ଚେନ୍ନାଇ,୧୦।୨: ସ୍ଥାନୀୟ ଏମ୍.ଏ ଚିଦାମ୍ବରମ୍ ଷ୍ଟାଡିୟମ୍ରେ ଖେଳାଯାଇଥିବା ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ରେ ୨୨୭ରନ୍ରେ ଲଜ୍ଜାଜନକ ଭାବେ ପରାଜିତ ହୋଇଛି ଭାରତୀୟ ଟିମ୍। ଏହା ପରେ ଦଳରେ ନିଆଯାଇଥିବା ଖେଳାଳିଙ୍କୁ ନେଇ ପ୍ରଶ୍ନ ଉଠୁଛି। ଅଧିନାୟକ ବିରାଟ କୋହଲି ସିରିଜ୍ର ପ୍ରଥମ ଟେଷ୍ଟରେ କୁଲଦୀପ ଯାଦବଙ୍କ ସ୍ଥାନରେ ଶାହବାଜ ନଦୀମଙ୍କୁ ସୁଯୋଗ ଦେଇଥିଲେ। ହେଲେ ସେ ଭଲ ପ୍ରଦର୍ଶନ କରିପାରି ନ ଥିଲେ। ତାଙ୍କ ବ୍ୟତିତ ଅଲରାଉଣ୍ଡର ଓ୍ବାଶିଂଟନ ସୁନ୍ଦର ବ୍ୟାଟିଂ ଭଲ କରି ୮୫ ରନ୍ର ଅପରାଜିତ ପାଳି ଖେଳିଥିଲେ ହେଁ ବୋଲିଂରେ ନିରାଶ କରିଥିଲେ। ୨୭ ଓଭରରେ ସେ ଗୋଟିଏ ବି ଉଇକେଟ ହାସଲ କରିପାରି ନ ଥିଲେ। ଏଣୁ ଅଧିନାୟକ ତାଙ୍କୁ ଦ୍ୱିତୀୟ ପାଳିରେ କେବଳ ୧ ଓଭର ବୋଲିଂ କରିବାକୁ ସୁଯୋଗ ଦେଇଥିଲେ। ହେଲେ ସେ ଏକାଦଶରେ ନିଜ ସ୍ଥାନ ବଜାୟ ରଖିବାରେ ସଫଳ ହେବେ ବୋଲି ପୂର୍ବ ଅଧିନାୟକ ସୁନିଲ ଗାଭାସ୍କର କହିଛନ୍ତି।
୧୩ ଫେବୃୟାରୀରେ ଦ୍ୱିତୀୟ ଟେଷ୍ଟ ଖେଳିବାକୁ ରହିଥିବା ବେଳେ ଭାରତୀୟ ଟିମ୍ରେ ଗୋଟିଏ ପରିବର୍ତ୍ତନ ହୋଇପାରେ ବୋଲି କୁହାଯାଉଛି। ଏବେର ଏକାଦଶ ଖେଳାଳିଙ୍କ ମଧ୍ୟରୁ ସର୍ବାଧିକ ଭଲ ପ୍ରଦର୍ଶନ କରୁଛନ୍ତି। ଏଣୁ ଦଳରେ ଅଧିକ ପରିବର୍ତ୍ତନ କରିବା ଠିକ୍ ନୁହେଁ। ଓ୍ବାଶିଂଟନ୍ଙ୍କ ସ୍ଥାନରେ ଅନ୍ୟ କାହାକୁ ଖେଳାଯିବାକୁ ଆଲୋଚନା ହେଉଥିଲେ ହେଁ ସେଭଳି ହୋଇ ନ ପାରେ। ଆଗାମୀ ଦିନରେ ସେ ଭଲ ବୋଲିଂ କରିପାରନ୍ତି। ସାଥୀ ଖେଳାଳି ରବିଚନ୍ଦ୍ରନ ଅଶ୍ୱିନଙ୍କ ସହ ତାଙ୍କୁ ଆଲୋଚନା କରିବାକୁ ହେବ। ଅପରପକ୍ଷେ ସେ ଭଲ ବ୍ୟାଟିଂ କରୁଥିବା ଦେଖାଯାଉଛି। ମାତ୍ର ତାଙ୍କୁ ଅଧିକ ବୋଲିଂର ସୁଯୋଗ ମିଳିବା ଉଚିତ। ସେ ମଧ୍ୟ ଅନ୍ୟ ଖେଳାଳିଙ୍କଠାରୁ ଶିଖିବା ଉଚିତ ବୋଲି ଗାଭାସ୍କର କହିଛନ୍ତି।