ନୂଆଦିଲ୍ଲୀ,୧୧।୭: ଗୌତମ ଗମ୍ଭୀର ଭାରତୀୟ କ୍ରିକେଟ ଟିମ୍ର ମୁଖ୍ୟ କୋଚ୍ ଭାବେ ରାହୁଲ ଦ୍ରାବିଡଙ୍କ ସ୍ଥାନ ନେଇଛନ୍ତି। ଟି୨୦ ବିଶ୍ୱକପ୍ ପରେ ଦ୍ରାବିଡଙ୍କ କାର୍ଯ୍ୟକାଳ ଶେଷ ହୋଇଛି। ଏବେ ଗମ୍ଭୀର କୋଚ୍ ନିଯୁକ୍ତ ହେବା ପରେ ଭାରତୀୟ କ୍ରିକେଟର ସହ କ୍ରିକେଟ ବିଶେଷଜ୍ଞମାନେ ପ୍ରଶଂସା କରୁଥିବା ବେଳେ ପୂର୍ବତନ ପାକିସ୍ତାନ କ୍ରିକେଟର ବଡ଼ ବୟାନ ଦେଇଛନ୍ତି।
କ୍ରିକେଟର ବାସିତ ଅଲି କହିଛନ୍ତି, ରାହୁଲ ଦ୍ରାବିଡ ଟିମ୍ ଇଣ୍ଡିଆ ଲାଗି ବାପା ସମାନ ଥିଲେ। ଏଣୁ ଗମ୍ଭୀରଙ୍କ ପାଇଁ ସେହି ପଦବୀ ହାସଲ କରିବା କଷ୍ଟକର ହେବ। ଗମ୍ଭୀର କ୍ରୋଧି। ଯଦିଓ କେକେଆର୍ ସହ ଆଇପିଏଲ୍ରେ ସେ ଭଲ ପ୍ରଦର୍ଶନ କରିଛନ୍ତି, ହେଲେ ଭାରତର କୋଚ୍ ଭାବେ ତାଙ୍କ ପାଇଁ କଷ୍ଟସାଧ୍ୟ ହେବ।
ସେ ଆହୁରି ମଧ୍ୟ କହିଛନ୍ତି, ଶ୍ରୀଲଙ୍କା ଏବଂ ବାଲାଂଦେଶ ବିପକ୍ଷ ଆଗାମୀ ସିରିଜ ଗମ୍ଭୀରଙ୍କ ପାଇଁ ଚ୍ୟାଲେଞ୍ଜବିଶିଷ୍ଟ ରହିବ ନାହିଁ। ହେଲେ ନଭେମ୍ବରରେ ହେବାକୁ ଥିବା ଅଷ୍ଟ୍ରେଲିଆ ଗସ୍ତ ତାଙ୍କର ସବୁଠାରୁ ବଡ଼ ପରୀକ୍ଷା ହେବ। କୋହଲିଙ୍କ ସହ ସମ୍ପର୍କକୁ ନେଇ ଗମ୍ଭୀରଙ୍କ ଭୂମିକା ପ୍ରଭାବିତ ହେବ ବୋଲି ସେ କହିଛନ୍ତି। ହେଲେ ଭାରତରେ ତାଙ୍କର ସମାଜସେବାର ସେ ପ୍ରଶଂସା କରିବା ସହ ଭାରତୀୟ କୋଚ୍ ଭାବେ ତାଙ୍କୁ ଶୁଭକାମନା ଜଣାଇଛନ୍ତି।
