ନୂଆଦିଲ୍ଲୀ,୧୮।୧୨: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ୨୦୨୨ ପୂର୍ବରୁ ଭାରତର ପୂର୍ବତନ ଓପନର ଗୌତମ ଗମ୍ଭୀର ନୂଆ ଲକ୍ଷ୍ନୌ ଫ୍ରାଞ୍ଚାଇଜ୍ର ଟିମ୍ ମେଣ୍ଟର ଭାବେ ନିଯୁକ୍ତି ପାଇଛନ୍ତି। ଗମ୍ଭୀର ବର୍ତ୍ତମାନ ପାର୍ଲାମେଣ୍ଟ ସଦସ୍ୟ ଅଛନ୍ତି। ସେ ଆଇପିଏଲ୍ ଖେଳୁଥିବା ବେଳେ ତାଙ୍କ ଅଧିନାୟକତ୍ୱରେ କୋଲକାତା ନାଇଟ ରାଇଡର୍ସ (କେକେଆର୍) ଦୁଇଥର ଟାଇଟଲ ଜିତିଥିଲା। ଗମ୍ଭୀରଙ୍କ ନିଯୁକ୍ତିକୁ ଫ୍ରାଞ୍ଚାଇଜ୍ ମାଲିକ ସଞ୍ଜୀବ ଗୋଏଙ୍କା ସ୍ବାଗତ କରିଛନ୍ତି। ଗମ୍ଭୀରଙ୍କ କ୍ରିକେଟ କ୍ୟାରିୟର ରେକର୍ଡ ଖୁବ୍ ଭଲ ରହିଛି। ଦଳ ପାଇଁ ସେ ବେଶ୍ ଉପଯୋଗୀ ହେବେ ବୋଲି ସେ କହିଛନ୍ତି। ଆଇପିଏଲ୍ ପାଇଁ ଫ୍ରାଞ୍ଚାଇଜର ଏପର୍ଯ୍ୟନ୍ତ ନାମକରଣ କରାଯାଇ ନାହିଁ। ୪୦ ବର୍ଷୀୟ ଗମ୍ଭୀର ଭାରତ ତରଫରୁ ୫୮ ଟେଷ୍ଟ, ୧୪୭ ଅନ୍ତର୍ଜାତୀୟ ଦିନିକିଆ ଓ ୩୭ ଅନ୍ତର୍ଜାତୀୟ ଟି୨୦ ଖେଳି ସାରିଛନ୍ତି।