କେପଟାଉନ,୨୪।୧୨ : ଦକ୍ଷିଣ ଆଫ୍ରିକାର ବକ୍ସବର୍ଗ ସହରରେ ରେଳ ବ୍ରିଜ ତଳେ ଫସି ରହିଥିବା ଏକ ଗ୍ୟାସ ଟ୍ୟାଙ୍କର ଶନିବାର ବିସ୍ଫୋରଣ ଘଟି ଏଥିରେ ଦୁଇଜଣ ଅଗ୍ନିଶମ କର୍ମଚାରୀଙ୍କ ସମେତ ନଅ ଜଣ ଜୀବନ୍ତ ଦଗ୍ଧ ହୋଇଛନ୍ତି। ଏହି ଘଟଣାରେ ବହୁ ଲୋକ ଆହତ ହୋଇଛନ୍ତି। ଆହତଙ୍କୁ ଉଦ୍ଧାର କରି ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଥିବା ଅଧିକାରୀମାନେ ସୂଚନା ଦେଇଛନ୍ତି।
ଏକୁରୁହୁଲେନି ଜରୁରୀକାଳୀନ ସେବା ପରିଚାଳନା ସେବା (ଇଏମଏସ) ର ମୁଖପାତ୍ର ୱିଲିୟମ ନାଟାଲାଡି କହିଛନ୍ତି ଯେ ଏହି ଘଟଣାରେ ଏକ ଡାକ୍ତରଖାନା ମଧ୍ୟ କ୍ଷତିଗ୍ରସ୍ତ ହୋଇଛି। ମୁଖପାତ୍ରଙ୍କ ଅନୁଯାୟୀ ୬ଜଣ ଅଗ୍ନିଶମ ବିଭାଗର ଆହତ କର୍ମଚାରୀଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି। ପ୍ରତ୍ୟକ୍ଷଦର୍ଶୀଙ୍କ କହିବାନୁସାରେ, ଗ୍ୟାସ ଟ୍ୟାଙ୍କର ବିସ୍ଫୋରଣ ହେବାପରେ ଅଗ୍ନିଶମ କର୍ମଚାରୀମାନେ ନିଆଁକୁ ଆୟତ୍ତ କରିବାକୁ ଚେଷ୍ଟା କରୁଥିଲେ।
ସେ ସ୍ଥାନୀୟ ଗଣମାଧ୍ୟମକୁ କହିଛନ୍ତି ଯେ ବିସ୍ଫୋରଣ ସ୍ଥାନ ନିକଟରେ ଥିବା ଡାକ୍ତରଖାନା ବାହାରେ ଘାସ ଉପରେ ବସିଥିବା ଲୋକମାନେ ଜୀବନ୍ତ ଜଳିଯାଇଛନ୍ତି। ଅନେକ ଲୋକଙ୍କୁ ଚିକିତ୍ସା ପାଇଁ ହସ୍ପିଟାଲରେ ନିଆଯାଇଛି। ବିସ୍ଫୋରଣରେ ଆହତଙ୍କ ପ୍ରକୃତ ସଂଖ୍ୟା ଏପର୍ଯ୍ୟନ୍ତ ଅଧିକାରୀମାନେ ଦେଇନାହାଁନ୍ତି। ଏହି ସମୟରେ ସୋସିଆଲ ମିଡିଆରେ ଏହି ଘଟଣାର ଖବର ଭାଇରାଲ ହେବାପରେ ପରିବାରର ସଦସ୍ୟମାନେ ନିଜ ପ୍ରିୟଜନଙ୍କ ପାଇଁ ହସ୍ପିଟାଲରେ ପହଞ୍ଚିଥିଲେ। ଫୋରେନ୍ସିକ ବିଶେଷଜ୍ଞମାନେ ଉକ୍ତ ଅଞ୍ଚଳରେ ତଦନ୍ତ କରୁଥିବାରୁ ସେମାନଙ୍କୁ ଭିତରକୁ ଅନୁମତି ଦିଆଯାଇନଥିଲା।
ଜଣେ ଇଏସଏସ ମୁଖପାତ୍ର କହିଛନ୍ତି ଯେ ଏହି ଘଟଣାରେ ରେଳ ବ୍ରିଜ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଛି ଏବଂ ନିକଟସ୍ଥ ଦୁଇଟି ଘର ମଧ୍ୟ ନଷ୍ଟ ହୋଇଯାଇଛି। ସେ କହିଛନ୍ତି, ବ୍ରିଜର ଉଭୟ ପାର୍ଶ୍ୱରୁ ନିଆଁର ତାପମାତ୍ରାରେ କଂକ୍ରିଟ ଷ୍ଟିଲ ରଡ଼ ଗୁଡିକ ବଙ୍କା ହୋଇଯାଇଛି।
