ନୂଆଦିଲ୍ଲୀ,୨।୩: ଭାରତ-ଇଂଲଣ୍ଡ ମଧ୍ୟରେ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯାଇଥିବା ତୃତୀୟ ଟେଷ୍ଟ ମ୍ୟାଚ୍ ମାତ୍ର ଦୁଇ ଦିନରେ ଶେଷ ହୋଇଥିଲା। ଏଥିରେ ଭାରତ ୧୦ ଉଇକେଟରେ ବିଜୟୀ ହୋଇ ସିରିଜକୁ ୨-୧ ସ୍ଥିତିକୁ ଆଣିଥିଲା। ତେବେ ମ୍ୟାଚ୍ଟି ନିର୍ଦ୍ଧାରିତ ସମୟ ପୂର୍ବରୁ ଶେଷ ହୋଇଥିବାରୁ କ୍ରିକେଟ ପ୍ରଶଂସକଙ୍କଠାରୁ ଆରମ୍ଭ କରି ଖେଳଜଗତ ସହ ଜଡ଼ିତ ଲୋକେ ମଇଦାନକୁ ନେଇ ପ୍ରଶ୍ନ ଉଠାଉଛନ୍ତି। ନିକଟରେ ପୂର୍ବ ଭାରତୀୟ ଅଲ୍ରାଉଣ୍ଡର ଯୁବରାଜ ସିଂହ ଅହମ୍ମଦାବାଦ ପିଚ୍ର ଆଲୋଚନା କରି ଟୁଇଟ୍ କରିଥିଲେ। ଏହ ଚର୍ଚ୍ଚାର ବିଷୟ ପାଲଟିଥିଲା। ଅନେକ ଟୁଇଟ୍କୁ ନେଇ ନିଜର ସହମତି ପ୍ରକାଶ କରିଥିବା ବେଳେ ଅନେକ ଜଣେ ଭାରତୀୟ ଖେଳାଳିକୁ ଏଭଳି କହିବା ଶୋଭା ପାଉନାହିଁ ବୋଲି କହିଥିଲେ।
ଏବେ ଗୌତମ ଗମ୍ଭୀର ଯୁବରାଜଙ୍କ ଟୁଇଟ୍କୁ ନେଇ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ଉଇକେଟ ଭିନ୍ନ। ହେଲେ ଡିସିଜନ ରିଭ୍ୟୁ ସିଷ୍ଟମ(ଡିଆର୍ଏସ୍) ଆଜିକାଲି ପ୍ରମୁଖ ଭୂମିକା ନିର୍ବାହ କରୁଛି। ଯେତେବେଳେ ଅନିଲ କୁମ୍ବଲେ, ହରଭଜନ ସିଂହ ବୋଲିଂ କରୁଥିଲେ ସେତେବେଳେ କ’ଣ ଡିଆର୍ଏସ୍ ଥିଲା। କୁମ୍ବଲେଙ୍କୁ ପ୍ରାୟ ୧୦୦୦ ଏବଂ ହରଭଜନଙ୍କ ପାଖାପାଖି ୭୦୦ ଉଇକେଟ ମିଳିଥାଇପାରେ। କାରଣ ଡିଆର୍ଏସ୍ର ଭୂମିକା ଭାରତରେ ଅଧିକ। ଏହି ଦୃଷ୍ଟିକୋଣରୁ ଯୁବରାଜଙ୍କ ସହ ସହମତ ହେବି। ହେଲେ ଏଭଳି ପିଚ୍ରେ ଖେଳିଥିଲେ ସେମାନେ ଉଇକେଟ ନେଇ ଚାଲିଥାନ୍ତେ ଦୃଷ୍ଟିକୋଣକୁ ବିରୋଧ କରିବି। କାରଣ ଉଇକେଟ ସମସ୍ତଙ୍କ ପାଇଁ ସମାନ। ଅଶ୍ୱିନ ଏଭଳି ପିଚ୍ ପ୍ରସ୍ତୁତ କରିବାକୁ କହି ନ ଥାନ୍ତି। କାରଣ ଏହା ବିସିସିଆଇର କାମ। ଯେତେବେଳେ ଏଭଳି ପଡ଼ିଆ ପ୍ରସ୍ତୁତ ହୋଇଥାଏ ଅଶ୍ୱିନଙ୍କ ଉପରେ ନିଜକୁ ପ୍ରମାଣ କରିବାକୁ ଅଧିକ ଚାପ ରହିଥାଏ ବୋଲି ସେ କହିଛନ୍ତି।