ନୂଆଦିଲ୍ଲୀ,୧।୯: ଚଳିତ ଆର୍ଥିକ ବର୍ଷ (୨୦୨୨-୨୩)ର ୧ମ ତ୍ରୈମାସର ମୋଟ ଘରୋଇ ଉତ୍ପାଦ (ଜିଡିପି)ର ବିସ୍ତୃତ ସୂଚନା କେନ୍ଦ୍ର ସରକାର ବୁଧବାର ଜାରି କରିଛନ୍ତି। ଉକ୍ତ ସୂଚନା ଅନୁଯାୟୀ ଗତ ୪ଟି ତ୍ରୈ ମାସିକଠାରୁ ଚଳିତ ଆର୍ଥିକ ବର୍ଷର ୧ମ (ଏପ୍ରିଲରୁ ଜୁନ୍) ତ୍ରୈମାସରେ ଭାରତୀୟ ଅର୍ଥନୀତି ୧୩.୫% ହାରରେ ବୃଦ୍ଧି ପାଇଛି। ଏପରିକି ପୂର୍ବ ବର୍ଷ ସମାନ ଅବଧିରେ ୨୦.୧% ର ଅଭିବୃଦ୍ଧି ହୋଇଥିଲା। କିନ୍ତୁ ଏଥିରେ ଲୋ ବେସ୍ର ବଡ଼ ଭୂମିକା ଥିଲା। ଉଲ୍ଲେଖଯୋଗ୍ୟ, ୨୦୨୦-୨୧ ଆର୍ଥିକ ବର୍ଷର ପ୍ରଥମ ତ୍ରୈମାସରେ କୋଭିଡ୍ ଲକ୍ଡାଉନ ଯୋଗୁ ଅର୍ଥନୀତିରେ ୨୩.୮%ର ହ୍ରାସ ଘଟିଥିଲା। ସେହିଭଳି ଗତ ଆର୍ଥିକ ବର୍ଷର ଶେଷ ତ୍ରୈମାସରେ ଦେଶର ଜିଡିପି ଅଭିବୃଦ୍ଧି ମାତ୍ର ୪.୧% ରହିଥିଲା । କିନ୍ତୁ ଜୁନ୍ ତ୍ରୈମାସରେ ଜିଡିପି ଅଭିବୃଦ୍ଧି ବଢିବା ପଛରେ ଲୋ ବେସ୍ ସହ ଆର୍ଥିକ ଗତିବିଧି ମଧ୍ୟ ଗତିଶୀଳ ହେବା ପ୍ରମୁଖ କାରଣ ରହିଛି। ତେବେ ଏହା ସଂଖ୍ୟା ଆକଳନଠାରୁ କମ୍ ରହିଛି ବୋଲି ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି। ସେହିପରି ଭାରତୀୟ ଷ୍ଟେଟ ବ୍ୟାଙ୍କର ରିପୋର୍ଟ ଅନୁସାରେ ଦେଶର ବିକାଶ ହାର ୧୫.୭% ରହିବ ବୋଲି ଆକଳନ କରାଯାଇଥିଲା। ଅନ୍ୟପଟେ ଆର୍ବିଆଇ ମଧ୍ୟ ଚଳିତ ମାସ ଆରମ୍ଭରେ ହୋଇଥିବା ମୁଦ୍ରାନୀତି ବୈଠକରେ ଭାରତର ପ୍ରଥମ ତ୍ରୈମାସର ଜିଡିପି ହାର ୧୬.୨% ରହିବ ବୋଲି କହିଥିଲା। ତେବେ ୧୩.୫% ର ବିକାଶ ହାର ଭାରତୀୟ ଅର୍ଥନୀତିର ଦ୍ୱିତୀୟର ସବୁଠୁ ବଡ଼ ଅଭିବୃଦ୍ଧି। ଏହା ପୂର୍ବକୁ ଗତ ଆର୍ଥିକ ବର୍ଷରେ ପ୍ରଥମ ତ୍ରୈମାସରେ ଜିଡିପି ବିକାଶ ହାର ୨୦.୧% ଥିଲା। ଏହିପରି ଭାରତ ଦୁନିଆରେ ସବୁଠୁ ଦ୍ରୁତଗତିରେ ବିକାଶ କରୁଥିବା ଅର୍ଥନୀତି ହୋଇଛି। ଏହାରି ଭିତରେ କୋର ସେକ୍ଟର ଡାଟା ମଧ୍ୟ ଜାରି କରାଯାଇଛି। ଗୋଟିଏ ବର୍ଷ ତୁଳନାରେ ଜୁଲାଇ ୨୦୨୨ରେ କୋର ସେକ୍ଟର ଆଉଟପୁଟ୍ ଧିମେଇବା ସହ ଏହାର ଗ୍ରୋଥ ୪.୫% ରହିଥିଲା। ଅପରପକ୍ଷରେ ୨୦୨୧ ଜୁଲାଇରେ କୋର ସେକ୍ଟରରେ ୯.୯%ର ଅଭିବୃଦ୍ଧି ରେକର୍ଡ ହୋଇଥିଲା। ପରିସଂଖ୍ୟାନ ଅନୁସାରେ, ମୂଳ ଉଦ୍ୟୋଗ (କୋର ସେକ୍ଟର) କୋଇଲା, ଅଶୋଧିତ ତେଲ, ପ୍ରାକୃତିକ ଗ୍ୟାସ୍, ରିଫାଇନେରି ଉତ୍ପାଦ, ସାର, ଇସ୍ପାତ, ସିମେଣ୍ଟ ଏବଂ ବିଜୁଳିର ବୃଦ୍ଧି ହାର ଚଳିତ ବର୍ଷର ପ୍ରଥମ ୪ ମାସ ଏପ୍ରିଲ-ଜୁଲାଇରେ ୧୧.୫% ରହିଛି। ଗତ ବର୍ଷ ସମାନ ଅବଧିରେ ଏହି ସଂଖ୍ୟା ୨୧.୪% ଥିଲା।