ନୂଆଦିଲ୍ଲୀ,୨୯।୯: ଆଇପିଏଲ୍ ୨୦୨୧ର ଦ୍ୱିତୀୟ ପର୍ଯ୍ୟାୟ ମ୍ୟାଚ୍ ୟୁଏଇରେ ଖେଳାଯାଉଛି। ମଙ୍ଗଳବାର ସିରିଜର ୪୧ତମ ମ୍ୟାଚ୍ରେ କୋଲକାତା ନାଇଟ୍ ରାଇଡର୍ସ ଟିମ୍ ଦିଲ୍ଲୀ କ୍ୟାପିଟାଲ୍ସକୁ ହରାଇଥିଲା। ଏହି ମ୍ୟାଚ୍ ସମୟରେ ରବିଚନ୍ଦ୍ରନ ଅଶ୍ୱିନ ଏବଂ କେକେଆର୍ ଅଧିନାୟକ ଇୟୋନ ମୋର୍ଗାନଙ୍କ ମଧ୍ୟରେ ବିବାଦ ଚର୍ଚ୍ଚାରେ ରହିଥିଲା। ଏହାକୁ ନେଇ କମେଣ୍ଟ୍ରି କରୁଥିବା ଗୌତମ ଗମ୍ଭୀର ଦିଲ୍ଲୀ କୋଚ୍ ରିକି ପଣ୍ଟିଂଙ୍କୁ କଡା ଭାଷାରେ ପରାମର୍ଶ ଦେବା ସହ ମୋର୍ଗାନଙ୍କୁ ମଧ୍ୟ କଟାକ୍ଷ କରିଥିଲେ।
ମୋର୍ଗାନ ଆଇପିଏଲ୍ ସମୟରେ ଅନେକ ଥର ଡଗ୍ଆଉଟ୍ରୁ ପରାମର୍ଶ ନେଉଥିବା ନଜର ଆସିଥାନ୍ତି। ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚ୍ରେ ମୋର୍ଗାନ ଟିମ୍ର ଆନାଲିଷ୍ଟ ନାଥନ ଲିଅମନଙ୍କଠାରୁ କୋଡ୍ସ ଆଣୁଥିବା ନଜର ଆସିଥିଲା। ଏହା ଜଣାପଡ଼ିବା ପରେ ଗମ୍ଭୀରଙ୍କ ସାଥୀ କମେଣ୍ଟେଟର ଆକାଶ ଚୋପ୍ରା ଏହାକୁ ନେଇ କ’ଣ ଭାବନ୍ତି ବୋଲି ପ୍ରଶ୍ନ କରିଥିଲେ। ଜବାବରେ ଗମ୍ଭୀର କହିଥିଲେ, ଯେତେବେଳେ ମୁଁ ଅଧିନାୟକ ଥିଲି, ସେତେବେଳେ ଏଭଳି ଘଟଣା ଘଟିଥିଲେ ମୁଁ ଇସ୍ତଫା ଦେଇ ଦେଇଥାନ୍ତି।
ଏହାଛଡ଼ା ଗମ୍ଭୀର ଦିଲ୍ଲୀ କୋଚ୍ ରିକି ପଣ୍ଟିଂଙ୍କୁ ନେଇ ଅସନ୍ତୋଷ ପ୍ରକାଶ କରିଛନ୍ତି। କାରଣ ଅଶ୍ୱିନ ଏବଂ ମୋର୍ଗାନଙ୍କ ମଧ୍ୟରେ କଥା କଟାକଟି ହେବା ସମୟରେ ପଣ୍ଟିଂ ରାଗି ଡଗ୍ଆଉଟ୍ରୁ ଉଠି ମଇଦାନକୁ ଯାଇଥିଲେ। ଗମ୍ଭୀରଙ୍କୁ ଏହା ବିଲ୍କୁଲ ପସନ୍ଦ ଆସି ନ ଥିଲା। ସେ କହିଥିଲେ, କୋଚ୍ଙ୍କୁ କୋଚ୍ ଭଳି ବ୍ୟବହାର କରିବା ଉଚିତ। ମଇଦାନକୁ ଯାଇ ପ୍ରତି କଥାରେ ମୁଣ୍ଡ ପୁରାଇବା ଉଚିତ ନୁହେଁ। କୋଚ୍ ଯେହେତୁ ଡଗ୍ଆଉଟ୍ ଯାଏ ଆପଣଙ୍କ ସୀମା। ଦୁଇ ଖେଳାଳିଙ୍କ ମଧ୍ୟରେ ବିବାଦ ହେଲେ ସେମାନେ ବୁଝିବେ। କୋଚିଂ ଷ୍ଟାଫ୍ ନୁହେଁ ବୋଲି ଗମ୍ଭୀର କହିଥିଲେ।