ଗୋପ,୨୬।୩(ଡି.ଏନ୍.ଏ.): ପୁରୀ ଜିଲା ଗୋପ ବ୍ଲକ ମହଲପଡା ପଞ୍ଚାୟତର ଚିତେରା ଓ ଗୋପ ପଞ୍ଚାୟତର କୁଶୁପୁର ଅଞ୍ଚଳରେ ପ୍ରାକୃତିକ ଗ୍ୟାସ ସହିତ ତୈଳର ସନ୍ଧାନ ଚାଲିଛି। ଏ ନେଇ ସାଟେଲାଟ ମାଧ୍ୟମରେ ଚିତ୍ର ମିଳିଛି। ଏହି ସାଟେଲାଇଟ୍ ଚିତ୍ର ମାଧ୍ୟମରେ ତୈଳ ଓ ପ୍ରାକୃତିକ ଗ୍ୟାସ ଥିବା ଜଣାପଡିବା ପରେ ଅଏଲ ଇଣ୍ଡିଆ ପକ୍ଷରୁ କାର୍ଯ୍ୟ ଆରମ୍ଭ କରାଯିବ ବୋଲି ଅଏଲ ଇଣ୍ଡିଆ ସିଜିଏମ ବି.ଏନ୍. ସାହୁ କହିଛନ୍ତି। ପ୍ରକାଶ ଯେ, ୨୦୨୦ ମସିହାରେ ଅଏଲ ଇଣ୍ତିଆ ପକ୍ଷରୁ ଗୋପ ବ୍ଲକ ଓ କୋଣାର୍କ ଏନ୍ଏସି ଅଞ୍ଚଳରେ ଦୀର୍ଘଦିନ ଧରି ସର୍ଭେ କରିବା ସହ ଖନନ କରାଯାଇଥିଲା। ଦୀର୍ଘଦିନ ଧରି ଏହାର ପରୀକ୍ଷାନିରୀକ୍ଷା କରାଯିବା ପରେ ଗୋପ ବ୍ଲକର ଏହି ଅଞ୍ଚଳରେ ପ୍ରାକୃତିକ ଗ୍ୟାସ ସହିତ ତୈଳ ଥିବା ଜଣାପଡିଥିଲା। ଅଏଲ ଇଣ୍ତିଆ ପକ୍ଷରୁ ମଧ୍ୟ କେଉଁ ସ୍ଥାନରେ ଅଧିକ ପରିମାଣର ଏହି ଗ୍ୟାସ ଓ ତୈଳ ଥିବା ଚିତ୍ର ଆସିବା ପରେ ପ୍ରାଥମିକ ଭାବେ ବିଭାଗ ପକ୍ଷରୁ କାର୍ଯ୍ୟ କରାଯାଇଛି। ଏପରି ସାଟେଲାଇଟ୍ ଚିତ୍ର ଆସିବା ପରେ ଗୁରୁବାର ଏକ ଟିମ୍ ଗୋପ ବ୍ଲକର ଉକ୍ତ ଦୁଇଟି ପଞ୍ଚାୟତରେ ପହଞ୍ଚି ପ୍ରାଥମିକ ପର୍ଯ୍ୟାୟରେ ବୁଲିବା ସହ ପଞ୍ଚାୟତର ଲୋକ ପ୍ରତିନିଧିମାନଙ୍କ ସହ ଆଲୋଚନା କରିଛନ୍ତି। ତୈଳ, ପ୍ରାକୃତିକ ଗ୍ୟାସ ଥିବା ସ୍ଥାନରେ ପ୍ରଥମ ପର୍ଯ୍ୟାୟରେ ୭ ଏକର ଜମି ନିଆଯାଇ କାର୍ଯ୍ୟ ଆରମ୍ଭ କରାଯିବ ବୋଲି ସୂଚନା ମିଳିଛି। ଆଉ ମଧ୍ୟ ଏହି ଅଞ୍ଚଳରେ ସାଧାରଣ ଲୋକଙ୍କ ଜମିଗୁଡିକୁ ଲିଜ୍ ଭାବେ ୩ ବର୍ଷ ନିଆଯାଇ କାର୍ଯ୍ୟ କରାଯିବ ବୋଲି କୁହାଯାଇଛି। ଏପରି ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଅଏଲ ଇଣ୍ତିଆ ସିଜିଏମ ବି.ଏନ୍. ସାହୁଙ୍କୁ ଯୋଗାଯୋଗ କରିବାରେ ପ୍ରଥମ ପର୍ଯ୍ୟାୟରେ ଏହି କାର୍ଯ୍ୟ ହାତକୁ ନିଆଯାଇଛି। ଖୁବ୍ଶୀଘ୍ର ମଧ୍ୟ କାର୍ଯ୍ୟ ଆରମ୍ଭ କରାଯିବ ବୋଲି ସୂଚନା ଦେଇଛନ୍ତି।