ନୂଆଦିଲ୍ଲୀ,୩।୬: ଭାରତୀୟ କ୍ରିକେଟ ଟିମ୍ର ପୂର୍ବତନ ଅଧିନାୟକ ସୁନିଲ ଗାଭାସ୍କର ଟି୨୦ କ୍ରିକେଟର ବଡ଼ ପ୍ରଶଂସକ ବୋଲି ସ୍ବୀକାର କରିଛନ୍ତି। ତାଙ୍କ ସମୟର ଅନେକ ଖେଳାଳି କ୍ରିକେଟର ଏହି ଫର୍ମାଟକୁ ପସନ୍ଦ କରୁ ନ ଥିବା ବେଳେ ଗାଭାସ୍କର ଭିନ୍ନ ମତ ରଖିଛନ୍ତି। ଅନେକ ଥର ବ୍ୟାଟ୍ସମ୍ୟାନମାନେ ଟି୨୦ କ୍ରିକେଟରେ ଭଲ ଶଟ୍ସ ଲଗାଇବା ଦେଖି ଚକିତ ହୋଇଯାଆନ୍ତି ବୋଲି କହିଛନ୍ତି।
ଏକ ସାକ୍ଷାତକାରରେ ଗାଭାସ୍କର କହିଛନ୍ତି, ମୁଁ ଜାଣେ ମୋ ସମୟର ଅନେକ ଲୋକ ଟି୨୦ ଫର୍ମାଟକୁ ନେଇ ଖୁସି ନୁହନ୍ତି। ହେଲେ ମୋତେ ଏହା ପସନ୍ଦ। ଏହାପଛରେ ଥିବା ସାଧାରଣ କାରଣଟି ହେଉଛି, ତୁମକୁ ଜଣା ଯେ ୩ ଘଣ୍ଟାରେ ମ୍ୟାଚ୍ ଶେଷ ହେବ ଏବଂ ବିଜେତା ଜଣାପଡ଼ିଯିବ। ଏଥିରେ ଭରପୂର ମନୋରଞ୍ଜନ ଦେଖିବାକୁ ମିଳେ। ସ୍ବିଚ୍ ଶର୍ଟ ହେଉ ଅଥବା ରିଭର୍ସ ସୁଇପ୍ କେହି ମାରିଲେ ମୁଁ ଚେୟାରରୁ ଉଠିପଡେ।
ଏହାଛଡ଼ା ଆଧୁନିକ ସମୟର କେଉଁ ବ୍ୟାଟ୍ସମ୍ୟାନ୍ ପସନ୍ଦ ପ୍ରଶ୍ନରେ ଗାଭାସ୍କର କହିଛନ୍ତି, ସେ ହେଉଛନ୍ତି ଏବି ଡିଭିଲିୟର୍ସ। ତାଙ୍କ ଭଳି ମୁଁ ଖେଳିବାକୁ ଚାହେଁ। ସେ ୩୬୦ଡିଗ୍ରୀ ଅର୍ଥାତ ପଡ଼ିଆର ସବୁ ସ୍ଥାନରେ ଶର୍ଟ ଖେଳିପାରିଥାନ୍ତି। ସେ ନେଟ୍ରେ ଅଭ୍ୟାସ କରିବା ଭଳି ଖେଳିଥାନ୍ତି। ବ୍ୟାଟିଂକୁ ସେ ବେଶ ସହଜ କରିଦେଇଛନ୍ତି। ତାଙ୍କ ଖେଳିବା ଶୈଳୀ ବହୁତ ଭଲ ବୋଲି ଗାଭାସ୍କର କହିଛନ୍ତି।