ନୂଆଦିଲ୍ଲୀ,୩୧।୧୦: ଭାରତୀୟ ଟିମ୍ର ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ଅଡ଼ୁଆ ଥମିବାର ନାଁ ନେଉନାହିଁ। ନ୍ୟୁଜିଲାଣ୍ଡ ବିପକ୍ଷ ସିରିଜ ହାରିବା ପରେ ସେ ବର୍ତ୍ତମାନ ତୃତୀୟ ଟେଷ୍ଟ ପାଇଁ ମୁମ୍ବାଇରେ ଅଛନ୍ତି। ଏସବୁ ମଧ୍ୟରେ ସେ ବଡ଼ ଅଡ଼ୁଆରେ ଫସିଛନ୍ତି। ଫ୍ଲାଟ୍ କ୍ରେତାଙ୍କୁ ଠକିଥିବା ନେଇ ପୂର୍ବରୁ ହୋଇଥିବା ମାମଲାରେ ସେ ନିର୍ଦ୍ଦୋଷରେ ଖଲାସ ହୋଇଥିଲେ। ହେଲେ ଅକ୍ଟୋବର ୨୯ରେ ଦିଲ୍ଲୀ କୋର୍ଟ ଏହି ନିର୍ଦ୍ଦେଶକୁ ଖାରଜ କରିଛନ୍ତି। କେବଳ ଏତିକି ନୁହେଁ ଏହି ମାମଲାରେ ତାଙ୍କ ଭୂମିକା ନେଇ ତଦନ୍ତ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି।
ପିଟିଆଇ ରିପୋର୍ଟ ମୁତାବକ, ଫ୍ଲାଟ୍ କ୍ରେତାମାନେ ରିଏଲ ଇଷ୍ଟେଟ ସଂସ୍ଥା ରୁଦ୍ର ବିଲ୍ଡୱେଲ ରିଆଲିଟି ପ୍ରାଇଭେଟ୍ ଲିମିଟେଡ୍, ଏଚ୍ ଆର୍ ଇନଫ୍ରାସିଟି ପ୍ରାଇଭେଟ୍ ଲିମିଟେଡ୍, ୟୁଏମ୍ ଆର୍କିଟେକ୍ଚର ଆଣ୍ଡ କଣ୍ଟ୍ରାକ୍ଟର ଲିମିଟେଡ୍ ଏବଂ ଗୌତମ ଗମ୍ଭୀରଙ୍କ ବିରୋଧରେ ଠକେଇ ମାମଲା ଦାୟର କରିଥିଲେ। ଏହି ସମସ୍ତ କମ୍ପାନୀର ମିଳିତ କାର୍ଯ୍ୟରେ ଗମ୍ଭୀର ନିର୍ଦ୍ଦେଶକ ଏବଂ ବ୍ରାଣ୍ଡ ଆମ୍ବାସାଡର ଥିଲେ। ସ୍ବତନ୍ତ୍ର ବିଚାରପତି ବିଶାଲ ଗୋଗାନେ ଏହି ମାମଲାର ଶୁଣାଣି କରି ଜାଣିବାକୁ ପାଇଲେ ଯେ ଗମ୍ଭୀର କେବଳ ଜଣେ ଅଭିଯୁକ୍ତ ଯିଏକି ବ୍ରାଣ୍ଡ ଆମ୍ବାସାଡର ଭାବେ ନିବେଶକଙ୍କ ସହିତ ସିଧାସଳଖ ଯୋଗାଯୋଗ କରିଥିଲେ ।
ଏହା ବ୍ୟତୀତ ଚାର୍ଜସିଟରେ ଜାଲିଆତି ରାଶିର କିଛିି ଅଂଶ ଗମ୍ଭୀରଙ୍କ ହାତକୁ ଆସିଛି କି ନାହିଁ ତାହା ସ୍ପଷ୍ଟ ହୋଇ ନ ଥିଲା। ଏହା ସତ୍ତ୍ୱେ ସେ ନିର୍ଦ୍ଦୋଷରେ ଖଲାସ ହୋଇଥିଲେ। ଏହି କାରଣରୁ ସେମାନେ ନିମ୍ନ ଅଦାଲତର ପୂର୍ବ ନିଷ୍ପତ୍ତିକୁ ଖାରଜ କରି ଟିମ ଇଣ୍ଡିଆର ମୁଖ୍ୟ ପ୍ରଶିକ୍ଷକଙ୍କୁ ପୁଣି ଅଭିଯୁକ୍ତ କରିଥିଲେ। ସେ ତାଙ୍କ ନିଷ୍ପତ୍ତିରେ କହିଛନ୍ତି ଯେ ନିମ୍ନ ଅଦାଲତର ନିଷ୍ପତ୍ତିରେ ରୁଦ୍ର ବିଲଡୱେଲ ରିଅଲିଟି ପ୍ରାଇଭେଟ ଲିମିଟେଡକୁ ୬ କୋଟି ଟଙ୍କା ପ୍ରଦାନ କରିବା ଏବଂ କମ୍ପାନୀରୁ ୪.୮୫ କୋଟି ଟଙ୍କା ପାଇବା ବିଷୟରେ ଉଲ୍ଲେଖ କରାଯାଇ ନାହିଁ।
କୋର୍ଟ ଏହା ମଧ୍ୟ ଜାଣିବାକୁ ପାଇଛନ୍ତି ଯେ ବ୍ରାଣ୍ଡ ଆମ୍ବାସାଡର ଭାବରେ ତାଙ୍କ ଭୂମିକା ବ୍ୟତୀତ ଗମ୍ଭୀରଙ୍କ କମ୍ପାନୀ ସହିତ ଆର୍ଥିକ କାରବାର ହୋଇଛି। କୋର୍ଟଙ୍କ ଅନୁଯାୟୀ, ଗମ୍ଭୀର ୨୯ ଜୁନ ୨୦୧୧ ରୁ ୧ ଅକ୍ଟୋବର ୨୦୧୩ ପର୍ଯ୍ୟନ୍ତ ଅତିରିକ୍ତ ନିର୍ଦ୍ଦେଶକ ଥିଲେ। ଅର୍ଥାତ ଯେତେବେଳେ ସେ ଜଣେ ଅଧିକାରୀ ଭାବରେ କମ୍ପାନୀ ସହ ଜଡିତ ଥିଲେ, ସେତେବେଳେ ଏହି ଘଟଣା ଘଟିଥିଲା। ଏହା ବ୍ୟତୀତ ୧ ଅକ୍ଟୋବର ୨୦୧୩ ରେ ପଦରୁ ଇସ୍ତଫା ଦେବା ପରେ ମଧ୍ୟ କିଛି ନେଣଦେଣ ହୋଇଥିଲା। ତେଣୁ ଏହାର ଅନୁସନ୍ଧାନ କରିବା ଆବଶ୍ୟକ।
ବର୍ତ୍ତମାନ ଟିମ ଇଣ୍ଡିଆର ପ୍ରଦର୍ଶନକୁ ନେଇ ଗମ୍ଭୀର ଟାର୍ଗେଟରେ ଅଛନ୍ତି। ଏହି ସମୟରେ ଏକ ସମ୍ବେଦନଶୀଳ ଦାବି ସାମ୍ନାକୁ ଆସିଛି। ଏକ ନ୍ୟୁଜ ଚ୍ୟାନେଲ ରିପୋର୍ଟ ଅନୁଯାୟୀ, ନଭେମ୍ବର ୨ ତାରିଖରୁ ମୁମ୍ବାଇରେ ଭାରତ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ଚାଲିଥିବା ତୃତୀୟ ଟେଷ୍ଟ ମ୍ୟାଚ ପୂର୍ବରୁ ରୋହିତ ଏବଂ ଗମ୍ଭୀରଙ୍କ ମଧ୍ୟରେ ମତଭେଦ ଦେଖାଦେଇଛି। ଦଳରେ ନିଷ୍ପତ୍ତି ନେବା ଏବଂ ଖେଳାଳିଙ୍କ ପ୍ରଦର୍ଶନକୁ ନେଇ ଉଭୟଙ୍କ ଚିନ୍ତାଧାରା ମଧ୍ୟରେ ପାର୍ଥକ୍ୟ ସୃଷ୍ଟି ହୋଇଛି। କେବଳ ଏତିକି ନୁହେଁ, କେତେକ ସମୟରେ ଉଭୟଙ୍କ ମଧ୍ୟରେ ବଡ଼ କଥା କଟାକଟି ହୋଇଛି ବୋଲି ମଧ୍ୟ ଦାବି କରାଯାଇଛି।