University Bochumର ବୈଜ୍ଞାନିକ ଅନ୍ୟ ଗବେଶକଙ୍କ ସହ ମିଶି ମାଉଥ୍ ଓ୍ବାଶ୍ର ଉପଯୋଗ ଓ କରୋନା ଭାଇରସ୍କୁ ନେଇ ଗବେଷଣା କରିଛନ୍ତି। ଏହି ଗବେଷଣାରୁ ଜଣାପଡ଼ିଛି ଯେ, ମାଉଥ୍ ଓ୍ବାଶ୍ର ବ୍ୟବହାର ଦ୍ୱାରା ଶରୀରରେ କରୋନା ଦୂର ହେବ ବୋଲି ଦାବି କରାଯାଇ ନାହିଁ। କିନ୍ତୁ ବୈଜ୍ଞାନିକଙ୍କ କହିବା କଥା ଯେ, କରୋନା ରୋଗୀଙ୍କ ମୁହଁ ଓ ଗଳାରେ ବହୁ ସଂଖ୍ୟାରେ ଭାଇରସ୍ ରହିଥାନ୍ତି। ତେବେ ଭାଇରସ୍ର କିଛି ଅଂଶକୁ ନିଷ୍କ୍ରିୟ କରିବା ପାଇଁ ମାଉଥ୍ ଓ୍ବାଶ୍ର ବ୍ୟବହାର କରାଯାଇପାରେ। ଏହାଦ୍ୱାରା ମୁହଁ ଓ ଗଳାରେ ଥିବା ଭାଇରସ୍ର ପରିମାଣ କମିଯାଏ ଏବଂ ସୀମିତ ସମୟ ପାଇଁ ସଂକ୍ରମଣ ହେବାର ଆଶଙ୍କା ମଧ୍ୟ କମିଯାଇଥାଏ ବୋଲି ବୈଜ୍ଞାନିକମାନେ କହିଛନ୍ତି। Journal of Infectious Diseasesରେ ଏହି ଗବେଷଣା ପ୍ରକାଶିତ ହୋଇଛି। ଏଥିସହ ବୈଜ୍ଞାନିକମାନେ ଚେତାବନୀ ଦେଇଛନ୍ତି ଯେ, କରୋନା ସଂକ୍ରମଣ ପାଇଁ ମାଉଥ୍ ଓ୍ବାଶ୍ ଉପଯୁକ୍ତ ଚିକିତ୍ସା ନୁହେଁ ଏବଂ ଏହା ସଂକ୍ରମଣକୁ ସମ୍ପୂର୍ଣ୍ଣ ରୂପେ ପ୍ରତିରୋଧ କରିପାରିବ ନାହିଁ। ସଂକ୍ରମଣ ମୁଖ୍ୟତଃ ସଂକ୍ରମିତ ବ୍ୟକ୍ତିଙ୍କ ନିଶ୍ୱାସରୁ ନିର୍ଗତ ହୋଇଥିବା ଭାଇରସ୍ କଣିକାର ସଂସ୍ପର୍ଶରେ ଆସିବା ପରେ ହୋଇଥାଏ। ତେଣୁ ମାଉଥ୍ ଓ୍ବାଶ୍ରେ ଗର୍ଗଲିଂ କରିବା ପରେ ସଂକ୍ରମଣ ହେବାର ସମ୍ଭାବନା କମିଯାଏ। କିନ୍ତୁ ଏହି ବିଷୟ ଉପରେ ଅଧିକ କ୍ଲିନିକାଲ ଗବେଷଣା ଆବଶ୍ୟକ ରହିଛି ବୋଲି ବୈଜ୍ଞାନିକମାନେ କହିଛନ୍ତି।