ଭୋପାଳ,୭ା୨: ଆଜିକାଲି ଭାରତରେ ରସୁଣକୁ ନେଇ ବେଶ୍ ଚର୍ଚ୍ଚା ହେଉଛି। ମଧ୍ୟପ୍ରଦେଶର ଅନେକ ଜିଲାରେ ମଣ୍ଡିରେ ରସୁଣର ମୂଲ୍ୟ ବୃଦ୍ଧି ହେବାର ଖବର ରହିଛି। ଅନେକ ସ୍ଥାନରେ ରସୁଣ ବଜାରରେ କ୍ୱିଣ୍ଟାଲ ପିଛା ୪୦,୦୦୦ଟଙ୍କାରେ ବିକ୍ରି ହେଉଛି। ଏଭଳି ପରିସ୍ଥିତିରେ ରସୁଣ କିଣିବା ସାଧାରଣ ଲୋକଙ୍କ ପାଇଁ ଏକ ସ୍ବପ୍ନ ଭଳି ହୋଇଯାଇଛି। ରସୁଣ ଯାହା ଖାଦ୍ୟକୁ ସ୍ବାଦିଷ୍ଟ କରିଥାଏ, ରୋଷେଇ ଘରୁ ଏବେ ଏହା ଅଦୃଶ୍ୟ ହୋଇଯାଉଛି। ଏହି ସମୟରେ କିଛି କୃଷକ ସେମାନଙ୍କ ରସୁଣ ଫସଲ ଚୋରି ହେବାର ଭିଡିଓ ସୋସିଆଲ ମିଡିଆରେ ଶେୟାର କରିଛନ୍ତି।
View this post on Instagram
ବର୍ତ୍ତମାନ ଉଜୈନ ବଜାରରୁ ଅନେକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଏଥିରେ ବଜାରରେ ରସୁଣ କିଣିବା ପରେ ମିଳିଥିବା ସ୍ଲିପ ଦେଖାଯାଇଥିଲା। ସ୍ଲିପରେ ଏହା ଦେଖିବାକୁ ମିଳେ ଯେ, ରସୁଣର ମୂଲ୍ୟ କିପରି ଆକାଶଛୁଆଁ ହୋଇଛି। ଅନେକ ସ୍ଥାନରେ ରସୁଣ ୪୨ରୁ ୪୫ହଜାର କ୍ୱିଣ୍ଟାଲରେ ବିକ୍ରି ହେଉଥିବା ଦେଖାଯାଇଥିଲା। ଉଜୈନର ଜଣେ କୃଷକ ତାଙ୍କ ଚାଷର ଏକ ଭିଡିଓ ଶେୟାର କରିଛନ୍ତି। ଚାଷୀ କୁହନ୍ତି, କେହି ତାଙ୍କର ସମ୍ପୂର୍ଣ୍ଣ ରସୁଣ ଫସଲ ଚୋରି କରି ନେଇଯାଇଛନ୍ତି।
ଏହି ମାମଲା କଲାଲିଆର ବୋଲି କୁହାଯାଉଛି। ବିଳମ୍ବିତ ରାତିରେ କିଛି ଲୋକ ଗାଁ ଚାଷଜମିକୁ ଆସି ପୂରା ରସୁଣ ଫସଲ ଚୋରି କରି ନେଇଥିଲେ। ଚାଷୀ କୁହନ୍ତି, ଚୋରମାନେ ୪ରୁ୫ ଅଖା ରସୁଣକୁ ଉପାଡ଼ି ନେଇ ପଳାଇଛନ୍ତି। କୃଷକ ରାତି ୧୦ଟା ପର୍ଯ୍ୟନ୍ତ କ୍ଷେତରେ ଥିଲେ। ଆସନ୍ତା ସପ୍ତାହରେ କୃଷକ ଏହାକୁ ଅମଳ କରି ବଜାରରେ ବିକ୍ରି କରିବାକୁ ଯାଉଛନ୍ତି। ଚାଷୀ ଆଶା କରିଥିଲେ, ସେ ଏଥର ଭଲ ଦି’ ପଇସା ରୋଜଗାର କରିବେ। କିନ୍ତୁ ଚୋରମାନେ ରାତି ଅଧରେ ତାଙ୍କର ସମ୍ପୂର୍ଣ୍ଣ ଚାଷଜମି ସଫା କରିଦେଇଛନ୍ତି।
