ନୂଆଦିଲ୍ଲୀ, ୧୦।୯: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୩ତମ ସଂସ୍କରଣ ଆସନ୍ତା ସେପ୍ଟେମ୍ବର ୧୯ରୁ ଆରମ୍ଭ ହେବ। ଏହି ଅବସରରେ ଓ୍ବେଷ୍ଟଇଣ୍ଡିଜର ଦୁର୍ଦ୍ଦର୍ଷ ଓପନର୍ କ୍ରିସ୍ ଗେଲ୍ଙ୍କ ନିକଟରେ ଇତିହାସ ରଚିବା ଲାଗି ସୁଯୋଗ ରହିଛି। ଟି୨୦ କ୍ରିକେଟ୍ ଇତିହାସରେ ପ୍ରଥମ ବ୍ୟାଟ୍ସମ୍ୟାନ ଭାବେ ଗେଲ୍ ୧୦୦୦ ଛକା ମାରିବାର ନିକଟତର ହୋଇଛନ୍ତି। ଅନ୍ତର୍ଜାତୀୟ ସମେତ ବିଭିନ୍ନ ଟି୨୦ ଲିଗ୍କୁ ମିଶାଇ ଗେଲ୍ ବର୍ତ୍ତମାନ ସୁଦ୍ଧା ୯୭୮ ଛକା ମାରି ସାରିଛନ୍ତି। ୧୦୦୦ ଅଙ୍କ ଛୁଇଁବା ଲାଗି ସେ ଆଉ ୨୨ଟି ଛକାର ଆବଶ୍ୟକ କରୁଛନ୍ତି। ବିଶ୍ୱ ଟି୨୦ କ୍ରିକେଟ୍ରେ ସର୍ବାଧିକ ଛକା ମାରିବା ତାଲିକାର ୨ୟ ସ୍ଥାନରେ ଅନ୍ୟତମ ଓ୍ବେଷ୍ଟଇଣ୍ଡିଜ ବ୍ୟାଟ୍ସମ୍ୟାନ କିରନ ପୋଲାର୍ଡ ରହିଛନ୍ତି। ପୋଲାର୍ଡଙ୍କ ନାମରେ ବର୍ତ୍ତମାନ ସୁଦ୍ଧା ୬୭୨ ଛକା ଲିପିବଦ୍ଧ ରହିଛି। ସେହିଭଳି ଟି୨୦ରେ ସର୍ବାଧିକ ଚୌକା ମାରିବାର ରେକର୍ଡ ମଧ୍ୟ ଗେଲ୍ (୧୦୨୬)ଙ୍କ ନାମରେ ରହିଛି।
ଆଇପିଏଲ୍ ଇତିହାସରେ ମଧ୍ୟ ଗେଲ୍ଙ୍କ ନାମରେ ସର୍ବାଧିକ ଛକା ମାରିବାର ରେକର୍ଡ ମଧ୍ୟ ରହିଛି। ବର୍ତ୍ତମାନ ସୁଦ୍ଧା ଗେଲ୍ ଆଇପିଏଲ୍ରେ ୩୨୬ ଛକା ମାରି ସାରିଛନ୍ତି। ଏହି ତାଲିକାରେ ଏବି ଡି ଭିଲର୍ସ (୨୧୨) ଓ ମହେନ୍ଦ୍ର ସିଂ ଧୋନୀ (୨୦୯) ଯଥାକ୍ରମେ ୨ୟ ଓ ୩ୟ ସ୍ଥାନରେ ରହିଛନ୍ତି। ସେହିଭଳି ଟି୨୦ରେ ଗେଲ୍ ଶୂନରେ ଆଉଟ୍ ନ ହୋଇ ସର୍ବାଧିକ ୧୪୫ ଇନିଂସ ଖେଳି ରେକର୍ଡ କରିଛନ୍ତି।
