ଆଜମେର,୧୭।୨: ଆଜମେରର ରାନୀ ବାଗ ରିସର୍ଟ ନିକଟରେ ଏକ ବଡ଼ ଦୁର୍ଘଟଣା ଘଟିଛି। ଏକ ଗ୍ୟାସ ଟ୍ୟାଙ୍କର୍ ଏବଂ ଟ୍ରେଲର ମଧ୍ୟରେ ଧକ୍କା ହେବାରୁ ତିନି ଜଣ ଜୀବନ୍ତ ଦଗ୍ଧ ହୋଇଥିଲେ। ଚାରିଜଣ ଗୁରୁତର ଆହତ ହୋଇଛନ୍ତି। ଗ୍ୟାସ ଟ୍ୟାଙ୍କରରେ ନିଆଁ ଲାଗିବା ହେତୁ ରାସ୍ତା ଏବଂ ଏହାର ଆଖପାଖ ଅଞ୍ଚଳରେ ପ୍ରାୟ ୪୦୦ ମିଟର ପର୍ଯ୍ୟନ୍ତ ନିଆଁ ଲାଗିଯାଇଥିଲା। ଏହି ଦୁର୍ଘଟଣାରେ ରାଜପଥରେ ଚାଲୁଥିବା ଦୁଇଟି ଟ୍ରକ ଏବଂ ଅନେକ ଦୁଇ ଚକିଆ ଯାନ ମଧ୍ୟ ପୋଡି ପାଉଁଶ ହୋଇଯାଇଛି। ମିସ୍ରିପୁରା ଏବଂ ଗରିବ ନୱାଜ କଲୋନୀ ସମେତ ୧୦ରୁ ଅଧିକ ଘରକୁ ନିଆଁ ଲାଗିଯାଇଛି। ମୃତକଙ୍କ ମଧ୍ୟରେ ଉଭୟ ଗ୍ୟାସ ଟ୍ୟାଙ୍କର ଏବଂ ଟ୍ରେଲର ଡ୍ରାଇଭର ସାମିଲ ଅଛନ୍ତି। ଏହି ଦୁର୍ଘଟଣାରେ ୪ ଜଣ ଗୁରୁତର ଆହତ ହୋଇଛନ୍ତି। ଆହତଙ୍କୁ ଜେଏଲଏନ ହସ୍ପିଟାଲରେ ଭର୍ତ୍ତି କରାଯାଇଛି।
ବିଳମ୍ବିତ ରାତିରେ ଦୁର୍ଘଟଣା ସୂଚନା ପାଇବା ପରେ କଲେକ୍ଟର ଅନଶଦୀପ ଏବଂ ଏସପି ଚୁନାରାମ ଜାଟ ଘଟଣାସ୍ଥଳରେ ପହଞ୍ଚିଥିଲେ। ସ୍ଥାନୀୟ ପୋଲିସ, ଅଗ୍ନିଶମ ବିଭାଗ, ଆମ୍ବୁଲାନ୍ସ ଘଟଣାସ୍ଥଳରେ ରାତି ଉଦ୍ଧାର କାର୍ଯ୍ୟ କରିଥିଲେ।