ନୂଆଦିଲ୍ଲୀ,୩୦।୩: ଇଂଲଣ୍ଡ ବିପକ୍ଷ ସିରିଜ ଶେଷ ହେବା ପରେ ଏବେ ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍) ପାଇଁ ଅଣ୍ଟା ଭିଡିଛନ୍ତି ଭାରତୀୟ ଖେଳାଳି। ସମସ୍ତ ଫ୍ରାଞ୍ଚାଇଜ୍ ଟୁର୍ନାମେଣ୍ଟ ପାଇଁ ଆବଶ୍ୟକୀୟ ପ୍ରସ୍ତୁତି ଆରମ୍ଭ କରିଛନ୍ତି। ଏସବୁ ମଧ୍ୟରେ ଆଇପିଏଲ୍କୁ ନେଇ ପୂର୍ବ ଅଭିଜ୍ଞ କ୍ରିକେଟର ସୁନିଲ ଗାଭାସ୍କର ଏକ ବଡ଼ ବୟାନ ଦେଇଛନ୍ତି। ସେ କହିଛନ୍ତି, ଆସନ୍ତା ସଂସ୍କରଣରେ ଅଧିନାୟକ ରୋହିତ ଶର୍ମାଙ୍କ ଟିମ୍ ମୁମ୍ବାଇ ଇଣ୍ଡିଆନ୍ସକୁ ହରାଇବା କଷ୍ଟକର ହେବ। ଦଳ ଏଯାବତ ପାଞ୍ଚଥର ଆଇପିଏଲ୍ ବିଜେତା ହୋଇଥିବା ବେଳେ ଲଗାତାର ଦୁଇ ବର୍ଷ ଧରି ଟ୍ରଫି ଉପରେ କବ୍ଜା କରିଛି। ଏଣୁ ଚଳିତ ସିଜନ୍ ଜିତିଲେ ଏମ୍ଆଇ ପାଇଁ ଏହା ହାଟ୍ରିକ୍ ବିଜୟ ହେବ।
ଭାରତ-ଇଂଲଣ୍ଡ ମଧ୍ୟରେ ହୋଇଥିବା ଧଳା ବଲ୍ ସିରିଜରେ ଯେଉଁ ଖେଳାଳି(ରୋହିତ, ସୂର୍ଯ୍ୟକୁମାର ଯାଦବ, ଈଶାନ କିଷନ, ହାର୍ଦ୍ଦିକ ପାଣ୍ଡ୍ୟା) ଉଲ୍ଲେଖନୀୟ ପ୍ରଦର୍ଶନ କରିଛନ୍ତି, ସେମାନଙ୍କ ମଧ୍ୟରୁ ଅଧିକ ମୁମ୍ବାଇ ଇଣ୍ଡିଆନ୍ସର ଖେଳାଳି। ଏଣୁ ଏହି ଟିମ୍ ଆଇପିଏଲ୍ରେ ଭଲ ପ୍ରଦର୍ଶନ କରିବା ଆଶା କରାଯାଉଛି। ଅନ୍ୟ ଟିମ୍ ମାନଙ୍କ ପାଇଁ ମୁମ୍ବାଇ ଇଣ୍ଡିଆନ୍ସକୁ ହରାଇବା କଠିନ ହେବ ବୋଲି ଗାଭାସ୍କର କହିଛନ୍ତି।
