ମେଲବୋର୍ନ,୨୭ା୧୨(ପି.ଟି.)-ଅଜିଙ୍କ୍ୟ ରାହାନେଙ୍କ ଫିଲ୍ଡିଂ ସଜ୍ଜାକୁ ଉଚ୍ଚ ପ୍ରଶଂସା କରିଛନ୍ତି ପୂର୍ବତନ ଭାରତୀୟ ଅଧିନାୟକ ସୁନୀଲ ଗାଭାସ୍କର। ରାହାନେଙ୍କର ଅଧିନାୟକତ୍ୱ ଦକ୍ଷତାକୁ ନେଇ ସେ ଏବେଠାରୁ କୌଣସି ମନ୍ତବ୍ୟ ଦେବାକୁ ଚାହାନ୍ତି ନାହିଁ। କାରଣ ସେ ନିଜେ ମୁମ୍ବାଇର ହୋଇଥିବାରୁ ଅନେକେ ଏହାକୁ ଭିନ୍ନ ଦୃଷ୍ଟିରେ ଦେଖିବେ। ନିୟମିତ ଅଧିନାୟକ ବିରାଟ କୋହଲିଙ୍କ ଅନୁପସ୍ଥିତିରେ ରାହାନେଙ୍କୁ ଭାରତୀୟ କ୍ରିକେଟ ଦଳର ଅଧିନାୟକ ଭାର ସମ୍ଭାଳିବାକୁ ପଡୁଛି। ତାଙ୍କର ସଫଳ ନେତୃତ୍ୱ ଯୋଗୁ ଶନିବାର ଆରମ୍ଭ ହୋଇଥିବା ଦ୍ୱିତୀୟ ଟେଷ୍ଟରେ ଘରୋଇ ଅଷ୍ଟ୍ରେଲିଆ କ୍ରିକେଟ ଦଳ ୭୨.୩ ଓଭରରେ ମାତ୍ର ୧୯୫ ରନ କରି ଅଲ୍ଆଉଟ ହୋଇଯାଇଛି। ରାହାନେଙ୍କ ଉନ୍ନତ ଫିଲ୍ଡିଂ ସଜ୍ଜା ଯୋଗୁ ଅଷ୍ଟ୍ରେଲିଆରେ ୩ଜଣ ବ୍ୟାଟ୍ସମ୍ୟାନ ମାର୍ନସ ଲାବୁସ୍କାନ୍, ଷ୍ଟିଭ୍ ସ୍ମିଥ୍ ଏବଂ ଟ୍ରାଭିସ୍ ହେଡ୍ ବିଭିନ୍ନ ସ୍ଥାନରେ ମୁତୟନ ହୋଇଥିବା ଫିଲ୍ଡରଙ୍କ ଦ୍ୱାରା କ୍ୟାଚ୍ ଆଉଟ୍ ହୋଇଥିଲେ। ଗାଭାସ୍କର କହିଛନ୍ତି, ଅତୀତରେ ୨ଟି ଟେଷ୍ଟ ଓ କେତୋଟି ଦିନିକିଆରେ ରାହାନେ ଅଧିନାୟକ ଦାୟିତ୍ୱ ତୁଲାଉଥିବାବେଳେ ସେ ତାଙ୍କ ଫିଲ୍ଡିଂ ସଜାକୁ ଦେଖିଛନ୍ତି। କିଏ କେଉଁଠାରେ ଫିଲ୍ଡିଂ କରିବା ଉଚିତ ତାହା ରାହାନେଙ୍କୁ ଭଲରୂପେ ଜଣା। ଏହାଛଡ଼ା ଶନିବାର ରାହାନେଙ୍କ ବୋଲିଂ ପରିବର୍ତ୍ତନ ମଧ୍ୟ ବେଶ୍ ପ୍ରଭାବୀ ଥିଲା। ପ୍ରଥମ ଘଣ୍ଟା ଖେଳରେ ସେ ଆର୍. ଅଶ୍ୱିନଙ୍କୁ ବୋଲିଂରେ ଲଗାଇଥିଲେ। ଏହି ସିନିୟର ସ୍ପିନର ମାଥ୍ୟୁ ଓ୍ବେଡ୍ ଏବଂ ଷ୍ଟିଭ୍ ସ୍ମିଥ୍ଙ୍କୁ ଆଉଟ୍ କରଥିତ୍ଲେ। ଯାହାଫଳରେ ଅଷ୍ଟ୍ରେଲିଆ ୩୮ସ୍କୋରରେ ୩ଜଣ ବ୍ୟାଟ୍ସମ୍ୟାନଙ୍କୁ ହରାଇ ସାରିଥିଲା। ରାହାନେ ମଧ୍ୟାହ୍ନ ଭୋଜନ ବିରତି ପଦାର୍ପଣକାରୀ ବୋଲର ମହମ୍ମଦ ସିରାଜଙ୍କୁ ଗୋଟିଏ ହେଲେ ଓଭର ବୋଲିଂ ନ ଦେଇ ତାଙ୍କ ବିଜ୍ଞତାର ପରିଚୟ ଦେଇଥିଲେ। ଯୁବ ଖେଳାଳି ହୋଇଥିବାରୁ ସିରାଜ ପୁରୁଣା ବଲ୍ରେ ଭଲ ପେସ୍ ବୋଲିଂ କରିପାରିବେ। ଏହି ପେସ୍ ବୋଲର ଦୁଇଟି ଗୁରୁତ୍ୱପୂର୍ଣ୍ଣ ଉଇକେଟ ନେବାରେ ସମର୍ଥ ହୋଇଥିଲେ। ଗାଭାସ୍କାର କହିଛନ୍ତି, ପ୍ରଥମ ଦିବସରେ ଭାରତର ସଫଳତା ପଛରେ ମୋଟ ଉପରେ ବୋଲିଂ ୟୁନିଟ୍ରେ ବଡ଼ ଭୂମିକା ରହିଛି।
