ନୂଆଦିଲ୍ଲୀ,୧୨।୯: ଭାରତୀୟ କ୍ରିକେଟ ଦଳର ପୂର୍ବତନ ମହାନ ଅଲରାଉଣ୍ଡର ଯୁବରାଜ ସିଂ ଅବସରରୁ ପ୍ରତ୍ୟାବର୍ତ୍ତନ କରିବାକୁ ନିଷ୍ପତ୍ତି ନେଇଛନ୍ତି। ସେ ଏନେଇ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)କୁ ଚିଠି ଲେଖି ଜଣାଇଛନ୍ତି। ଏହା ଜଣାପଡ଼ିବା ପରେ ୟୁଭିଙ୍କ ପ୍ରଶଂସକମାନେ ଖୁସିବ୍ୟକ୍ତ କରିଥିବା ବେଳେ ଏବେ ସାଥୀ ଖେଳାଳି ମଧ୍ୟ ତାଙ୍କ ଫେରିବା ବାଟକୁ ଚାହିଁଥିବା ପ୍ରକାଶ କରିଛନ୍ତି।
ପୂର୍ବତନ କ୍ରିକେଟର ତଥା ଏମ୍ପି ଗୌତମ ଗମ୍ଭୀର ଏହି ପ୍ରସଙ୍ଗରେ କହିଛନ୍ତି, ଏହା ତାଙ୍କର ବ୍ୟକ୍ତିଗତ ନିଷ୍ପତ୍ତି। ସବୁ ଲୋକେ ତାଙ୍କୁ ଖେଳୁଥିବା ଦେଖିବାକୁ ପସନ୍ଦ କରନ୍ତି। ଯଦି ସେ ପଞ୍ଜାବ ପାଇଁ ଖେଳିବାକୁ ଚାହୁଁଛନ୍ତି ତେବେ କାହିଁକି ନୁହେଁ। ଆପଣ କୌଣସି କ୍ରିକେଟରକୁ ଖେଳ ଆରମ୍ଭ କରିବା ନଚେତ ଶେଷ କରିବାକୁ ବାଧ୍ୟ କରିପାରିବେ ନାହିଁ। ଯଦି ସେ ସନ୍ୟାସରୁ ଫେରିବାକୁ ଚାହୁଁଛନ୍ତି ତେବେ ତାଙ୍କୁ ହାର୍ଦ୍ଦିକ ସ୍ବାଗତ ବୋଲି ଗମ୍ଭୀର କହିଛନ୍ତି।
୨୦୧୧ ବିଶ୍ୱକପ୍ରେ ପ୍ଲେୟାର ଅଫ୍ ଦ ଟୁର୍ଣ୍ଣାମେଣ୍ଟ ବିବେଚିତ ହୋଇଥିବା ଯୁବରାଜ ଗତ ଜୁନ୍ରେ କ୍ରିକେଟର ସବୁ ଫର୍ମାଟରୁ ଅବସର ଘୋଷଣା କରିଥିଲେ। ପଞ୍ଜାବ କ୍ରିକେଟର ବୃହତ୍ତର ସ୍ବାର୍ଥ ପାଇଁ ପିସିଏ ସମ୍ପାଦକ ପୁନୀତ ବାଲି ତାଙ୍କୁ ପ୍ରଥମେ ଅବସରରୁ ପ୍ରତ୍ୟାବର୍ତ୍ତନ କରିବାକୁ ସ୍ତାବ ଦେଇଥିଲେ। ତେବେ ଅତିକମ୍ରେ ଟି୨୦ ଫର୍ମାଟରେ ଖେଳିବାକୁ ଯୁବରାଜ ରାଜି ହୋଇଛନ୍ତି।