ଜୟପୁର, ୩।୧୧: ଏଆଇସିସି ଅଧ୍ୟକ୍ଷ ନିର୍ବାଚନ ଶେଷ ହେବାପରେ ରାଜସ୍ଥାନ କଂଗ୍ରେସରେ କ୍ଷମତା ପାଇଁ ପୁଣି ମୁହଁ।ମୁହିଁ ହୋଇଛନ୍ତି ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ଓ ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟ୍। ପୂର୍ବରୁ କଂଗ୍ରେସ ଅଧ୍ୟକ୍ଷ ପଦ ଦୌଡ଼ରେ ଥିବା ଗେହଲଟଙ୍କୁ ମୁଖ୍ୟମନ୍ତ୍ରୀ ପଦ ଛାଡ଼ିବାକୁ ପଡ଼ିବ ବୋଲି ଦଳର ନେତା ରାହୁଲ ଗାନ୍ଧୀ ସ୍ପଷ୍ଟ କରିଥିଲେ।
ଏହାପରେ ଗେହଲଟଙ୍କ ଅନୁଗାମୀ ବିଧାୟକମାନେ ଦଳରେ ବିଦ୍ରୋହ କରିଥିଲେ। ଫଳରେ ପାଇଲଟ ଆଉଥରେ ମୁଖ୍ୟମନ୍ତ୍ରୀ ହେଉ ହେଉ ରହିଯାଇଥିଲେ। ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଗେହଲଟ ରାଜସ୍ଥାନର ଏକ କାର୍ଯ୍ୟକ୍ରମରେ ମଞ୍ଚାସୀନ ହୋଇଥିଲେ। ଏହି ଅବସରରେ ଉଭୟେ ପରସ୍ପରକୁ ପ୍ରଶଂସା କରିଥିଲେ। ଏ ନେଇ ପାଇଲଟ କହିଛନ୍ତି, ପ୍ରଧାନମନ୍ତ୍ରୀ ପୂର୍ବରୁ ପାର୍ଲାମେଣ୍ଟରେ ଗୁଲାମନବୀ ଆଜାଦଙ୍କୁ ପ୍ରଶଂସା କରିଥିଲେ। ଆଜାଦ କ’ଣ କଲେ ତାହା ସମସ୍ତଙ୍କୁ ଜଣା। ଗେହଲଟ ଆଗକୁ କ’ଣ କରିପାରନ୍ତି, ଏବେ ଅନୁମାନ କରାଯାଉ। ଏଥିସହ କଂଗ୍ରେସର ବିଦ୍ରୋହୀ ବିଧାୟକମାନଙ୍କ ବିରୋଧରେ ଦଳ ପକ୍ଷରୁ କାର୍ଯ୍ୟାନୁଷ୍ଠାନ ନିଆଯାଉ। ଏହା ଉପରେ ଗେହଲଟ କହିଛନ୍ତି, ପାଇଲଟ ଏପରି ମନ୍ତବ୍ୟ ଦେବା ଅନୁଚିତ୍। ସମସ୍ତେ ଦଳୀୟ ଶୃୃଙ୍ଖଳା ମାନି ଚଳନ୍ତୁ।